тел: +420 2 2112 3387 mobile:+420 605 562 270 (шошилинч хабарлар) twitter: khurmatb skype: khurmatskype facebook:Khurmat Babadjanov
Ироқда хокимият 30 июнда ироқликларга топширилишини кўзда тутувчи резолюция лойиҳаси атрофидаги мухокамалар БМТ Хавфсизлик Кенгашида давом этмоқда. Сешанба куни Ироқда Муваққат Ҳукуматнинг тасдиқлангани эса ушбу мухокамаларни янада жонлантирди. АҚШ ва Британия БМТ Хавфсизлик Кенгашига Ироққа суверенитет бериш жараёни аниқроқ ифодасини топган резолюция лойиҳасини тақдим этди. Бироқ, Хавсизлик Кенгашига аъзо айрим давлатлар вакиллари резолюция лойиҳаси Ироқ Муваққат Ҳукумати билан маслахатлашилиши керак, деган фикрдалар.
Америка томонидан тузилган Ироқ Бошқарув Кенгаши фаолиятини белгиланган муддатдан бир ой олдин тўхтатиб, ўз ваколатини Ироқнинг янги муваққат ҳукуматига топширди. Ғози Машал ал Явар бошлиқ янги муваққат ҳукумат сешанба куни қасамёдга келтирилди. "Биз ироқликлар, жаҳоннинг бошқа халқлари қатори оккупация остида бўлишни хоҳламаймиз. Айни пайтда, террорчилик хавфига қарши, барқарорлигимизни, тинчлигимизни кўролмаётган Ироқ душманларига қарши биргаликда курашамиз ва бунда халқаро кучлар ёрдамларига таянамиз", - деди Ғози Машал Явар. Америка томони Ироқ Президенти лавозимида Аднон Пачачини кўришни хоҳлаётган эди. Ироқ Бошқарув Кенгаши эса АҚШ таклифига қарши чиқиб, Явар номзодини қўллаб-қувватлади. Давомли тортишувлардан сўнг, деярли президентликка тайнланган 81 яшар Аднан Пачачи бу лавозимдан воз кечди ва Ироқ Бошқарув Кенгаши рахбари бўлган Ғози Машал ал Явар номзоди тасдиқланди.
Маркази Парижда жойлашган Жаҳон Газеталар Уюшмаси бу йилги “Озодликнинг Олтин Қалами” мукофотини ўзбекистонлик мустаӄил журналист ва инсон ҳуқуқлари ҳимоячиси Руслан Шариповга беришга ӄарор ӄилди. Ташкилотнинг душанба куни Истамбулда очилган 57-анжуманида ушбу мукофотни тантанали топшириш маросими бўлди. Аммо, Ўзбекистонда тўрт йилга озодликдан махрум этилган ва ҳозирда уй қамоғида бўлган Шарипов маросимга кела олмаган. Ўзбекистонлик мустақил журналист Истамбулдаги анжуманга келолмагани боис, унинг вакили - инсон ҳуқуқлари ҳимоячиси Елена Урлаева мукофотни қабул қилиб олди.
Ёз яқинлашаётган сайин, кўплаб мамлакатлардаги каби АҚШда ҳам одамлар таътилни режалаштиряптилар. Аммо бу йил америкаликларни оромгоҳларга бориб дам олиш ёки қариндошларини зиёрат қилишдан кўра, кўпроқ террорчилик хавфи ўйлантираяётган бўлса ажаб эмас. Чорашанба куни АҚШ хавфсизлик идоралари расмийлари Ал Қайда Қўшма Штатларга қарши ҳужум ҳозирлаётгани ҳақида разведка маълумотлари мавжудлиги ҳақида баёнот бердилар.
Британияда 21 йил аввал музлатилган сперматазоидлардан бола дунёга келди. Бу амалиётни ўтказган Манчестер касалхонаси врачлари ушбу ҳодисани тиббиёт сохасидаги мисли кўрилмаган янгилик сифатида таърифламоқдалар. Айни пайтда, бундай йўл билан болани дунёга келтириш этик ва диний жиҳатдан нотўғри, дегувчилар ҳам бор.
