Жессика Честейн: Украина халқи жуда кучли
Таниқли америкалик актриса Жессика Честейн 7 август куни Киевда Украина президенти Владимир Зеленский ва унинг маъмурияти раҳбари Андрей Ермак билан учрашди.
Киевга поездда етиб келган Честейнни вокзалда Украина расмий делегацияси кутиб олди. Учрашувда Зеленский актрисага ташриф учун миннатдорлик билдирди:
"Украина мавзуси унутилмаслиги биз учун жуда муҳим. Бунда бизга дунёга маълум ва машҳур инсонларнинг ёрдами лозим. Биз сиз ҳақингизда яхши биламиз, сиз Украинада жуда машҳурсиз. Биз учун дунёда Украина мавзуси унутилмаслиги керак”.
Актриса Украина халқини “жуда жасур ва кучли” эканлигини олқишлади: "Украин халқи ақл бовар қилмайдиган даражада жасур ва жуда кучли. Украина халқи жуда кучли".
Украина матбуотига кўра, Честейн Киевдаги "Оҳматдит" болалар касалхонаси, шунингдек, Россиянинг феврал ойида Украинага ҳужумидан жиддий зарар кўрган Ирпинга ҳам бориш истагини билдирган.
Честейн - Россиянинг Украинага босқинини қоралаган ва бу урушда Украинани қўллаб, қочқинлар ҳамда мамлакатда қолаётган аҳолига ёрдам кампаниясини қўллаб келаётган кўплаб америкалик санъаткорлардан биридир.
Украинада 8 август эрталабки вазият
“Настояшчее время” телеканалининг хабар беришича, 8 августга ўтар кечаси Россия ҳарбийлари Николаев шаҳрини, Днепропетровск ва Харьков вилоятидаги бир неча қишлоқни бомбардимон қилган. Оқибатда ўнлаб тинч аҳоли яшайдиган уйлар вайрон бўлди. Қурбонлар ҳақида ҳозирча маълумот мавжуд эмас.
Фаол жанговар ҳаракатлар Донецк вилоятининг Бахмут, Краматорск, Авдеевка ва Славянск аҳоли пунтклари яқинида бўлмоқда.
БМТ Бош котиби Антониу Гутерриш Россия босиб олган Запорож АЭСидан фойдаланишда тартиб-қоидалар бузилаётгани тўғрисидаги хабарлардан ташвиш билдирди. У Россия ҳукуматини Халқаро атом энергияси агентлиги экспертларини назорат тартибида Запорож АЭСига киритишга чақирди.
АҚШдаги Урушни ўрганиш институти - ISW Британия разведкаси маълумотларига таянган ҳолда, урушдаги муваффақиятсизликлар оқибатида Москва ўз қўмондонларини алмаштираётганини билдирди. Билдирилишича, уруш бошланганидан бери Россия олти қўмондонни лавозимидан бўшатган.
Зеленский: Россия “референдумлар” ўтказадиган бўлса, музокаралар имкониятидан маҳрум бўлади
Украина президенти Владимир Зеленский анъанавий кечки видеомурожаатида Россия босиб олинган ҳудудларда “референдум”лар ўтказадиган бўлса Киев билан музокаралар ўтказишга бўлган ҳар қандай имкониятини қўлдан бой бериши ҳақида гапирди.
Украина президентига кўра: “Россия томонига музокаралар ўтказиш муайян бир паллада катта заруриятга айланади”.
Россия Украинага бостириб кирганидан буён Киев ва Москва расмийлари бир неча марта урушни тўхтатиш масаласида музокаралар ўтказди. Бироқ уларнинг барчаси муваффақиятсиз якунланди. Сўнги музокара март ойида Истанбулда ўтказилди.
Россия шу кунгача Луганск вилоятини тўлиғича, Донецк, Херсон ва Запорож вилоятларининг катта қисмини босиб олди. Мазкур ҳудудларда ташкил этилган оккупацион маҳаллий ҳукумат расмийлари Россияга қўшилиш тўғрисида сентябрь ойида референдумлар ўтказилишини айтмоқда.
Жириновский асос солган ЛДПР партиясидан депутат Журавлёв немис журналистини ўлдиришга қасд қилди
ЛДПР партияси 7 август куни давлат думаси депутати Алексей Журавлёвнинг немис журналистини ўлдиришга қасд қилгани тўғрисидаги сўзлари “партия раҳбарияти позициясига зид келадиган шахсий фикр” эканини билдирди. ЛДПР Журавлёвнинг ушбу хатти-ҳаракати партиянинг сентябрда ўтадиган йиғилишида муҳокама этилишини маълум қилди.
Аввалроқ “Россия-1” телеканалининг “60 минут” кўрсатувида Алексей Журавлёв Украинадаги урушни ёритаётган Германиянинг Bild нашри журналистини ўлдиришга қасд қилганини очиқ айтган эди.
Журавлёв сўзма-суз мана буларни айтди: “Биз барчамиз келамиз ва сизларнинг барчангизни ўлдирамиз”. Журавлёв бу гапни айтар экан, уятли ва ҳақоратли сўзларни ишлатди.
Кўрсатув муаллифи Евгений Попов депутатни тўхтатмоқчи бўлди, бироқ Журавлёв бошловчига бир неча марта “Тупурдим” деган сўзни айтган. Шундан сўнг депутат Украинада немис журналистини учратиб қолса, уни албатта ўлдиришга қасд қилганини билдирди.
Форум