Исроил ҳарбийлари Ғазо секторига ҳужумларни давом эттирмоқда
Исроил мудофаа кучлари Ғазо секторида исроил ҳарбийлари ҳаракатланаётгани акс этган видеони эълон қилди.
Шунингдек, Ғазога қилинган ҳаво ҳужумлари видеоси ҳам эълон қилинди.
Исроил армияси ўтган кун давомида ҲАМАСнинг Ғазо секторидаги 450 дан ортиқ ҳарбий нишонларига зарба берганини маълум қилди.
Тинимсиз бомбардимонлар оқибатида узилган интернет ва телефон алоқаси якшанба куни тикланди. Исроил ҳарбийлари қамалдаги Ғазо анклавига қуруқликдан, ҳаводан ва денгиздан зарбаларни кучайтирмоқда.
Исроил ҳарбийлари Ҳамаснинг 150 дан ортиқ ер ости нишонларига зарба берганини билдирди.
Можаро ҲАМАС жангарилари 7 октябр куни Исроил шаҳарларига бостириб кириб, кўплаб одамларни ўлдиргани ва гаровга олганидан кейин бошланди.
Исроил бунга жавобан Ғазони озиқ-овқат, ёқилғи ва бошқа таъминотдан узиб қўйиб, тинимсиз бомбардимон қилмоқда.
Фаластин соғлиқни сақлаш вазирлиги ҳозиргача 7700 дан ортиқ фаластинлик ҳалок бўлгани маълум қилди. Бу 2014 йилда олти ҳафта давом этган Ғазо урушида ҳалок бўлганлардан уч баравар кўп.
Исроилнинг ишғол қилинган Ғарбий Соҳилда 100 дан ортиқ фаластинликнинг ўлимига сабаб бўлган рейдларидан сўнг Ҳамас Исроил шаҳарларига бостириб кирди.
АП Фаластиндан қурбонлар сонини мустақил равишда тасдиқлай олмади.
Исроил расмийларига кўра, ҲАМАСнинг дастлабки ҳужумида 1400 дан ортиқ одам ҳалок бўлган.
Исроил ҳарбийлари Ғазода 222 киши гаровда сақланаётганини айтмоқда.
Ҳозиргача гаровга олинган тўрт киши озод этилган.
Осмон тутунга тўлган Ғазода кучли портлашлар эшитилди
Якшанба куни эрталаб анклав узра кучли портлашлар эшитилар экан, Ғазо осмонини қалин қора ва оқ тутун қоплади.
Исроил ҳарбий учоқлари ҲАМАС бошқарувидаги анклавга бомбалар ташлаб, аскарлари ва оғир техникаларини олиб киргач, Ғазонинг қамалдаги аҳолиси деярли алоқа ва интернет узилишига дуч келди.
Алоқа узилиши қутқарув операцияларига таъсир кўрсатди. Бироқ якшанба куни бир қанча Фаластин оммавий ахборот воситалари Ғазода телефон ва интернет алоқалари аста-секин қайтаётгани ҳақида хабар беришди.
Ғазо аҳолиси Исроилнинг қуруқликдан, ҳаводан ва денгиздан оммавий бомбардимонлари кучайганини айтмоқда.
Ғазонинг Дайр ал-Бала шаҳридаги Билол Бин Рабоҳ масжиди Исроил ҳаво ҳужумидан сўнг вайрон бўлганини 29-октябр, якшанба куни дрон тасвирлари орқали кўрсатилди.
Нетаняху гаровга олинганларни озод қилиш учун мулоқот давом этишини билдирди
Исроил бош вазири Бенямин Нетаняху урушнинг иккинчи босқичи бошланганини айтиб, «душманни ер устида ва ер остида» йўқ қилишга ваъда берди:
«Кеча кечқурун қуруқликдаги қўшинларимиз ёвузлик қўрғонини йўқ қилиш учун Ғазога кирди. Бу урушнинг иккинчи босқичи. Мақсадлар аниқ: ҲАМАСнинг ҳарбий ва бошқарув имкониятларини йўқ қилиш ва гаровга олинганлар уйга қайтариш».
Тел-Авивдаги матбуот анжуманида Нетаняху исроилликларни «узоқ ва машаққатли» ҳарбий кампания кутиб тургани ҳақида огоҳлантирди.
У Исроил фаластинликларни Ғазо шимолига кўчишга чақирганини эслатар экан, гаровга олинган 200 дан ортиқ одамни қутқариш учун барча саъй-ҳаракатларни амалга оширишга ваъда берди.
Фаластин-Исроил можароси қурбонлари сони 9500 дан ошди
Ҳар икки томоннинг соғлиқни сақлаш идоралари томонидан эълон қилинган маълумотларга кўра, давом этаётган Фаластин-Исроил можаросида 9500 дан ортиқ одам ўлган.
Ғазо соғлиқни сақлаш бошқармаси якшанба куни эрта тонгда Ғазо секторида тўқнашув бошланган 7 октябрдан бери 8000 дан ортиқ одам ҳалок бўлганини маълум қилди. Бундан ташқари, Ғарбий Соҳилда 110 киши ҳалок бўлди, дея хабар беради соғлиқни сақлаш бошқармаси.
Исроил Соғлиқни сақлаш вазирлиги маълумотларига кўра, Исроил томонида 1400 дан ортиқ одам ҳалок бўлган.
Исроил армияси якшанба куни Ғазодаги Жабалия ва Хон Юнусга ҳужум уюштирди, шунингдек, Ал Арабия нашри хабарига кўра, Фаластин қуролли кучлари билан тўқнашувлар содир бўлди.
Исроил мудофаа кучлари маълумотларига кўра, танклар ва Исроилнинг бошқа қўшинлари Ғазо секторида чекланган, аммо барқарор тарзда олдинга силжимоқда.
Бундан ташқари, ЦАХАЛ шанбадан якшанбага ўтар кечаси Ғазо бўлгасининг шимолий ва марказий ҳудудларига ҳаво ҳужумларини давом эттирди.