Сешанба куни "Freedom House" ("Озодлик Уйи") ташкилоти ўтиш давридаги собиқ коммунистик давлатларда демократик жараёнлар қандай кечаётганига оид навбатдаги йиллик ҳисоботини эълон қилди. Мазкур ҳисоботда ташкилот 2004 йили Шарқий Европа ва собиқ Совет республикаларида демократик ислоҳотлар қандай олиб борилаётганини таҳлил этади.
Сешанба куни АҚШ Президенти Жорж Буш Ироқда хокимият ироқликлар қўлига ўтганидан кейин бу мамлакатни ким ва қай тарзда бошқариси борасидаги ўз қарашларини ифода этди. Ўз чиқишида Буш Ироқ 30 июн куни ўз суверенитетига эга бўлишини, аммо мамлакатдаги вазият барқарорлашмагунча АҚШ кучлари у ерда қолишини таъкидлади. Айни пайтда, БМТ Хавфсизлик Кенгашида Ироқ суверенитети ҳамда халқаро коалиция кучлари мақомини белгиловчи резолюция лойиҳаси мухокама қилинмоқда.
Америкалик кинодокументалист ва режиссер Майкл Мурнинг "Фаренгейт бўйича 9/11" филми Канн фестивалининг "Олтин Палма" мукофотига сазовор бўлди.
Бағдодда ироқлик махбусларни қийнаганликда айбланаётган Америка ҳарбийлари устидан биринчи маҳкама жараёни бошланди. АҚШ Ҳарбий трибунали "Абу Ғрайб" қамоқхонасида махбусларни қийнаганлик ва тахқирлаганликда айбланаётган етти Америка ҳарбийсидан бири бўлган Жереми Сивитсни айбдор деб топди. Чоршанба куни бошланган маҳкама жараёнида Сивитс билан бирга яна уч америка аскари кўрсатмалари тингланди. Асли касби механик бўлган Жереми Сивитс ўзи айбига иқрор бўлди. Аммо қолган судланувчилар уларга қўйилаётган айбловларни на инкор инкор этганлар ва тан олганлар.
Душанба куни Бағдод ғарбидаги Америка ҳарбий базаси яқинида кучли портлаш рўй берди. Сўнгги маълумотларга кўра, ушбу портлаш оқибатида етти киши, шу жумладан Ироқ Бошқарув Кенгаши раҳбари Абдул Заҳро Усмон ҳам ҳалок бўлган. Изаддин Салим номи билан танилган бу шахс Бошқарув Кенгашида "Даъва Ислом Ҳаракати" номли шиа гуруҳларини ҳам тамсил этган.
Франциянинг Канн шаҳрида 57инчи бор ўтказилаётган кинофестивали очилди. 18 кино асари фестивалнинг "Олтин Палма Бошоғи" совринига даъвогарлик қилмоқда.
12 май куни Франциянинг Канн шаҳрида 57инчи бор ўтказилаётган кинофестивал очилди. 18 кино асари фестивалнинг "Олтин Палма" совринига даъвогарлик қилмоқда.
Америка аскарлари ироқлик махбусларни қийноққа солаётгани ва таҳқирлаётгани акс этган фотосуратларнинг матбуотда пайдо бўлиши Пентагон раҳбариятини анча мураккаб вазиятга қўйди. Бу ҳодиса туфайли АҚШ Конгрессидаги айрим демократлар Мудофаа Вазири Доналд Рамсфелд истеъфосини талаб эта бошладилар. Хусусан, конгрессмен Чарлз Рэнгел агар Буш Рамсфелдни лавозимидан четлаштирмаса, Конгресс Президентнинг ўзини импичмент қилиши керак, деган фикрни билдирди.
Бу йилги ёзги Олимпиада Греция пойтахти Афина шаҳрида 13-29 август кунлари бўлиб ўтади. Шаҳарнинг турли нуқталарида ушбу мусобақаларга тайёргарлик ишлари жадал суратларда олиб борилмоқда. Спорт мажмуаларини қуриш ишлари тўқсон фоиз бажарилган. Олимпия ўйинларининг тантанали очилиши бўлиб ўтадиган Афинадаги асосий ўйингоҳ устига 18 минг тонна келадиган томни ётқизиш ишлари шу хафта оҳирига режалаштирилган.
