Россия нефтига эмбаргода Венгрия истисно бўлиши мумкин
Евроиттифоқ Россия нефтига эмбарго жорий этишда Венгрия учун истисно қилиши мумкин.
Россия нефтига эмбарго қўйиш масаласини муҳокама қилаётган Еврокомиссия Венгрия ҳамда Словакиянинг Россия хомашёсига тобелигини ҳисобга олиб, улар учун истисно қилиши мумкин. Бу ҳақда ЕИ мулозимларига таянган ҳолда Reuters хабар қилмоқда.
Айни пайтда Европа Иттифоқи Россияга қарши олтинчи санкциялар туркумини муҳокама қилмоқда. Унда,жумладан, жорий йил охирида Россиядан келтириладиган хом нефтга эмбарго жорий этиш таклифи ҳам ўрин олган. Таҳлилчилар буни ЕИ томонидан ҳали қўлланмаган энг жиддий чеклов чораларидан бири бўлишини таъкидлашмоқда.
Аммо Венгрия ҳукумати Россия энерготашувчиларига оид санкцияларни кенгайтириш ғоясини, агар бу Венгрияга зарар етказадиган бўлса, дастакламаслигини маълум қилди. Шуни ҳисобга олиб, ЕИ Россия нефтига нисбатан эмбарго жорий этишда Венгрия ҳамда Словакия учун истисно қилиши ёки бошқа нефть таъминотчиларини топиш учун уларга кўпроқ муҳлат бериши мумкин.
Янги санкциялар туркуми лойиҳаси 4 май, чоршанба куни эълон қилиниши кутилмоқда.
Финляндия ширкати “Росатом” билан шартномани бекор қилди
Финляндиянинг Fennovoima ширкати “Ханхикиви-1” атом электр станцияси қурилиши учун “Росатом” билан тузилган шартномани бекор қилганини маълум қилди.
Ширкат сайтидаги хабарномага кўра, АЭС қурилиши бўйича шартнома 2013 йилда имзоланган. Станцияни Пюхяйоки туманида қуриш режаланган эди. АЭС қурилишига доир шартнома билан бирга, бўлғуси станция учун 10 йил давомида 450 млн евролик ёқилғи етказиб бериш тўғрисида “ТВЭЛ” ширкати билан ҳам битим тузилган эди.
Iltalehti газетаси хабар қилишича, 12 май куни Финляндия НАТОга аъзо бўлиш хусусида қарор қабул қилади. Қўшни Швецияда ҳам НАТОга интилиш кучайгани кузатилмоқда.
Россияда 1 май акцияларида 200 дан зиёд киши қўлга олинди
“ОВД-Инфо” хабарига кўра, Россиянинг 18 шаҳрида 1 май акцияларида ушланганларнинг аксари Москва ҳамда Санкт-Петербург ҳиссасига тўғри келади – ҳар бир шаҳарда тахминан 80 кишидан қўлга олинган. Уларнинг бир қисми 2 май, душанба куни эрталабга қадар полиция бўлимларида тутиб турилгани айтилмоқда.
Одамлар урушга қарши чақириқлар билан яккалик пикетларга чиққанлар.
Петербургда “Новая газета” журналистлари Алена Лукьянова ҳамда Андрей Душутин ўз картиналари билан мунтазам равишда пикетларга чиқадиган рассом Елена Осипованинг урушга қарши акциясини тасвирга олишаётган пайтда ушланган.
Петербургда, шунингдек, инсталляция ташкил қилган Анна Анисимова ҳам қўлга олинган. Анисимова экранида Кремль пропагандачиси Владимир Соловьёв акс этган телевизорга ўзини боғлаб қўйган.
Новосибирск ва Екатеринбургда бир неча ўн киши ушланган. Бундан ташқари, Нижний Новгород, Киров, Пермь, Ярославль ва бошқа шаҳарларда ҳам биринчи май акциялари иштирокчилари қўлга олингани ҳақида хабарлар бор.
Украина русларнинг 2та патруль кемасини йўқ қилди
Бугун Украина Ҳарбий-денгиз кучлари учувчисиз учқич Қора денгизда Россиянинг тезюрар патруль кемасини нишонга олгани айтилган видеони эълон қилди.
Украина ҳарбий қўмондонлиги бу 2 май, душанба куни минтақада Украинанинг “Байрактар” учувчисиз дронлари томонидан йўқ қилинган Россиянинг “Raptor” синфидаги иккита патруль кемасидан бири эканлигини хабар қилди.
Бу даъвога Москва ҳеч қандай муносабат билдиргани йўқ.