Исроил Ғазо марказига кирганини эълон қилди
Исроил ҳарбийлари ҲАМАС радикал гуруҳининг асосий базалари жойлашган Ғазо шаҳри марказига кирганини маълум қилди. ҲАМАС эса Исроил катта йўқотишларга учраганини билдирди.
Кеча ҲАМАС қуролли қаноти Ғазо шаҳридаги шиддатли кўча жанглари акс этган видеони эълон қилди.
Эрон томонидан қўллаб-қувватланадиган ҲАМАС ва «Исломий жиҳод» жангари гуруҳи манбаларига кўра, Исроил танклари ер ости туннелларида ҲАМАС жангчиларининг пистирмаларига ва қаттиқ қаршиликларига дуч келган.
Озодлик уруш шароитида томонлар тақдим қилаётган маълумотларни тезкор текшириш имконига эга эмас.
Ғазода оташкесим бўйича музокара бўлган
ҲАМАС радикал гуруҳи томонидан гаровга олинган ўн чоғли кишини озод этиш эвазига Ғазо секторида уч кунлик гуманитар оташкесимга эришиш бўйича музокаралар олиб борилгани маълум бўлди.
Бу нозик дипломатик музокара ҳақида исмини ошкор этмаслик шарти билан БМТ расмийси ва бир Ғарб дипломати гапирган.
Келишувга эришилса, қамалда қолган 2,3 миллион фаластинлик учун қўшимча ёрдам, жумладан, чекланган миқдорда ёқилғи етказиш имкони пайдо бўларди.
Расмийлар ва дипломатнинг айтишича, музокарага Қатар, Миср ва АҚШ воситачилик қилган.
Исроил 8 ноябрда Ғазо шимолини 50 минг киши тарк этганини билдирди
Исроил армияси расмий вакили Даниэль Хагари Ғазо шимолини 8 ноябрь куни 50 минг тинч аҳоли тарк этгани тўғрисида маълум қилди. Улар гуманитар йўлак орқали Ғазо жанубига ўтган.
Расмийнинг айтишича, ғазоликлар “бўлга жануби нисбатан бехатар эканини тушунган ҳолда” шимолни тарк этмоқда. Хагари ҲАМАС бўлга шимолида назоратни қўлдан чиқарганини ҳам иддао қилди. Бироқ ҲАМАС бу иддаони рад этди.
БМТ ҳозирча 8 ноябрь куни Ғазо шимолидан жанубга қочганлар сони тўғрисида маълумот бермади. 7 ноябрда Ғазодан 15 минг киши чиқиб кетгани айтилган эди.
Исроил армияси Ғазо шаҳрини қамал қилиб, бўлга шимолини жанубдан ажратиб қўйган. Шундан сўнг Исроил тинч аҳоли жанубга ўта олишини таъминлаш мақсадида гуманитар йўлак ташкил қилган. Исроил ҳукумати тинч аҳолини ҲАМАСга қарши ҳарбий амалиёт якунлангунига қадар шаҳарни тарк этишга чақириб келмоқда.
Исроил ҳукумати расмий вакили Эйлон Леви Ғазо шаҳрида яна юз минг аҳоли қолаётгани тўғрисида билдирди.
Қатор мамлакатларда, жумладан, АҚШда террор ташкилоти сифатида эътироф этилган ҲАМАС БМТнинг фаластинлик қочқинлар бўйича агентлигини Ғазо шимолидаги аҳолини жанубга кўчириш масаласида Исроилга кўмаклашаётганликда айблади. ҲАМАСга кўра, бу гуманитар инқироздир.
Айни пайтда ҲАМАС расмийлари Ғазо бўлгаси аҳолиси хавфсизлигини таъминлаш мажбуриятига эга эмасликларини бир неча бор билдирганлар. ҲАМАС сиёсий бюроси аъзоси Ҳалил ал Ҳайё The New York Times газетасига берган интервьюсида: “ҲАМАСнинг мақсади Ғазони бошқариш, уни сув, иссиқлик, ёнилғи ва бошқа нарсалар билан таъминлаш эмас, балки Фаластин масаласи диққат марказида бўлиши учун дунёни уйқудан уйғотишдир”, - деб айтди.
Аввалроқ ҲАМАС сиёсий бюросининг яна бир аъзоси Муса Абу Марзук RT мухбири саволига: “ҲАМАСнинг ер ости туннеллари ҲАМАС жангчилари учундир, тинч аҳолини ҳимоя қилиш билан эса БМТ шуғулланиши даркор”, деб жавоб қайтарган.
“Катта еттилик” Ғазо сектори бўйича илк бор ягона позициясини умумий ҳужжатда акс эттирди
“Катта еттилик”ка кирувчи мамлакатлар Исроил ва Фаластиндаги ҲАМАС радикал гуруҳи ўртасида Ғазо секторида кечаётган уруш бўйича ягона позицияларини илк бор умумий ҳужжатда акс эттиришган. Бу ҳақда Япония ташқи ишлар вазири Ёко Камикава G7 мамлакатлари ТИВ раҳбарларининг 7-8 ноябрь кунлари Токиода ўтган учрашувидан сўнг маълум қилди.
G7 давлатлари ҲАМАСнинг 7 октябрь куни Исроилга уюштирган ҳужумини қоралашган, ўзаро урушаётган томонларни халқаро меъёрларга риоя қилишга ҳамда гуманитар ёрдам етказишни таъминлаш учун ўт очишни тўхтатишга чақиришган.
“Шундай қилиш лозимки, уруш янада каттароқ ҳудудга тарқалмасин. Мамлакатлар Ғазо муаммоларини ҳал қилишни таъминлаш ва узоқ муддатли тинчликка эришиш учун ягона йўл икки давлатлик тизим экани ҳақида ягона фикрга келдилар”, деган Камикава.
Вазирлар Эронни ҳам ҲАМАС ва Ливандаги “Ҳизбуллоҳ” гуруҳларини дастаклашдан тийилишга чақиришган. Уларга кўра, бу каби ҳаракатлар Яқин Шарқдаги вазиятни янада беқарорлаштиради.