Блинкен: АҚШ Украинага "мустаҳкам" ёрдам пакетини ажратади
АҚШ давлат котиби Энтони Блинкен урушдан кейин Украинани қайта қуришни молиялаштириш масалаларига бағишланган анжуманда Украинага янги ёрдам пакети тақдим этилишини айтди:
"Президент Жо Байден Россия Украинага қарши бошлаган урушнинг бошиданоқ биз Украина билан қанча вақт керак бўлса, шунча бирга бўламиз, деб айтган. Ҳар икки давлат бунга содиқ. Биз бу мажбуриятни янги ёрдам пакетини ажратиш орқали бажаришда давом этамиз."
Киев ва Лондон Украинани тиклаш бўйича икки кунлик конференциясига мезбонлик қилмоқда. Унда 60 дан ортиқ давлатдан 1000 дан зиёд хорижий расмийлар, бизнес вакиллари ва глобал инвесторлар мамлакатни қайта тиклашни молиялаштириш йўлларини муҳокама қилади.
“Биз Украинага киритиладиган сармоялар хавфсиз, можаролардан ҳимояланган бўлишини ҳамда ислоҳ қилинган институтлар орқали имкон қадар самарали ишлатилишини истаймиз”, деди Буюк Британия ТИВ Жеймс Дойл.
Украина ўз иқтисодиётини қайта тиклаш, жумладан, кўмирсиз пўлат саноатини ривожлантириш доирасида "Яшил Маршалл режаси" нинг биринчи қисмини молиялаштириш учун 40 миллиард доллар маблағ сўрамоқда, деди украиналик юқори мартабали мулозим.
Украина, Жаҳон банки, Европа Комиссияси ва БМТ урушнинг биринчи йили учун харажатлар 411 миллиард долларни ташкил этганини билдирган эди. Харажатлар 1 триллион доллардан ошиб кетиши мумкинлиги тахмин қилинган.
Фон дер Ляен: Европа Иттифоқи Украинага 50 миллиард евро ажратади
Европа Иттифоқи президенти Урсула фон дер Ляен Украинага 50 миллиард евро миқдорида ёрдам пакети ажратилишини эълон қилди:
“Украинага келгуси тўрт йил учун 50 миллиард евролик молиявий захирани тақдим қиламиз. Бу кредитлар ва грант маблағларини ўз ичига олади. Молиявий захира биринчи навбатда Украинадаги ҳамкорларимиз учун истиқбол ва ишончни таъминлайди. Бу бошқа донорларни ҳам фаоллашишга ундаши керак”.
Янги молиявий ёрдам шу ҳафта Лондонда бўлиб ўтадиган Украинани урушидан кейин қайта тиклаш учун маблағ йиғишга қаратилган халқаро конференция олдидан эълон қилинди.
Украина дрони Россия танкларига қаратилган артиллерия зарбаларини тасвирга олди
Сешанба (20 июнь) куни украин ҳарбийлари эълон қилган тасвирларда фронтнинг жануби-шарқий чизиғида танкларга қарата артиллерия зарбалари йўллангани акс этган.
128-сонли тоғ-штурм бригадаси Россия танклари Пятихатка қишлоғи яқинидаги Украина позицияларига ҳужум қилмоқчи бўлганида уларга зарба берганини маълум қилди.
Reuters агентлиги роликдаги бункерлар, далалар ва йўлларнинг тузилишини ушбу ҳудуднинг сунъий йўлдошдан олинган тасвири билан таққослаб, у қаерда суратга олинганини аниқлашга муваффақ бўлди.
Бу жой Украина қўшинлари бир неча кун олдин озод қилгани айтилаётган Пятихатка қишлоғидан тахминан 2,1 километр нарида экани айтилмоқда.
Айни чоғда Reuters видео суратга олинган санани мустақил текшира олмаган.
Украина президенти Владимир Зеленский душанба (19 июнь) куни украин қўшинлари қарши ҳужум чоғида ўз позицияларини йўқотмаганини, душман кучлари эса фақат талафот кўрганини айтган эди.
Reuters жанг майдонидаги вазиятни мустақил баҳолай олмаганини билдирган.
Россиянинг вайрон бўлган ўқ-дори омбори сунъий йўлдошдан суратга олинди
АҚШнинг Planet Labs хусусий ширкати якшанба (18 июнь) ва душанба (19 июнь) кунлари сунъий йўлдошдан олинган суратларни эълон қилди. Уларда Украинанинг Россия назоратидаги Риково қишлоғида жойлашган ўқ-дори-омборининг зарба йўлланишидан олдинги ва кейинги ҳолати акс этгани айтилади.
Украина томони Херсон жанубида жойлашган Геническ порти яқинида Россиянинг “каттагина” ўқ-дори омбори йўқ қилингани ҳақида якшанба куни хабар тарқатган эди.
Reuters агентлиги ушбу маълумотни мустақил текшира олмади. Россия томони ҳам муҳтамал ҳужум юзасидан бирон изоҳ берган эмас.
Риково қишлоғи – Украинанинг Азов денгизи бўйидаги кичик порт шаҳри ва урушнинг илк кунларидаёқ Россия томонидан босиб олинган Геническдан салкам 20 км масофада жойлашган.