Байден ҲАМАСни террорчи деб атади ва АҚШ Исроилни қўллашини билдирди
АҚШ президенти Жо Байден Оқ Уйда ҲАМАС- Исроил зиддияти бўйича баёнот берди. Байден ўз нутқида ҲАМАСни террорчи ташкилот деб атади.
Байден фикрича, ҲАМАС Фаластин халқи ҳимоячиси эмас. Бу ташкилот ўз олдига фақат “яҳудийларни ўлдириш” вазифасини қўйган. Байден ҲАМАС ҳужумлари оқибатида мингдан ортиқ киши, жумладан, 14 нафар АҚШ фуқароси ҳалок бўлганини таъкидлади. АҚШ президенти ҲАМАС гаровга олганлар орасида америкаликлар ҳам борлигини қайд этган.
Байден нутқи давомида бир неча марта АҚШ Исроилни қўллашини айтди. Унга кўра, Исроил ўзини ҳимоя қилиш ҳуқуқидан ташқари ўзини ҳимоя қилиш мажбуриятига ҳам эга. Шу билан бир қаторда Байден Нетаняҳуни “уруш қонунларига амал қилиш”га чақирди.
АҚШ президенти Конгрессга Исроилга мудофаа учун қўшимча воситалар ажратиш масаласини Конгресс кун тартибига киритишга ваъда берди. Байден, АҚШ зарурат бўлса, минтақага ҳарбий куч жўнатиши мумкинлигини билдирди. Унинг айтишича, бугунги вазиятда Исроилни қўллаш сиёсат масаласи эмас, балки жаҳондаги, жумладан, АҚШдаги тинчликни сақлаш муаммосидир.
10 октябрь куни яқин кунларда АҚШ давлат котиби Энтони Блинкен Исроилга ташриф қилиши тўғрисида хабар берилди. У Исроил ҳалқи билан бирдамлик изҳор қилади ҳамда гаровдагиларни озод қилиш бўйича қўлланиладиган чораларни муҳокама қилади.
Исроил армияси Ғазо чегарасида назорат ўрнатганини айтмоқда
Исроил армияси Ғазо чегарасида назоратни тўлиқ ўз қўлига киритди, деб билдирди 10 октябрда Исроил армияси расмий вакили Даниэль Хагари.
“Сўнгги бир сутка ичида бирорта террорчи деворни ошиб ўта олмади”, -деди у.
Унга кўра, ҳозирда девор вайрон бўлган ҳудудларда майдонларни миналаштириш ишлари олиб борилмоқда.
Хагари ҲАМАС билан уруш бошланганидан бери 1500 жангари ўлдирилганини иддао қилмоқда.
Расмий маълумотларда эса 10 октябрь ҳолатига кўра, Исроилда 900 киши, Ғазода эса 700 киши ўлгани қайд этилган.
ҲАМАС ҳужумида Қодиров масжиди шикастланди
ҲАМАСнинг ракета ҳужумида Исроилнинг Абу-Ғош шаҳарчасидаги Аҳмат Қодиров номидаги масжид шикастланган.
Бу ҳақда Исроил Ташқи ишлар вазирлиги матбуот хизмати хабар қилди:
“ҲАМАС террорчиларининг ракетаси Қуддус яқинидаги Аҳмат Қодиров масжидига келиб тушди”.
Абу-Ғош шаҳарчасида асосан араблар яшайди. 2014 йилда Чеченистон президенти Рамзан Қодиров Абу-Ғошда отаси Аҳмат Қодиров номидаги масжидни очган эди.
Эрон президенти Исроилга босқинни мақтади
Эрон президенти Иброҳим Раисий “Ислом жиҳоди” етакчиси Зиёд ан-Наҳал билан телефонда сўзлашиб, “Фаластин қаршилик ҳаракатининг ажойиб ва ёрқин ғалабаси”ни олқишлади. Бу ҳақда Эроннинг Tasnim агентлиги хабар бермоқда.
“Босиб олинган ҳудудларда ҳамда мустабид сионистик режим билан жангда юз берган воқеалар сўнгги 70 йилнинг улкан ноёб воқеалари бўлди, ушбу янгича ва ғолибона амалиётингиз билан ислом оламини чинакам хушвақт қилдингиз”, деган президент Раисий.
Айни пайтда Фаластин жангарилари босқини натижасида 700 дан ортиқ киши ўлгани, 2500 дан зиёд киши яралангани ва 100 дан ортиқ одам асир олиниб, Ғазо бўлгасига олиб кетилгани маълум.
Ушбу воқеаларда жабрланганлар орасида Непал, Тайланд, АҚШ, Буюк Британия, Украина, Россия, Германия ва бошқа мамлакатлар фуқаролари бор.
Ғазода ҳалок бўлганлар сони эса, Фаластин ССВ маълумотига кўра, 550 дан ортиқ кишини ташкил қилади, яна 2900 киши жароҳатлангани айтилмоқда.