Тошкентдаги Crafers фабрикаси маҳсулоти омборга қайтарилди

Тошкентдаги Crafers шоколад фабрикаси ишлаб чиқарган айрим маҳсулотлар "махсус текширув муҳри бўлмагани" сабабли омборга қайтарилди.

Санитария-эпидемиология назорати бош бошқармасининг Озодлик суҳбатлашган ҳудудий бўлими вакилига кўра¸ қайтарилган маҳсулотлар фабрикадаги махсус назоратдан ўтказилмай¸ сотувга чиқарилган. Озодлик тасарруфида Crafers шоколад фабрикаси омборига қайтарилган 20та поддон (юк супаси) устида турган юзлаб қоп чипс (картошкадан бўлган ширин ëки нордон қаламчалар) сурати бор.

​Crafers шоколад фабрикаси реализация бўлимида ишлайдиган ходимнинг¸ 26 февраль куни шахси очиқланмаслиги шарти билан Озодликка билдиришича¸ расмдаги қоплар “қайтарилган маҳсулотнинг ўндан бири ҳам эмас”.

"Шу ҳафтада вилоятлардан жуда кўп чипс (cracker chips) маҳсулотлари қайтиб келди. Казинаки (ширин қиëм ичига прессланган ëнғоқ ) ҳам қайтиб келди"¸ деган суҳбатдош ўз гапи исботи сифатида яна расмлар жўнатди.

Ўзбекистон Санитария-эпидемиология назорати бош бошқармасининг Озодлик суҳбатлашган ҳудудий бўлими вакилига кўра¸ маҳсулотлар "сифатсиз ва саломатликка зарарли" дея топилиб¸ фабрикага қайтарилган.

"Мавжуд қоидага кўра¸ фабрикадан реализация қилинадиган озиқ-овқат маҳсулоти корхонанинг ўзида ОТК (Техник назорат бўлими) дан ўтиб муҳр босилиши ëки ëрлиқ ëпиштирилиши керак. Бу маҳсулотлар "ОТК" бўлимини айланиб ўтиб реализацияга чиқарилган"¸ деди Санитария-эпидемиология назоратининг исми очиқланмаслигини истаган врачи.

Бу суҳбатдош¸ суратдаги қопларга солинган маҳсулотларнинг Қорақалпоғистон¸ Хоразм¸ Бухоро¸ Қашқадарë ва Наманган вилоятидан қайтарилганини очиқлади.

"Тошкентдаги "Корзинка" савдо марказидаги маҳсулотни олиб текширсак¸ ОТК дан ўтмаган бўлиб чиқди. Бизнинг хулосамиздан кейин "Корзинка" савдо маркази ҳам маҳсулотларни фабрика омборига қайтарди"¸ дейди суҳбатдош.

Мутасадди ходимга кўра¸ "ОТК муҳри бўлмагани озиқ-овқат маҳсулотини омборга қайтариш учун асос бўла олади".

Фабрика расман изоҳ бермади

Назоратдан ўтмаган маҳсулотларнинг нега ва қандай сотувга юборилганига изоҳ сўраб¸ Озодлик Crafers шоколад фабрикасининг жамоатчиликка тақдим этилган телефон рақамларига мурожаат қилди.

Озодлик билан гаплашган фабрика хизматчиси¸ "шикоятни умумий тартибда жўнатиш лозим"лигини қайта-қайта такрорлаш билан кифояланди.

Crafers шоколад фабрикаси реализация бўлимида ишлайдиган ходимнинг Озодликка айтишича¸фабрика омборига қайтарилган ширинликлар фабрика раҳбарларидан бирининг буйруғига кўра ОТКда расмийлаштирилмасдан машиналарга юкланган”. Айни пайтда¸ ишсиз қолишидан чўчиган суҳбатдош¸ бу амалдорнинг исми-шарифини очиқламади.

Президент назарига тушган фабрика

Тошкент шаҳридаги собиқ “Лак-бўёқ” заводи ўрнида ташкил этилган “Амилов” фабрикаси (кейинчалик фабрика номи Crafers дея ўзгартирилди) 2018 йилнинг 5 октябрда ишга туширилган эди. 2018 йилнинг 26 октябрида айни фабрикани бориб кўрган президент Шавкат Мирзиëев 850 киши учун иш ўрни яратилганини олқишлаган эди.

Расмий матбуотда ëзилишича¸ 32 гектарлик ҳудудда жойлашган корхона йилига 50 минг тоннага яқин қандолат маҳсулотлари ишлаб чиқариш қувватига эга.

Бундан олдин Тошкентдаги Crafers қандолат фабрикаси ишчиси бир гуруҳ ишчилар номидан Ўзбекистон Меҳнат кодексида белгиланган 8 соат ўрнига 12 соатлаб ишлатилаëтганидан Озодликка шикоят қилган эди.