Псаки: Россия Украинадаги урушда аллақачон мағлуб бўлди
Оқ уй матбуот котиби Жен Псаки чоршанба куни Россия "Украинадаги урушда аллақачон мағлуб бўлганини" айтди:
“Президент Путин бошиданоқ урушда ғалаба қозониш деганда Украинани эгаллаб олиш, Украинани Россия таркибига қўшиб олиш, уни ҳудудий яхлитлиги ва суверенитетидан маҳрум этишни тушунган. Кўриниб турибдики, бундай эмас. Биласизми, у келгуси душанба куни Киев кўчалари бўйлаб ғалаба билан юришни кутган ва режалаштирган эди. Бу содир бўлмаслиги аниқ. У НАТОни парчалаш, Ғарбни бўлишни хоҳларди. Шубҳасиз, бу аниқ содир бўлмади. Биз Украина ғалаба қозонишини хоҳлаётганимизни айтдик. Биз Украинага ўз суверенитети ва ҳудудий яхлитлигини ҳимоя қилиш, жанг майдонида ва музокараларда украиналикларнинг позициясини мустаҳкамлаш учун қўлимиздан келган барча ишни қилишга тайёрмиз. Бу бизнинг ролимиз."
Кулеба: Украина Россиядан қўрқмайди ва урушда ғалаба қозонади
Украина ташқи ишлар вазири Дмитрий Кулебанинг айтишича, Украина Россиядан қўрқмайди ва урушда ғалаба қозонади “чунки бошқа танлов йўқ”:
“Тез орада музокаралар йўли билан ҳал бўлишини кутмайман, чунки Россия музокаралардан кўра урушни очиқча афзал кўрган. Агар сиз музокара қилмоқчи бўлсангиз, Донбассда минглаб одамларни танк ва артиллерия билан ўққа тутмаган бўлардингиз. Агар сиз урушни истасангиз, агар сиз уруш учун музокараларни хоҳласангиз, агар сиз урушдан кўра музокараларни афзал кўрсангиз, Азовстални қамал қилмайсиз ва куни бўйи ўқ узмайсиз. Агар сиз урушдан кўра музокараларни афзал кўрсангиз, мамлакат бўйлаб Украина шаҳарлари инфратузилмасига қанотли ракеталар билан ҳужум қилмайсиз. Бу урушда ғалаба қозонишимиздан бўлак йўл йўқ, чунки украиналик ўзлигининг мавжудлиги, украин миллатининг мавжудлиги хавф остида ва биз ҳеч бир шароитда таслим бўлмаймиз”.
Украина жанубдаги бир қанча қишлоқлар назоратини қайтариб олди
Украина армияси Херсон жануби ва Николаев вилоятлари чегарасида ғалабаларга эришаётганини ҳамда шарқда Россиянинг кўплаб ҳужумларини қайтарганини маълум қилди.
Украина Қуролли кучлари Бош штаби матбуот котиби Александр Штупуннинг айтишича, Россия жанубдаги “бир қанча аҳоли пунктлари” устидан назоратни йўқотган.
Украина кучлари Донецк ва Луганск вилоятларида 11 та ҳужумни қайтарди, Россия Донбаcсда "катта" йўқотишларга учради, дея хабар берди Штупун.
Макивка нефт омбори ўққа тутилди. Жароҳатланганлар бор
Чоршанба куни Донецк яқинидаги Макивка шаҳрида нефт омбори ўққа тутилди. Бунинг натижасида омборда ёнғин чиқиб, бир киши ҳалок бўлган 10 киши эса оғир тан жароҳати олган.
Ҳужумдан сўнг 5000 тонналик тўртта нефт танки кучли аланга ичида қолди.
Маҳаллий ҳукумат ўша куниёқ нефт омборига украиналик ҳарбийлар томонидан ракета зарбаси берилганини хабар қилди. Бироқ бу даъвони тасдиқловчи далиллар келтирилмаган.
Украина ҳукумати ҳозирча ҳужум юзасидан ҳеч қандай расмий изоҳ бермади.