АҚШ Сенатидаги демократлар Украинасиз Исроилга ёрдам тўғрисидаги қонун лойиҳасини блоклаб қўйишди
АҚШ Сенатидаги демократлар 7 ноябрь куни Исроилга ҳарбий ёрдам кўрсатишни кўзда тутган, бироқ Украина ёрдам пакетини ўз ичига олмаган қонун лойиҳасини блоклаб қўйишди, дея хабар қилди “Америка овози”. Аввалроқ АҚШ президенти Жо Байден мазкур ҳужжатга вето қўйишини билдирган эди.
Қонун лойиҳаси ўтган ҳафтада АҚШ Конгресси Вакиллар палатаси томонидан маъқулланган. Палатада кўпчиликни ташкил қилувчи республикачилар ҳужжатни ёқлаб овоз беришган. Лойиҳага мувофиқ, Вашингтон солиқ хизматини молиялаштиришни қисқартирган ҳолда Исроилга 14,3 миллиард долларлик ёрдам тақдим этиши керак эди.
Октябрь ойида АҚШ президенти Жо Байден Конгрессдан Исроил, Украина ва Тайванни молиялаштиришни ўз ичига олган 106 миллиард долларлик фавқулодда харажатлар пакетини тасдиқлаб беришни сўраган эди. Сешанба куни Сенатдаги демократлар мазкур ташаббусда кўзда тутилган Украинага ёрдам пакетининг муҳимлигини урғулашган.
Сенатнинг ажратмалар бўйича қўмитаси раҳбари Пэтти Мюррей ёрдам пакети АҚШнинг Исроилдаги иттифоқчилари учун қанчалик зарур бўлса, Украинадаги иттифоқчилари учун ҳам шу қадар зарурлигини таъкидлаган. Республикачи сенатор Рожер Маршалл эса юқори палата Исроилга ёрдамни кечиктирмаслиги лозимлигини билдирган.
БМТ бош котиби: Ғазо сектори болалар қабристонига айланиб бормоқда
БМТ бош котиби Антониу Гутерриш яна Исроилнинг Ғазо секторидаги хатти-ҳаракатларини кескин танқид қилиб чиқди ҳамда тинч аҳолига инсонпарварлик ёрдами етказиш учун ўт очишни зудлик билан тўхтатишни талаб қилди.
БМТ бош котиби фикрича, Исроил урушни одамгарчилик билан юритиш бўйича халқаро таомилни очиб бузмоқда. Унга кўра, Исроилнинг ҲАМАСга қарши урушида фуқаровий аҳолининг ҳимоя қилиниши “биринчи галдаги мақсад бўлиши лозим”.
“Исроил фуқаровий аҳолини бомбалаб, ўлдиришда, касалхоналарни, қочқинлар лагерларини, масжидларни, черковларни ҳамда бомбапаноҳлар дохил фуқаровий инфратузилмани вайрон қилишда давом этяпти. Ғазо болалар қабристонига айланиб бормоқда”, дея билдирган Гутерриш.
Исроил ташқи ишлар вазири Эли Коэн Гутерришнинг Ғазо сектори “болалар қабристони”га айланиб бораётганига оид сўзларига кескин муносабат билдирди. “Уялмайсанми, Антониу Гутерриш! Ичида тўққиз ойлик чақалоқ ва бошқа гўдаклар бўлган, ота-оналари кўз ўнгида совуққонлик билан ўлдирилган 30 дан зиёд бола ўз ихтиёрига қарши Ғазо секторида тутиб турилибди”, деб ёзган Коэн Х ижтимоий тармоғидаги ўз саҳифасида.
Бу орада БМТнинг энг йирик гуманитар агентликлари ҳамда Жаҳон соғлиқни сақлаш ташкилоти қўшма баёнот билан чиқишиб, Ғазо секторида гуманитар мақсадлар учун зудлик билан ўт очишни тўхтатишга чақиришган.
Орасида БМТ бош котиби ўринбосари Мартин Гриффитс, БМТ Инсон ҳуқуқлари бўйича олий комиссари (OHCHR) Фолькер Тюрк, Миграция бўйича халқаро ташкилот (IOM) директори Эми Поуп, БМТ Болалар жамғармаси (UNICEF) ижрочи директори Кэтрин Рассел, ЖССТ раҳбари Тедрос Аданом Гебреисус ва бошқалар бўлган баёнот муаллифлари тўқнашувнинг барча томонларини “халқаро гуманитар ҳуқуқ ва инсон ҳуқуқлари соҳасидаги меъёрларга мувофиқ ўз мажбуриятларига риоя қилиш”га чақиришларини урғулашган.
