Исроил Ғазо аҳлини шанба, 16: 00 гача жанубга кўчишга чақирди
Ғазо шаҳри аҳолиси кўрпа-тўшагини кўтариб жануб томон юрмоқда.
Исроил Ғазо сектори аҳолисини иккита махсус йўналиш – Далдул ва Ал-Сана магистралларидан фойдаланган ҳолда, Ғазо сектори жанубига кўчишга чақирмоқда.
Бунинг учун шанба маҳаллий вақт билан 16: 00 гача мухлат беҳрган,
Бу чақириқ асосан икки шаҳар – Байт Ханун ва Хон Юнис аҳолисига тегишли бўлиб, улар Исроил қуруқликдаги операциясининг биринчи нишонига айланиши мумкин.
Бу ерда бир миллиондан ошиқ ғазолик ҳақида сўз кетмоқда.
Исроил томонига кўра, танклар кўмагида қўшинлар жума куни Ғазо секторида рейдлар ўтказган.
Аҳоли зич жойлашган ҳудудни назорат қилаётган ҲАМАС Ғазо аҳолисига Исроил огоҳлантирувига қарамай, ўз жойида қолишни талаб қилган.
Аммо, бу талабга роман Ғазо секторининг шимолий қисмида бир неча минг одам жануб томон юраётганини кўриш мумкин, бироқ уларнинг аниқ сонини айтиш имконсиз.
Исроил ҲАМАСни тинч аҳолидан қалқон сифатида фойдаланаётганликда айблайди.
Бирлашган Миллатлар Ташкилоти Исроилнинг Ғазодаги бир миллиондан ортиқ одамнинг - бўлгани тарк этиш чақирувини "ҳалокатли" дея атаган.
"Бирлашган Миллатлар Ташкилоти шундоқ ҳам фожиали бўлган вазиятни янада фожиали вазиятга айлантириши мумкин бўлган бундай буйруқни бекор қилишни қатъий талаб қилади"
Исроил БМТ баёнотини қоралаб, Исроил ўзини ҳимоя қилиш ҳуқуқига эгалигини билдирди.
Ҳамас ўтган шанба куни амалга оширган ҳалокатли ҳужумлари оқибатида 1300дан зид исроиллик набуд бўлди, радикал жанггари гуруҳ камида 150 нафар исроилликни Ғазога олиб қочган ва уларни гаровда ушлаб турибди.
Исроил Ҳамас хунрезлигига жавобан амалга ошираётган амалиётларда Ғазода 1900га яқин инсон нобуд бўлган.
Ҳамас назорат қилувчи Ғазо соғлиқни сақлаш вазирлигига кўра, ҳалок бўлганларнинг 614 нафари ёш болалар, 370 нафари эса аёллардир. 7696 киши вазирликка кўра яраланган.
Исроил ҳозир Ғазони тўлиқ қамал қилиб турибди. Озиқ-овқат, дори-дармон, ёқилғи ва сув тугаяпти.
Бирлашган Миллатлар Ташкилотининг маълум қилишича, 400 мингдан ортиқ одам Ғазо бўлгасида ўз уйини ташлаб чиқишга мажбур бўлган.
Бирлашган Миллатлар Ташкилоти Бош котиби Антониу Гутерриш Ғазодаги вазият “хатарли нуқтага етгани”ни айтиб, гуманитар фалокат юз беришидан огоҳлантирди.
"Биз Ғазо бўйлаб зудлик билан инсонпарварлик ёрдами - ёқилғи, озиқ-овқат ва сув етказиб беришимиз керак. Ҳатто урушнинг ҳам қоидалари бор", деди у журналистларга.
Пекинда Исроил дипломати пичоқлаб кетилди
13 октябрь куни Исроилнинг Пекиндаги элчихонасида ишлаб келган дипломатга консуллик яқинида ҳужум уюштирилган.
Исроил ташқи ишлар вазирлиги бу хабарни тасдиқлаб, дипломат даволаниш учун касалхонага ётқизилгани ҳамда унинг аҳволи барқарор эканини билдирди.
Исроиллик дипломатнинг пичоқланиши ҲАМАСнинг Исроилга қонли ҳужумидан кейин содир бўлди.
