Зеленский Туркияни рус сайёҳларини қабул қилаётгани учун танқид қилди
Президент Владимир Зеленский Туркияни россиялик сайёҳларни қабул қилаётгани учун танқид қилди. Зеленский Туркиянинг хатти-ҳаракатларини “адолатсиз” деб атади ва турк ҳукуматини ё россиялик сайёҳларни, ёки, агар Украина билан дўстона алоқаларни сақлаб қолмоқчи бўлса – “ҳақиқат”ни танлашга чақирди.
Бугун Туркия президенти Ражаб Эрдўғон Ҳайит намози ортидан қилган чиқишида Украинадаги уруш сайёҳлик мавсумига салбий таъсир этмаслиги кераклигини айтди. Эрдўғонга кўра, Россия президенти Владимир Путин бу борада унга кўмаклашишга ваъда берган.
Шунингдек, Эрдўғон Мариуполдаги тинч аҳоли эвакуациясини ҳамда Украина ва Россиядан ғалла экспортини тезлаштиришни Путин билан муҳокама қилажагини билдирди.
Туркия – россиялик туристлар орасида оммабоп йўналишлардан биридир. Жорий йилда, Евроиттифоқ ўз осмонини Россияга парвозлар учун ёпгани ва россияликларга виза беришни кескин камайтиргани ҳисобига Туркия сайёҳлик йўналиши сифатида янада оммалашиши кутилмоқда. Уруш бошланганидан сўнг қарийб барча хорижий рейсларини бекор қилган “Аэрофлот” ширкати яқинда Туркияга парвозларни қайтадан йўлга қўйишини эълон қилди.
Россия Украинага бостириб кирганидан сўнг Туркия Киевни қўллаб-қувватлашини билдирган бўлсада, Москвага қарши санкцияларга қўшилмади. Қолаверса, Туркия ҳукумати мамлакатга Россиядан туристларни жалб этиш бўйича “йўл харитаси”ни ишлаб чиққан. Дастурда, жумладан, Россияда идора очган турк туроператорларига кредит ажратиш, россиялик сайёҳларни ташиш учун иккита авиаширкат ташкил қилиш каби чора-тадбирлар назарда тутилган.
Чехия президенти Кремлнинг Украинага урушини "телбалик" деб атади
Чехия президенти Милош Земан Кремлнинг Украинага қарши уруш бошлаш қарорини “телбалик” деб атади ва бу хатти-ҳаракатлар Россия учун “сиёсий, иқтисодий ҳалокат ва обрўсига жиддий таъсир” билан якун топишини айтди.
Земаннинг фикрича, Россия президенти Владимир Путин “тинчликка қарши жиноят содир этганки, бу ҳарбий жиноят синонимидир”.
Чехия президентига кўра, Украинага тажовузнинг ягона ижобий томони бор – мазкур уруш Россия армиясининг фавқулодда қудрати ва шайлиги ҳақидаги мавжуд тасаввурларни чиппакка чиқарган.
Милош Земан бу фикрларни якшанба куни Чехиянинг CNN Prima News телеканалига берган интервьюсида айтди. Эътиборли жиҳати, Россия Украинага бостириб киргунга қадар Земан Кремлнинг Европа сиёсатчилари орасидаги асосий иттифоқчиларидан бири саналарди. Эндиликда у Украинадаги вазият таъсирида ўз позициясини ўзгартирганини айтмоқда. Уруш бошланганидан бери у бир неча марта Москва агрессиясини қоралаб чиқди.
Мариуполда СССР байроғини кўтарган пенсионер ҳайкали ўрнатилади
Руслар томонидан деярли ишғол қилинган Мариуполда СССР байроғини кўтариб турган пенсионер аёл ҳайкали ўрнатилади.
Бу ҳақда ўзини “ДХР” деб атовчи айирмачи республика томонидан шаҳар мэри этиб тайинланган Константин Ивашченко маълум қилди.
Аввалроқ “Фонтанка” нашри Санкт Петербург шаҳри кўчаларида пенсионер аёл сурати туширилган юзта билборд пайдо бўлгани ҳақида хабар берган эди.
Журналистлар ушбу плакатлар давлат муассасалари, хусусан вилоят маъмурияти, ФСБ ва ИИВ бошқармалари биноси олдига ўрнатилганини қайд этганлар. Аммо, “Фонтанка” маълумотига кўра, ушбу билбордлар хусусий ташаббус бўлиб, давлат тузилмалари улар учун пул тўламаган.
Апрель ойи охирида интернетда Украина ҳудудида бир кекса аёл Россия аскарлари дея адашиб, украин ҳарбийларини СССР байроғини кўтарганча қаршилагани акс этган видео пайдо бўлган эди. Ролик охирида у қизил байроқни озиқ-овқатга алмашишдан бош тортади, лекин ҳарбийлар унинг қўлидан байроқни тортиб оладилар.
Видео қачон, қаерда ва ким томонидан суратга олингани номаълум. Пенсионер аёлнинг исми ва у ўз тасвиридан Россия пропагандаси фойдаланишига рухсат бериши ёки бермаслиги ҳам аниқ эмас.
Шунга қарамай, кремлпараст ОАВлар қизил байроқ тутган пенсионер аёл тасвирини пропаганда мақсадида кенг қўлламоқда.
Украина 4та портини ёпди
Украина тўрт асосий денгиз портлари устидан назорат Россия кучлари қўлига ўтгани сабабли портлар вақтинча ёпилганини эълон қилди.
2 май куни Украина Қишлоқ хўжалиги вазирлиги берган баёнотида Бердянск, Мариупол, Скадовск ва Херсон денгиз портлари “Украина улар устидан назоратни қайта тикламагунча” ёпилишини маълум қилди.
Бу Россия 24 февралда Украинага асоссиз босқинни бошлаб, денгиз портларини тўсиб қўйган ёки эгаллаб олганидан кейинги Украина томонининг илк расмий баёнотидир.
Президент Владимир Зеленский 2 май куни Қора денгиздаги юк ташиш йўллари Россия назорати остида бўлгани сабабли Украина ўн миллионлаб тонна донни йўқотиши мумкинлигини хабар қилди.
Бирлашган Миллатлар Ташкилоти ва бошқа ташкилотлар Россиянинг Украинага қарши уруши Европа, Осиё ва Африкага жиддий таъсир қиладиган йирик озиқ-овқат инқирозига сабаб бўлиши мумкинлиги ҳақида огоҳлантирди.