Беларусь армияси “тезкор жавоб қайтариш кучларини текширмоқда”
4 май куни Беларусь Мудофаа вазирлиги “тезкор жавоб қайтариш кучларини қўққисдан текшириш” бошланганини, текширув давомида “ҳарбий қисм ва бўлинмалар жанговар шайлик ҳолатига ўтиш, белгиланган ҳудудларга жойлашиш ва ўқув-жанговар вазифаларни бажариш каби машғулотларни ўтказиши”ни таълум қилди.
Вазирлик баёнотига кўра, “ушбу тадбирлар Европа ҳамжамияти учун ҳам, қўшни давлатлар учун ҳам ҳеч қандай хавф туғдирмайди”.
Россия Украинага қарши уруш бошлаганида рус қўшинларининг бир гуруҳи Беларусь ҳудудидан ҳужум қилган эди.
Россия, шунингдек, Украина шимолидаги шаҳарларга авиация ва артиллерия орқали зарбалар беришда Беларусь ҳудудидаги базалардан фойдалангани ҳақида маълумотлар бор.
24 февралдан сўнг Беларусь қўшинлари бир неча бор юқори шайлик ҳолатига келтирилди. Орада мамлакатнинг Россия тарафида Украинага қарши урушга кириши ҳам кутилган эди.
Австралия Дума депутатлари, “ДХР” ва “ЛХР” вазирлари, пропагандачи Соловьёвга қарши санкция жорий этди
Австралия ҳукумати Россия Давлат Думасининг 75 депутати, тан олинмаган “ДХР”нинг 20 ва “ЛХР”нинг 12 вазири ҳамда россиялик телебошловчи Владимир Соловьёвларга қарши санкциялар жорий этди. Уларга Австралияга бориш тақиқланади, уларнинг мамлакат ҳудудидаги активлари “музлатилади”.
14 апрелда Австралия Россиянинг қатор ширкатларига нисбатан жорий этилган санкцияларни кенгайтириб, “Газпром”, РЖД, “Согаз”, КамАЗ, “Газпромнефть”, “Транснефть”, “Алрос”, “Ростелеком” ва яна олти юридик шахсни “қора рўйхат”га тиркаган эди.
Украинага қарши уруш бошланган 24 февралдан бери Австралия Россиянинг президент Путин, ТИВ раҳбари Лавров, мудофаа вазири Шойгу дохил 67 фуқаросига нисбатан персонал санкциялар қўллаган ва қатор иқтисодий чекловларни амалга киритган. Бунга жавобан Россия Австралияни “дўст бўлмаган мамлакатлар” сирасига қўшди, шунингдек Австралия бош вазирига РФга келиш тақиқлаб қўйилди, Австралиянинг 228 сиёсий арбоби “қора рўйхат”га киритилди.
Шойгу икки ҳафтада иккинчи марта Мариуполь “ишғол этилган”ини даъво қилди
Россия мудофаа вазири Сергей Шойгу икки ҳафтада иккинчи марта Мариуполь “ишғол этилган”ини даъво қилди.
Бугун Шойгу Мариуполь “Россия армияси назоратида” эканини, “Азовсталь” заводида қаршиликни давом эттираётган украин ҳарбийлари эса периметр бўйлаб қуршовга олинганини айтди.
Шойгу 21 апрель куни Путин билан учрашув чоғида ҳам Мариуполни Россия қўшинлари “назоратга олган”ини маълум қилганди. Ўшанда Путин “Азовсталь” штурмини бекор қилишга ва заводни “пашша ҳам учиб ўтолмайдиган даражада” қамалга олишга буйруқ берган.
Бироқ 3 май куни – “Азовстал”даги тинч аҳолининг бир қисми эвакуация қилинганидан сўнг завод ҳудудини қақшатқич зарбаларга тутиш қайтадан бошлангани айтилди. Мариупол мэри Вадим Бойченко 4 май куни жанглар завод ичкарисида ҳам кетаётганини хабар қилди. Бундан рус ҳарбийлари завод ичкарисига ёриб киргани англашилади. Кремль матбуот котиби Дмитрий Песков Азовсталга ҳужум бўлаётганини рад қилди.
Украина президенти офиси Россия томонининг “Мариуполнинг “Азовстал”дан бошқа бутун ҳудуди назоратга олинган”и ҳақидаги баёнотлари бирмунча бўрттирилган, дея баёнот берди.
Украина разведкаси Мариуполга Путин маъмурияти раҳбари ўринбосари Сергей Кириенко келганини ва 9 май парадани тантанали ўтказишга тайёргарлик кўраётганини иддао қилмоқда
Украинанинг Россия армияси босиб олган Мариупол шаҳрида Москва 9 май куни “ҳарбий парад” ўтказишга тайёргарлик кўрмоқда. Шу муносабат билан бомбардимонлар оқибатида вайрон бўлган шаҳар кўчалари тозаланмоқда ва тартибга келтирилмоқда. Украина Мудофаа вазирлиги разведка бошқармаси 4 май куни мана шундай баёнот тарқатди.
Украина разведкасининг иддао қилишича, 9 май парадини ўтказишга тайёргарлик кўриш мақсадида Мариуполга Россия президенти маъмурияти раҳбари ўринбосари Сергей Кириенко етиб келган.
Россия матбуотининг хабар беришича, Кириенко яқиндагина ўзларини “ДХР” ва “ЛХР” деб атаб олган тан олинмаган сепаратчи ҳудудларнинг кураторлигига тайинланган.
Россия ҳукумати ҳозирда бу хабарни тасдиқламади ва инкор ҳам қилмади. Озодлик радиоси рус хизматининг ёзишича, Россия армияси Мариуполни босиб олганидан сўнг, шаҳардаги “Азовсталь” заводида Украин ҳарбийлари мудофаани давом эттираётганига қарамай, Россия матбуоти Мариуполни Кремль пропагандасининг асосий мавзусига айлантирган.
Мариуполга, жумладан, Кремлнинг асосий пропагандисти Владимир Соловьёв келиб, кўрсатув тайёрлаган.