Запорожнинг Москва томонидан тайинланган раҳбари референдум тўғрисидаги қарорни қабул қилди
Запорожнинг Москва томонидан тайинланган раҳбари Евгений Балицкий вилоятнинг Россияга қўшилиши бўйича референдум ўтказиш тўғрисида қарор чиқарди. Бу ҳақда ТАСС ва РИА Новости хабар тарқатди.
Қарорни имзолаш тадбири 8 август куни Мелитополда Россия ҳукумати томонидан уюштирилган форум доирасида бўлиб ўтди. Референдумни ўтказиш муддати ҳозирча эълон қилинмаяпти.
Аввалроқ Россия босиб олинган Херсон ва Запорож вилоятларида “Россияга қўшилиш бўйича референдум” ўтказишни режалаштираётгани айтилган эди. Бу вилоятларда сайлов комиссиялари ҳам ташкил этилмоқда. Лекин референдум қачон ўтказилиши номаълумлигича қолаётир.
Россия Херсон вилоятини тўлиғича, Запорож вилоятининг эса 60 фоизга яқинини босиб олган. Запорож шаҳрини ҳозирда Украина назорат қилаётир. Киев Россия босиб олган барча ҳудудлар тез орада қайтариб олинишини ваъда қилмоқда.
АҚШ Украина бюджетини қўллаб-қувватлашга 4,5 миллиард доллар беради
АҚШ Украина бюджетидан молиялаштириладиган тўловларни таъминлаш, жумладан, касалхона ва мактабларга электр ҳамда иссиқлик ҳақини тўлаш, врачлар, ўқитувчилар ва бошқа хизматчиларнинг ойликлари учун 4,5 миллиард доллар миқдорида кўмак кўрсатади. Бу ҳақда АҚШ халқаро ривожланиш агентлиги сайтида маълум қилинди.
АҚШ Молия вазирлиги томонидан Жаҳон банки орқали бериладиган маблағнинг 3 миллиард долларлик биринчи қисми август ойида берилади. Жаҳон банкининг ҳисобича, уруш оқибатида 2023 йил охирига келиб, Украина аҳолисининг 55 фоизи қашшоқликка юз тутади. Уруш бошлангунига қадар бу кўрсаткич 2,5 фоизни ташкил қилар эди.
АҚШ Украинага июлда 1,7 миллиард доллар, июнда 1,3 миллиард доллар кўмак кўрсатган эди. Бундан ташқари Вашингтон Киевга бир неча миллиард долларлик ҳарбий ёрдам ҳам кўрсатган. 8 август куни Пентагон Украинага яна қўшимча тарзда 1 миллиард долларлик қурол етказиб берилишини билдирган.
Мазкур ёрдам доирасида Украинага HIMARS ва NASAMS комплекслари учун ракеталар, 155 мм., калибрдаги 75 мингта артиллерия снаряди, 50 та зирхланган ҳарбий тез ёрдам автомашинаси, пиёдаларга қарши миналар ва портловчи моддалар берилади.
Украина ҳукуматининг билдиришича, уруш оқибатида мамлакат бюджети ой сайин 5 миллиард доллар дефецитга учрамоқда.
Новая Каховканинг Россия тайинлаган вице-мэри бандитизмда айбланиб қўлга олинди
Украинанинг Херсон вилояти Новая Каховка шаҳар мэрининг биринчи ўринбосари Виталий Ефименко Россия полицияси томонидан бандитизмда айбланиб қўлга олинди. Унинг уйидан қурол ва бир неча ўн миллион рубль топилди.Бу ҳақда "Коммерсантъ" ИИВга таянган ҳолда хабар берди.
Россия ИИВнинг Херсондаги вақтинчалик бошқармаси ходимлари икки тадбиркорга қилинган ҳужум юзасидан олиб борилаётган тергов доирасида Ефименконинг изига тушган. ИИВнинг билдиришича, полиция Ефименко доҳил қуролли гуруҳ аъзоларини қўлга олган. Қанча киши ушлангани маълум қилинмаган.
Херсон вилояти Россия армияси томонидан босиб олинганидан сўнг Москва маҳаллий тадбиркор Ефименкони Новая Каховка мэри ўринбосари лавозимига тайинлаган эди. Август ойи бошларида унга суиқасд уюштирилган, аммо у тирик қолган. Украина матбуоти Ефименко Херсонда таниқли криминал авторитет экани ҳақида ёзганди.
6 август куни Новая Каховканинг Москва томонидан тайинланган яна бир вице-мэри Витай Гура ўлдириб кетилган эди. 5 август куни эса Херсон вилоятининг Россия тайинлаган ҳокими Владимир Салдо заҳарлангани хабар қилинган.
Харидор «Разони» кемаси Ливанга етказган украин ғалласидан бош тортди
Харидор «Разони» кемаси Ливанга етказадиган украин ғалласини сотиб олишдан бош тортди. Бу ҳақда Украинанинг Ливандаги элчихонаси маълум қилди. Харидор ўз қарорини украин ғалласи белгиланган муддатидан беш ой кечикиб етиб келгани билан изоҳлади. У бошқа таъминотчи топишини ҳам билдирган.
«Разони» кемаси Россия Украинага бостириб кирганидан сўнг Одесса бандаргоҳидан ғалла ортиб, 1 август куни йўлга чиққан илк кемадир. Сьерра-Леоне байроғи остида сузаётган кема Ливан пойтахти Триполи бандаргоҳига сешанба куни етиб бориши кутилаётганди. Ҳозир 26 минг тонна маккажўхори ортилган кема Туркия қирғоқларида турибди.
Форум