Айни пайтда БМТнинг Яқин Шарқдаги фаластинлик қочқинларга ёрдам кўрсатиш агентлиги (UNRWA) сўнгги икки кун ичида UNRWA’нинг беш нафар ходими ҳалок бўлганини билдирган. “7 октябрдан буён умумий ҳисобда 79 нафар ходим ҳалок бўлиб, камида 24 ходим жароҳатланган”, дея қайд этишган агентликдан. Уруш чоғида жами БМТнинг 88 нафар ходими ҳалок бўлган – халқаро ташкилот тарихида битта урушда бунча ходим ҳеч қачон ўлган эмас.
ҲАМАС назорати остидаги Ғазо сектори Соғлиқни сақлаш вазирлиги тарқатган сўнгги маълумотларга кўра, сектор ҳудудида 10 мингдан зиёд одам ўлган, уларнинг 4800 нафардан зиёди болалардир. Бу рақамларни мустақил манбалар томонидан тасдиқлатишнинг имкони йўқ.
Исроил томони урушда 1400 дан зиёд одам йўқотган. 241 нафар исроиллик жиҳодчилар томонидан асоратда ушлаб турилибди.
Қирғизистон Мусулмонлар идораси Фаластинга жиҳодга бориш чақириқлари шариатга мувофиқ эмаслигини билдирди
Қирғизистон Мусулмонлар идораси уламолар кенгаши Ғазо секторидаги воқеалар муносабати билан ижтимоий тармоқларда ёйинланаётган турли чақириқлар юзасидан баёнот тарқатди, дея хабар қилди Озодликнинг қирғиз хизмати.
Қайд этилишича, мазкур чақириқлар олимлар томонидан ўрганиб чиқилган.
“Натижада биз диндош биродарларимиз ва опа-сингилларимизга берадиган ёрдамимиз маънавий ва моддий бўлиши керак, деган хулосага келдик. Шунинг учун биз руҳий туғёнга берилиб, якка тартибда ёки уюшган гуруҳлар билан жиҳод мақсадида Фаластинга бориш шариатга мувофиқ эмас, деб ҳисоблаймиз”, дейилган ҚМИ баёнотида.
Шу билан бирга, Қирғизистон Мусулмонлар идораси Исроилнинг Ғазодаги хатти-ҳаракатини қоралаб чиққан.
Аввалроқ Қирғизистон Миллий хавфсизлик давлат қўмитаси Исроил ва ҲАМАС ўртасидаги уруш муносабати билан провокацион баёнотлар берилаётгани юзасидан огоҳлантириш тарқатган эди. Махсус хизмат хорижий давлат ҳудудидаги қуролли тўқнашувларда иштирок этганлик ёки террористик тайёргарликдан ўтганлик учун мамлакат қонунчилигида жиноий жавобгарлик кўзда тутилганини эслатган.
Жорий йилнинг 7 октябрь куни ҲАМАС радикал гуруҳи Исроил жанубига ҳужум уюштиргани оқибатида 1400 дан зиёд исроиллик ҳалок бўлган. Исроил ҲАМАСни буткул йўқ қилиш мақсадида уруш бошлаганини эълон қилган. ҲАМАС назорати остидаги Ғазо сектори Соғлиқни сақлаш вазирлиги маълумотига кўра, ўтган бир ой ичида секторда 10 минг нафардан зиёд фаластинлик ҳаётдан кўз юмган.
Миср “Рафаҳ” пунктини Ғазодан чекланган эвакуация учун қайта очди
Миср Чегара хизмати Ғазо сектори билан чегарадаги “Рафаҳ” назорат-ўтказиш пунктини қайта очишини эълон қилди. Бу ердан Миср, аввалда бўлгани каби, мамлакатга фақат бошқа давлатлар фуқаролигига эга бўлган фаластинликларни ҳамда олдин тузилган рўйхатга киритилганларнигина ўтказмоқчи. Шунингдек, Миср расмийлари оғир ярадор бўлганларни ҳам қабул қилишга тайёр эканларини билдиришган.
Исроил армияси якшанба оқшомида Ғазо шаҳри тўлалигича ўраб олинганини маълум қилган. ЦАХАЛ бу ерда блокпост ўрнатган, у орқали шаҳардаги тинч аҳоли вакиллари сектор жанубига чиқиб кетишлари мумкинлиги айтилган. Интернет тармоғида Ғазода яшовчилар бу йўлак орқали жанубга йўл олганлари акс этган видеолар тарқалмоқда.
ҲАМАС назорати остидаги Ғазо сектори Соғлиқни сақлаш вазирлиги душанба куни тўқнашув бошланган 7 октябрдан буён исроилликлар ўқига учганлар сони 10 мингдан ошиб кетгани, уларнинг тўрт минг нафардан кўпроғи болалар экани ҳақида баёнот тарқатди. Бу рақамларни мустақил равишда тасдиқлашнинг имкони йўқ. БМТ яна бир бор ҳар иккала томонни зудлик билан ўт очишни тўхтатишга чақирган.