Тошкентда Фаластинни қўллаб митинг ўтказмоқчи бўлганлардан камида уч нафари 15 суткага қамалди
Тошкентда 29 октябрда Фаластинни қўллаш мақсадида Амир Темур хиёбонига йиғилганлардан камида уч нафари 15 суткага қамалди. «Газета.uz» “жиноят ишлари бўйича Шайхонтоҳур туман суди қарорлари ўрганиб чиқилганидан сўнг” бу ҳолат маълум бўлгани тўғрисида билдирди.
30 октябрда қабул қилинган суд қарорларида қайд этилишича, Тошкент вилояти Охангарон туманида яшовчи 2001 йилда туғилган Ф. О., ва Б. И., Қашқадарё вилояти Косон туманида яшовчи 1997 йилда туғилган М. Х., Маъмурий жавобгарлик кодексининг 194-моддаси (ички ишлар органи ходимининг қонуний талабларини бажармаслик) ва 201-моддаси 1-банди (йиғилишлар, митинглар, кўча юришлари ёки намойишларни уюштириш ва ўтказиш тартибини бузиш) билан айбдор деб топилган.
Аввалроқ Озодлик Ўзбекистон парламентининг собиқ депутати Расул Кушербаевнинг телеграм каналига таянган ҳолда, Тошкентда 29 октябрь куни Амир Темур хиёбонига Фаластинни қўллаб-қувватлаш учун митинг ўтказиш ниятида йиғилган юздан кўпроқ киши ички ишлар ходимлари томонидан қўлга олингани ҳақида хабар берган эди.
“Билдирилишича, 100 дан ортиқ одам йиғилган. Ҳуқуқ-тартибот идоралари режалаштирилган йиғилишдан хабардор бўлган. 100 дан ортиқ одам ички ишлар бўлимларига олиб бориб, суҳбат ўтказилган ва уларнинг аксариятини қўйиб юборилган”, деб ёзган Расул Кушербаев.
Хабарда акцияда иштирок этиш учун нафақат шаҳар аҳолиси, балки қўшни вилоятлардан ҳам одамлар келгани айтилган. Ижтимоий тармоқларнинг Ўзбекистон сегментида мазкур акцияни ўтказиш чақириқлари 29 октябрдан бир неча кун аввал пайдо бўлган.
Хабарда ҳуқуқ-тартибот органлари мазкур йиғилишдан аввалдан хабардор бўлгани таъкидланади. Шунинг учун ҳам бу ерга Миллий гвардия ва бошқа кучишлатар идоралар ходимлаори аввалдан олиб келинган.
Орган ходимлари воқеа жойида юздан ортиқ одамни қўлга олиб, ички ишлар бўлимларига олиб борган. Суҳбат ўтказилгач, “уларнинг аксарияти уйларига қўйиб юборилган”. Уларнинг айримларига нисбатан Маъмурий жавобгарлик тўғрисидаги кодекснинг 201-моддаси («Йиғилишлар, митинглар, кўча юришлари ёки намойишлар уюштириш, ўтказиш тартибини бузиш»)да назарда тутилган ҳуқуқбузарлик бўйича маъмурий баённомалар тузилиб, материаллар судга тақдим этилган.
Маъмурий жавобгарлик кодекснинг мазкур моддасида базавий ҳисоблаш миқдорининг 60 бараваридан 80 бараваригача миқдорда жарима солиш ёки 15 суткагача маъмурий қамоққа назарда тутилади.
Байден фақат Исроилга ҳарбий ёрдам кўрсатиш тўғрисидаги қонунга вето қўяди
АҚШ президенти Жо Байден республикачилар томонидан таклиф қилинаётган Исроилга шошилинч ҳарбий ёрдам кўрсатиш тўғрисидаги қонун лойиҳаси Конгресснинг ҳар икки палатаси томонидан тасдиқланган тақдирда унга вето қўяди. Бу ҳақда Оқ Уй маълум қилди. Баёнотда таъкидланишича, мазкур қонунда Украина манфаатлари ҳисобга олинмаган ва фақат Исроилга ёрдам кўрсатилиши ҳақида гап боради.
