Ғазо бўлгасида уруш бошланганидан бери камида 50 журналист ҳалок бўлди
Ғазо бўлгасида ҲАМАС-Исроил уруши бошланган 7 ноябрдан бери камида 50 журналист ҳалок бўлди. ҲАМАС АҚШ ва ЕИда террорчи ташкилот сифатида тан олинган.
Журналистларни ҳимоя қилиш қўмитасининг билдиришича, ҳалок бўлганларнинг 45 нафари фаластинлик, тўрт нафари исроиллик ва бир нафари ливанликдир. Бундан ташқари уч нафар журналист бедарак, 11 нафари яраланган, 18 нафари ҳибсга олинган.
Ташкилотга кўра, уруш бошланганидан бери журналистларга ҳужумлар кўпайган. ОАВга таҳдидлар сони ортгани ва цензура кучайтирилгани қайд этилган.
Бир ой олдин Журналистларни ҳимоя қилиш қўмитаси Ғазода 22 мухбир ҳалок бўлгани тўғрисида маълум қилган эди. Бир қанча оммавий ахборот воситалари, жумладан, BBC, Al Jazeera, RT Arabic, Al-Araby TV ва бошқалар Исроил Ғазо бўлгаси ва Ғарбий Соҳилда журналистик фаолиятга тўсқинлик қилаётганидан арзланган.
Исроил ва ҲАМАС вақтинчалик оташкесимга келишди
Исроил бош вазири Бинямин Нетаняҳу 22 ноябрнинг эрта тонгида Ғазода камида тўрт кунлик оташкесим бўлишини эълон қилди. Бу даврда АҚШ ва Европа Иттифоқи томонидан террорчи ташкилогт сифатида тан олинган ҲАМАС 7 октябрда Исроилга қилган ҳужумида гаровга олган 200 дан кўпроқ кишининг 50 нафарини озод қилиш мажбуриятини олди.
WhatsUp мессенжерида тарқатилган расмий хабарда Исроил ҳукумати ҲАМАС гаровга олганларнинг барчасининг озод этилишига эришиш ниятида қатъий экани билдирилган.
«Ҳукумат бу мақсадга эришиш режасининг биринчи босқичини маъқуллади. Ўғирланганлардан камида 50 нафари – аёллар ва болалар – тўрт кун ичида озод этилади. Бу вақт мобайнида ҳарбий ҳаракатлар тўхтатилади», - дейилади расмий хабарда.
Иккинчи босқичда эса бир кунлик оташкесим эълон қилинади ва 10 киши гаровдан озод этилади.
ҲАМАС ва музокарада воситачи бўлган Қатар вакиллари Исроил ҳукуматининг бу баёнотига ҳозирча муносабат билдирмади.
Оташкесим 23 ноябрдан кучга кириши мумкин. Чунки Исроил суд органлари мазкур қарорнинг қонунийлигини тасдиқлаши шарт.
New York Times газетасининг Исроил ҳукуматидаги манбаларга таяниб ёзишича, ҲАМАС 50 нафар кишини озод қилиши эвазига Исроил қамоқлардан 150 нафар фаластинликни чиқаради.
Оташкесим пайтида Исроил ҳарбийлари Ғазода эгаллаган позицияларида қолади, Ғазо шимолини тарк этганлар уйларига қайтиш имкониятига эга бўлмайди.
Боррель: Фаластин давлатининг ташкил этилиши Исроил хавфсизлигини таъминлайди
Европа Иттифоқи ташқи ишлар мутасаддиси Жозеп Боррель Фаластин давлатининг ташкил этилишини Исроил хавфсизлиги таъминланишининг энг асосий омилларидан бири деб ҳисоблайди.
Боррель бу ҳақда 20 ноябрь куни ЕИга аъзо 27 давлат ташқи ишлар вазирлари билан ўтган видеоучрашувда гапирди. У вазирларга ҲАМАС-Исроил уруши юзасидан музокаралар ўтказиш учун Яқин Шарққа қилган сафари юзасидан ҳисобот берди. ҲАМАС АҚШ ва ЕИда террорчи ташкилот сифатида тан олинган.
Боррелга кўра, у Яқин Шарқда ўтказган музокаралар натижасида “фундаментал сиёсий хулоса”га келган.
“Мен ўйлайманки, Исроил хавфсизлигининг энг яхши кафолати Фаластин давлатининг ташкил этилишидир”, - деди у.
Боррель Исроил Ғазони оккпуация қилмаслиги ва бўлгани Фаластин мухторияти назоратига ўтказиб бериши шарт, деб ҳисоблайди.
Бундан олдинроқ Қўшма Штатлар президенти Жо Байден The Washington Post газетасига ёзган мақоласида ҳам бу мавзуни кўтарган эди.
Байден мақоласида Фаластин халқи ўз давлатига эга бўлиш ҳуқуқига эга эканини таъкидлади ва Ғазода тинч аҳоли, жумладан, болалар ҳалок бўлганидан чуқур қайғуда эканини билдирди. У ҲАМАСни тинч аҳолини тирик қалқон сифатида қўллаганликда айблади.
АҚШ президентига кўра, ҲАМАСнинг йўқ қилиниши ва мустақил Фаластин давлатининг ташкил этилиши Яқин Шарқда тинчлик ўрнатишнинг асосий шартидир.
Байден: Биз Путин ва ҲАМАС олдида чекинмаймиз
АҚШ президенти Жо Байден The Washington Post газетасида эълон қилинган мақоласида Россия президенти Владимир Путин билан Фаластиннинг АҚШ ва Европа иттифоқида террорчи ташкилот деб топилган ҲАМАС гуруҳи хатти-ҳаракатларини таққослар экан, уларнинг Украина ва Исроилга қарши кураш услублари ва мақсадлари ўхшашлигини урғулади.
Байден ҲАМАСнинг “топ-тоза ёвузликлари”ни ва Путиннинг Украинага қарши “тажовуз”ини қайд этаркан, жаҳон ҳамжамияти уларни тўхтата оладими ёки йўқ, дея савол қўяди.
“Путин ҳам, ҲАМАС ҳам қўшни демократик давлатларни дунё харитасидан ўчириб ташлашга интилишмоқда. Путин ҳам, ҲАМАС ҳам минтақавий барқарорлик ва интеграция инқирозига умид қилишяпти, хаос тарқатиш ҳисобига устунликка эришишмоқчи”, деб ёзади Байден ва Америка “бундай бўлишига изн бера олмайди, изн бермайди ҳам”, дея таъкидлайди.
Айни чоғда, Оқ уй раҳбарига кўра, дунё олдиндаги бир неча ўн йиллик истиқболни белгиловчи танлов қаршисида турибди.
Байденнинг фикрича, Путин ва ҲАМАСнинг уруш чорловини қабул қилиш ва уларнинг ўз режаларини амалга оширишига йўл қўймаслик лозим.