Россия шикастланган немис танклари ва АҚШ БМПлари акс этган видеони ёйинлади: техникалар Украинаники экани иддао қилинмоқда
Россия мудофаа вазирлиги сешанба (13 июнь) куни Германиянинг Leopard танклари ва АҚШ ишлаб чиқарган Bradley жанговар машиналари акс этган видеони эълон қилди: ҳарбий техникалар Россия қўшинлари томонидан Украина билан жангда шикастлангани айтилади.
Вазирликка кўра, видео Украина жанубидаги Запорожье фронтида – Украина кучлари қарши ҳужумга ўтишга уринган ҳудудлардан бирида тасвирга олинган.
Reuters агентлиги видеодаги техникалар ростдан ҳам АҚШда ишлаб чиқарилган Bradley зирҳли жанговар машиналари ҳамда Германиядаишлаб чиқарилган Leopard танклари эканини тасдиқлади, аммо тасвирга олинган кун ва жойни мустақил тарзда текшира олмади.
Тасвирга илова қилинган қисқа баёнотда вазирлик қўлга киритилган ҳарбий техникани “бизнинг ўлжамиз” деб атайди ва “Шарқ” қўшинлар гуруҳи аскарлари уларни томоша қилаётганини айтади.
Шунингдек, айрим машиналар мотор ишлаб турган ҳолатда бўлгани – украин экипажлари уларни ташлаб қочгани белгиси сифатида талқин қилинади.
Айни пайтда Украина Запорожье вилоятида Россиянинг модернизация қилинган танкини қўлга киритганини эълон қилди.
Ўлжа қилиб олинган 2022 йилги Т-80БВМ танки акс этган видеони NMFTE телеграм-канали эълон қилди. Бу – йил бошидан буён Украина томонидан ўлжа олинган биринчи танк. Ҳозирга қадар Россия 2021 йилдан сўнг армияга етказиб берилган янги танкларидан 80 тасини Украинага қарши жангларда бой берган.
Украина тўртинчи қишлоқни қайтариб олди
Украина икки кун ичида жануби-шарқий фронтда тўртинчи қишлоқни қайтариб олганини маълум қилди.
"35- бригада денгиз пиёдалари Сторойве қишлоғини озод қилишди. Яшасин Украина", дейди украин аскари.
Донецк вилоятидаги Сторойве қишлоғида аскарлар Украина байроғини кўтариб тургани акс этган видео тармоқларга жойлаштирилди.
“Дастлаб душман қаршилик кўрсатди, артиллерия билан ҳужумни қайтаришга уринди. Бироқ, биз ташаббусни қўлимизга олишга муваффақ бўлдик ва секин-аста уйма-уй қишлоқни қайтариб ола бошладик. Душманнинг тахминан ўн аскарини ўлдириб, тўрттасини асирга олдик", дейди украин аскари.
Рейтерс сунъий йўлдош суратлари орқали видеодаги жойлашувни тасдиқлашга муваффақ бўлди. Бироқ видео санасини мустақил равишда тасдиқлай олмади.
Анна Маляр: Қўшинлар 6,5 километр олдинга силжиган
Душанба (12 июнь) куни Украинанинг 3-штурм бригадаси Россия армиясининг Бахмут яқинидаги позицияларига ҳужум бошлагани акс этган видеони ёйинлади.
Reuters агентлиги ушбу видео суратга олинган сана ва жойни мустақил тарзда текшира олмаганини билдирган.
Украина мудофаа вазири ўринбосари Анна Маляр телеграм-каналида Украина ҳужумининг биринчи ҳафтаси натижаларини сарҳисоб қилди. Унда айтилишича, қўшинлар 6,5 километр олдинга силжиган, Украина назоратига ўтган ҳудуднинг умумий майдони эса 90 квадрат километрни ташкил қилади.
Маляр ўтган кунларда 7 аҳоли маскани – Лобковое, Левадное, Новодаровка, Нескучное, Сторожевое, Макаровка, Благодатное қишлоқлари озод этилганини тасдиқлади.
Украина президенти Владимир Зеленский ёмғирда кечаётган шиддатли жангларга қарамай, украин қўшинлари жанг майдонида олдинга силжиб, душманга талофат етказаётганини айтди:
"Жанглар шиддатли, аммо ҳаракатланишда давом этяпмиз. Бу энг муҳими. Биз учун кераги душманга талофат етказиш. Ноқулай об-ҳаво, ёмғир вазифамизни мураккаблаштирмоқда. Шунга қарамай, аскарларимизнинг жасорати самара бермоқда. Ҳозирда жанг қилаётган барчага, бригадаларимизни қўллаб-қувватлаётган ҳамма-ҳаммага ўз миннатдорчилигимни билдираман."
Украина узоқ кутилган қарши ҳужум бошлаганидан бери жануби-шарқда тахминан 100 км ҳудуддаги етти қишлоқни рус кучларидан озод қилганини билдирди.
Россия Украинанинг ютуқларини расман тан олмаяпти, аксинча, унинг ҳужумларини қайтарганини ва қарши ҳужум бошланганидан бери Украина кучларига оғир талафот етказганини иддао қилаётир.
Кривой Рог шаҳрида қутқарувчилар ракета ҳужумидан омон қолганларни қидирмоқда
Россия 13 июнга ўтар кечаси Украина президенти Зеленский туғилиб ўсган Кривой Рог шаҳридаги турар-жой биносини бомбардимон қилди. Ҳужум оқибатида 11 киши ҳалок бўлган ва 28 киши яраланган.
Украина фавқулодда хизмат ходимлари омон қолганларни қидиришда давом этмоқда.
Беш қаватли турар-жой биноси ракета зарбасидан кейин аланга ичида қолган. Кривой Рог мери Олександр Вилкул вайроналар остида камида етти киши қолиб кетган бўлиши мумкинлигини айтди.
Рейтерс бу хабарни мустақил равишда тасдиқлай олмади.
Аҳолининг айтишича, ярим тунда улар кучли портлашдан уйғониб кетган ва уйларини тарк этишга мажбур бўлган.
"Биринчи портлашдан кейин уйғониб кетдим ва балконга чиқдим. Кейин кўз ўнгимда иккинчи портлаш бўлди. Тепадан нималардир тушди. Уйнинг иккинчи кириш жойи ёниб кетди”, деди шаҳар турғуни Игор Лаврененко.
Украина расмийларига кўра, шаҳардаги бошқа биноларга ракета зарбалари берилиши оқибатида яна камида тўрт киши яраланган.
Владимир Зеленский ҳужумни қоралади.
Сешанба тонгида бутун Украина бўйлаб ҳаво ҳужуми сиреналари янгради. Украина ҳарбий ҳаво кучлари 14 та қанотли ракетадан 10 тасини ва тўрт дрондан бирини уриб туширганини билдирди.