Оқ Уйнинг бошқарув ва бюджет бюроси Исроил ва Украинага ҳарбий ёрдам бир пайтнинг ўзида бир пакет доирасида берилиши лозим, ҳарбий ёрдамни алоҳида-алоҳида ажратиш амалиёти миллий хавфсизлик учун глобал миқёсда салбий таъсир кўрсатиши мумкин, деб ҳисоблайди.
30 октябрда Конгресснинг Вакиллар палатасидаги ресбуликачилар АҚШ солиқ хизматини молиялаштиришни қисқартириш эвазига Исроилга 14,3 миллиард долларлик ёрдам ажратиш тўғрисидаги қонун лойиҳасини тақдим қилган эди.
Вакиллар палатасининг янги раиси Майк Жонсон Киевга қўшимча ёрдам ажратишга қарши чиқаётганлардан биридир. У дастлаб Исроилга шошилинч ёрдам кўрсатиш масаласини ҳал этишни, Украинага кўрсатиладиган ёрдам миқдорини эса кейинроқ муҳокама қилишни таклиф этмоқда.
Президент Байден аввлароқ Конгрессга бирданига 106 миллиард доллар ёрдам ажратишни, ундан ярмидан кўпроғини Украинага, қолганини эса Исроил ва Тайванга, ҳамда АҚШ-Мексика чегарасини қўриқлашга беришни таклиф қилганди.
Исроилнинг БМТдаги дипломатлари сариқ юлдуз тақди
Исроилнинг БМТдаги ваколатхонаси ходимлари кийимларига сариқ юлдуз тақдилар. Иккинчи жаҳон уруши даврида нацистлар яҳудийларни бошқалардан ажралиб туриши учун мана шундай белги тақишга мажбурлаган эди.
Хабарда айтилишича, ваколатхона ходимлари ташкилот ҳалигача ҲАМАСга қарши резолюцияни қабул қилмаганига норозилик сифатида мана шундай қадамга борганлар.
БМТдаги Исроил элчиси Гилад Эрдан Хавфсизлик кенгаши ҲАМАС қораланган резолюцияни қабул қилмагунига қадар ваколатхона ходимлари юлдузларини ечмаслигини айтди.
“Айримларингиз бу орган нима учун ташкил этилганини эсдан чиқарганга ўхшайсизлар. Сизларга эслатиб қўймоқчиман. Шу кундан бошлаб, ҳар сафар, менга кўзингиз тушганида, сизлар ёвузлик олдида сукут сақлаш қандай оқибатларга олиб келганини эслайсиз. Менинг боболарим, бувиларим ва бошқа миллионлаб яҳудийларнинг боболари ва бувилари каби айни дамдан бошлаб мен ва командам сариқ юлдуз тақиб юради”,- деди Эрдан.
БМТ Яқин Шарқдаги вазиятга оид резолюцияни қабул қилиш учун 21 октябрдан бошлаб бир неча марта йиғилиш ўтказди. Аммо дипломатлар мазкур резолюция юзасидан муросага кела олмаяпти.
Исроил бош вазири Ғазога ҳужумнинг учинчи босқичи бошланганини билдирди
Бош вазир Бинямин Нетаняҳу Исроил ҲАМАСнинг ҳарбий ва сиёсий потенциалини барбод қилишда собит қадам ташламоқда, деб билдирди.
Унга кўра, биринчи босқичда ҲАМАС ҳужумларини тўхтатиш, иккинчи босқичда ҳаводан зарбалар бериш назарда тутилган эди. “Учинчи босқичда эса Ғазода ер усти амалиётини кенгайтирилган тарзда амалга ошириш режалаштирилган”, -деди Нетаняҳу матбуот анжуманида.
Нетаняҳунинг мазкур билдирувидан сўнг ЦАХАЛ расмий вакили Ғазога қўшимча кучлар киритилишини ва бўлгадаги ер усти амалиёти масштаблари кенгайтирилишини маълум қилди.
Шунингдек, Исроил армияси Ливандаги Хизбуллоҳ ҳаракати инфраструктурасига зарба берилганини хабар қилди. Бундан ташқари Исроил армияси Рамаллоҳ яқинидаги Арура шаҳарчасида ҲАМАС расмий вакили Солиҳ ал Арурига тегишли уйни бузиб ташлади.