ҲАМАС жума кунини бутун дунё бўйлаб «Ғазаб куни» деб эълон қилди ва Исроилнинг Ғазодаги ҳарбий амалиётига жавобан барча тарафдорларини исроилликлар ва яҳудийларга ҳужум қилишга чақирди.
Францияда мактаб ўқитувчиси пичоқлаб ўлдирилди
Жума куни Франция шимолидаги ўрта мактабда бир эркак ўқитувчини пичоқлаб ўлдириб, икки кишини яралади. Ҳужум эҳтимолий террорчилик сифатида текширилмоқда.
Террорчиликка қарши кураш бўйича прокурорлар Париждан 185 километр шимолда жойлашган Арра шаҳридаги Гамбетта ўрта мактабига уюштирилган ҳужум бўйича тергов ўтказишаётганини айтди.
Воқеа жойига биринчилардан бўлиб келган полиция зобити Слиман Ҳамзининг айтишича, ҳужум қилган собиқ мактаб ўқувчиси араб тилида “Аллоҳу Акбар” – “Аллоҳ буюкдир” деб бақирган.
Ички ишлар вазири Жералд Дарманиннинг айтишича, ҳужум қилганликда гумон қилинган шахс қўлга олинган. Президент Эммануэл Макрон ички ишлар ва таълим вазирлари билан воқеа жойига борди. Ҳукумат расмийлардан Франция бўйлаб барча мактабларда ҳушёрликни кучайтиришни сўради.
Францияда мактабларга бундай ҳужумлар кам учрайди. Ҳужум сабаби аниқ эмас. Бу Ҳамаснинг Исроилга ҳужуми ва ҳар икки томондан юзлаб тинч аҳоли ўлимига сабаб бўлган Исроилнинг ҳарбий жавоби туфайли дунё бўйлаб кескинлик кучайган пайтга тўғри келмоқда. Исроилнинг Ғазо секторини тўхтовсиз бомбалаши юзасидан жума намозидан кейин мусулмон мамлакатларида оммавий норозилик намойишлари ўтказишга чақириқлар янграган.
Дарманин пайшанба куни маҳаллий ҳукуматларга яҳудийларга қарши ҳаракатлар кучайган бир пайтда Фаластинни қўлловчи барча намойишларни тақиқлашни буюрди.
Франция яҳудийлар сони бўйича дунёда Исроил ва АҚШдан кейин учинчи, мусулмонлар сони бўйича Ғарбий Европада биринчи ўринда туради.
Дунё бўйлаб Исроил ва Фаластинни қўллаб намойишлар ўтмоқда
Жума куни дунёнинг турли бурчагида Исроил ёки Фаластинни қўлловчи кўплаб намойишлар ўтказилди. Жумладан, Ироқдаги шиа мусулмонлари етакчиси Муқтада ас-Садрнинг минглаб тарафдорлари жума намозидан кейин Бағдодда Ғазодаги фаластинликларни қўллаб-қувватлаб намойиш ўтказди.
Ироқнинг олий шиа уламоси Оятуллоҳ Али ас-Систоний дунёни Ғазода содир бўлаётган «даҳшатли ваҳшийлик»ка қарши туришга ва Исроилнинг Фаластин халқига зулмини олдини олишга чақирди.
АҚШда эса минглаб одамлар Исроилни қўллаб-қувватловчи намойишларга чиқди.
Исроил тарафдорлари Лос-Анжелес, Маями-Бич, Хобокен ва Ню-Йоркнинг Шарқий Медоу шаҳарларида митинглар ўтказди.
Намойишчилар Исроил байроқлари ва рамзларини кўтариб чиқишган.
Пайшанба (12 октябрь) куни Нью-Йоркдаги Колумбия университетида эса Фаластин ва Исроилга тарафдор бўлган талабалар бир вақтда иккита митинг ўтказди.
Кампусда кетма-кет ўтказилган иккала митингга ўнлаб талабалар қўшилган.
Тўпланганлар бир бирларидан алоҳида турган, ҳар икки томон бир-бирларига "уят сизларга" деб бақирганда қисқа муддат ўртада таранг вазият пайдо бўлган. Ҳар икки томон Исроил ва Фаластин байроқларини кўтариб олган.