Америка ҳарбийлари ироқлик махбусларга қўпол муносабатда бўлиб, уларни ҳар хил йўллар билан қийноққа солаётгани акс этган фотосуратлар дунё жамоатчилигининг қаттиқ ғазабига учради. Олдинига Американинг "CBS" телеканали, кейин эса Британияда чиқадиган "Daily Mirror" газетаси сахифаларида пайдо бўлган бу фотосуратлардаги холат АҚШ, Британия ва Яқин Шарқ сиёсий доираларида кескин акс садо бера бошлади.
Ливия рахбари Муаммар Қаддафий сўнгги 15 йил ичида илк бор Европага сафар қилмоқда. Сешанба куни Полковник Қаддафий Брюссел шаҳрида Европа Комиссияси Президенти Романо Проди билан учрашди.
АҚШ кучлари Ироқнинг Фаллужа шаҳрида панох топган исёнчи гуруҳларга қарши режалаган кенг миқёсли ҳарбий амалиётларни қолдирган бўлса-да, душанба куни шаҳар атрофларида урушаётган томонлар ўртасида тўқнашув, отишмалар рўй берди. Маълумотларга кўра, Фаллужадаги отишмаларда саккиз қуролли исёнчи отиб ўлдирилган, тўрт америка аскари яраланган.
Бирлашган Миллатлар Ташкилоти, Европа Иттифоқи ва бир қатор бошқа халқаро тузилмалар қиприс-грек жамоасининг Қиприс оролини бирлаштириш бўйича Кофи Аннан режасига қарши овоз берганидан афсусланиш изҳор этдилар. Шанба кунги референдумда қатнашган Қиприсдаги грек жамоасининг 75 фоизи оролнинг БМТ режаси доирасида бирлашишишига қарши овоз берди. Ўз навбатида референдумда қатнашган қибрислик туркларнинг 65 фоизи режани мақуллаган.
Ўтган ҳафта АҚШ раҳбари Жорж Буш Ғазо секторида ерлаштирилган етти мингга яқин яҳудийни кўчириш, Ғарбий соҳилдаги юз мингга яқин яҳудий аҳолисини эса сақлаб қолиш бўйича Исроил Бош вазири Ариэл Шарон олға сурган режани қўллаб-қувватлаган эди. Бу эса кўплаб араб мамлакатлари қатори Вашингтоннинг Европадаги иттифоқчилари эътирозларига сабаб бўлмоқда. БМТ Бош Котиби Кофи Аннан Оқ уй раҳбарининг Исроил режасини қўллаб-қувватловчи позициясини танқид остига олиб, Яқин Шарқ можаросини ҳал этишга қаратилган ҳар қандай режа БМТ Хавфсизлик Кенгаши резолюцияларига асосланиши кераклигини урғулади. Миср, Германия ва Франция раҳбарлари эса аввалги "Йўл харитаси" деб аталган тинчлик режаси ўз кучида қолиши лозимлигини таъкидламоқдалар. Шарон-Буш учрашувидан сал ўтиб Ғазо минтақасида Ҳамас сиёсий лидери Абдул Азиз Рантисининг ўлдирилиши эса, бу эътирозларни янада кучайтирди.
Ўзбекистон Очиқ жамият институти кўмак жамғармаси ўтган хафта Республика Адлия вазирлигидан рўйхатдан ўтишга рад жавоби олгач ўз фаолиятини тўхтатди. Таниқли америкалик молиячи ва филантроп Жорж Сорос тарафидан молияланадиган Очиқ жамият институтлари дунёнинг 30дан ортиқ мамлакатида фаолият олиб боради. Якшанба куни Жорж Сорос Лондонда Европа Тикланиш ва Тараққиёт Банки йиғилишида Ўзбекистондаги фаолиятини тўхтатганини эълон қилар экан, Тошкент ҳукуматини фуқаро эркинликларини топтаётганликда айблади.
Давомини ўқинг
