Amnesty International Украина айбланган ҳисоботи учун узр сўради
Amnesty International халқаро ташкилоти Украина армияси ҳаракатлари танқид қилинган ҳисботи учун узр сўради. Ташкилот «ҳисобот ғазаб ва изтиробларга сабаб бўлгани»дан афсусда эканини билдирди.
Reuters агентлигининг ёзишича, Amnesty International узр сўраган ҳолда ҳисоботда келтирилган хулосадан воз кечмаслигини таъкидлаган. Ҳисобот хулосасида Украина армиясини мактаб ва касалхона каби фуқаровий объектларга жойлаштириб, уруш олиб бориш қоидасини бузаётгани айтилган эди.
Amnesty International 7 августдаги баёнотида “ҳисоботда Россия ҳарбийларининг ҳаракатлари мутлақо оқлаб бўлмас экани”ни ҳамда “Amnesty International Россия ҳарбийлари томонидан амалга оширилган ҳаракатлар учун Украина армияси масъул деб ҳисобламаслиги”ни таъкидлади.
Amnesty International ўтган ҳафтада эълон қилган баҳсли ҳисоботни Украина президенти Владимир Зеленский қоралаб чиқққан, Украина Қуролли кучлари эса ташкилотни аккредитациядан маҳрум қилган эди. Бунинг ортидан Amnesty International ташкилотининг Украина ваколатхонаси раҳбари Оксана Покальчук истеъфо берди.
Украиналик болакай қўшиқ айтиб йиққан пулини ҳарбийларга берди
Черниговлик 8 ёшли Сергей Украина армияси учун 64 000 гривна еки 1700 доллардан кўпроқ пул йиғиб, Сергей Притула фондига хайрия қилди. Бу ҳақда ташкилот саҳифасида хабар берилди.
Бола кўчада украинча қўшиқлар айтиб пул йиққанини гапириб берди. Жамғарма раҳбарининг “Бу пуллар қонуний йўллар билан топилганми?” дея берган ҳазилига бола жиддий оҳангда:
- Мен кўчада қўшиқ айтиб Украина армияси учун пул йиғдим. Мана 64 минг йиғдим. Майда пул жуда кўп эди – мана бунча эди! Биз ҳаммасини йириклаштириб олиб келдик, деди.
Хайрия жамғармаси вакиллари Сергейнинг бу ҳатти ҳаракатларидан жуда таъсирланиб кетганини билдиришди. Фонд раҳбари Притула таклифи билан болакай қўшиқ айтиб йиққан пул қўлга олинган рус танкини таъмирлашга сарфланади.
Новая Каховдага янги маъмурият мулозими ўлдирилди
Херсон вилоятидаги Новая Каховка шаҳри оккупация маъмурияти бошқармаси бошлиғи ўринбосари Виталий Гура суиқасд натижасида ҳалок бўлди. Бу ҳақда Херсон вилояти ишғол маъмурияти раҳбари ўринбосари Екатерина Губаревага таяниб, “ТАСС” хабар берди.
РИА Новости манбаларига кўра, шанба куни эрталаб Гура уйи ёнида бир неча марта ўқ узган, шундан сўнг у оғир аҳволда касалхонага ётқизилган.
Бир кун аввал Херсон вилояти ишғол маъмурияти раҳбари Владимир Салдо заҳарланиш гумони билан касалхонага ётқизилгани ҳақида хабарлар тарқалган эди.
База Телеграм каналида ёзилишича, Салдо жуда оғир аҳволда Қримга олиб кетилган. У ердан уни Москвага олиб кетишга қарор қилинган, аммо у комага тушиб қолган. Нашрнинг ёзишича, у Москвадаги Склифосовский илмий-тадқиқот институтининг токсикология бўлимининг жонлантириш қисмида қолмоқда.
Россия Мудофаа вазирлиги: ҳорижлик ёлланма аскарлар ва HIMARSлар йўқ қилинди
Россия Мудофаа вазирлиги шанба кунги Днепрга берилган зарбалар чоғида 80 дан ортиқ хорижлик ёлланма аскар ҳалок бўлганини маълум қилди.
Бош матбуот котиби Игор Конашенков, шунингдек, Украинанинг бир қанча ҳарбий тузилмалари “ўз позицияларини тарк этиб, ҳужум қилиш буйруғига бўйсунишдан бош тортганини” билдирди. Конашенков сўнгги зарбада йўқ қилинган ўнлаб Украина артиллерия қуроллари қаторида Америка HIMARSлари борлигини айтиб ўтди.
Озодлик бу маълумотларни уруш шароитида текшириш имконига эга эмас.
Бироқ, бундан олдинроқ Россия тарафи яна 6та ҲАЙМАРС тизимини йўқ қилгани тўғрисида берган маълумотлари мутахассислар томонидан ёлғон деб аталганди.
Пентагон матбуот котиби вазифасини бажарувчи Тодд Бреассел Россия мудофаа вазири Сергей Шойгунинг Украинадаги урушда АҚШда ишлаб чиқарилган олтита HIMARS ракета мажмуаси йўқ қилинганига оид иддаоси ҳақиқатга тўғри келмайди, деди.
“Вазир Шойгунинг сўнгги баёнотларидан хабаримиз бор ва улар яна атайлаб уйдирилган ёлғондир”, деган Пентагон мулозими.
Украинага берилган HIMARS тизимларидан биронтаси ҳам йўқ қилинмагани ҳақида аввалроқ “Жануб” оператив қўмондонлиги раҳбари, генерал-майор Андрей Ковальчук ҳам билдирган эди. Маълумотларга кўра, АҚШ шу кунгача Украинага 16 та HIMARS тизимини етказиб берган.
Форум