Швейцария танкларини Германия орқали Украинага беради
Швейцария ҳукумати 25 та Leopard 2 жанговар танкини кейинроқ Германияга сотиш учун фойдаланувдан чиқариш ташаббусини қўллаб-қувватлади.
Бу Ғарб мамлакатларига Украинага кўпроқ ҳарбий ёрдам жўнатиш имконини бериши мумкин, дея хабар қилмоқда Reuters.
Ҳукумат баёнотига кўра, бу Швейцариянинг ўз ҳарбий эҳтиёжлари таъминотига таъсир қилмайди. Энди ушбу масала мамлакат парламентида кўриб чиқилиб, якуний қарор қабул қилинади.
Бугунги кунда Швейцария армияси 134 та Leopard 2 танкидан фойдаланмоқда, яна 96 та танк захирада сақланади.
Reuters маълумотига кўра, февралда Германия Швейцариядан ўз танкларининг бир қисмини қурол-аслаҳа ишлаб чиқарувчи Rheinmetall ширкатига сотишни илтимос қилган – ширкат эса ўз навбатида уларни Европа Иттифоқи ва НАТОга аъзо мамлакатларнинг қурол-аслаҳа таъминотидаги камчиликларни тўлдиришга сарфлаши кўзда тутилган.
Нидерландия украиналик учувчилар билан Ф-16 машғулотларини имкон қадар тезроқ бошлашга тайёр
Бу ҳақда Нидерландия мудофаа вазири Кайса Оллонгрен маълум қилди.
Машғулотлар Бельгия, Дания ва Буюк Британия билан мувофиқлаштирилган ҳолда ўтади, бошқа давлатлар ҳам қўшилиши мумкин, дея қўшимча қилди Оллонгрен.
НАТО раҳбари Енс Столтенберг украиналик учувчиларни Ф-16 қирувчи самолётларига ўргатиш НАТОни Россия ва Украина ўртасидаги можарода иштирок этишини англатмаслигини айтди.
Норвегия ҳам украиналик учувчиларни тайёрлаш дастурини қўллаб-қувватлашини билдирди.
Бир кун аввал юқори мартабали рус мулозимлари Ф-16 самолётларини Украинага бериш НАТОнинг можародаги роли масаласини кўтаришини таъкидлади.
Россия Ташқи ишлар вазири ўринбосари Сергей Рябков Украинага етказиладиган ҳар қандай Ф-16 қирувчи самолётлари Москва учун "қонуний нишон" бўлади, дея иддао қилди.
Бахмут йўналишида жанг қилган 106 аскар Россия асирлигидан қайтди
106 нафар аскар Украинага Россия асирлигидан қайтди. Бу ҳақда Украина президенти девони раҳбари Андрей Ермак маълум қилди.
Унга кўра, Украинага қайтганлар орасида Бахмут ҳудудида жанг қилган 8 офицер, 98 нафар аскар ва сержант бор. Қайтганлар орасида кўпчилик бедарак йўқолган деб ҳисобланган.
"Бизнинг ҳақиқий уйимиз - одамлар биз ҳақимизда ўйлайдиган жой. Биз биргаликда қураётган Украина - бу инсон, ватандош энг олий қадрият деб ҳисобланадиган жой. Одамлар ҳақида қайғурадиган мамлакат. Бизнинг жамиятимиз айнан шундай фикр юритади. Барча асирлар уйда бўлади, биз бунинг устида ишлаяпмиз ", деб ёзди Андрей Ермак.
Россия томони ҳарбий асирлар алмашинуви ҳақида ҳозирча хабар бермаган.
Ўтган тунда Украинага йўлланган барча 36та “Шаҳид” уриб туширилди
Украина 25-май, пайшанба куни Россия томонидан амалга оширилган тунги ҳужумларда Эронда ишлаб чиқарилган 36 та «Шаҳид» дронининг барчасини уриб туширганини маълум қилди.
Ҳужумдан мақсад Украина ғарбий вилоятларидаги инфратузилма объектларини вайрон қилиш бўлгани айтилмоқда.
Президент Владимир Зеленский “нотинч тун” бўлганини айтди.
Украина бирлашган кучлари қўмондони Сергей Наев ҳаво ҳужумидан мудофаа қўшинлари позицияларига ташриф буюрди.
Пайшанба куни эълон қилинган видеода Наевнинг Германияда ишлаб чиқарилган "Гепард" ўзиюрар зенит қуролини бошқараётган аскарлар олдига боргани тасвирланган.
“Мен шимолий операция зонасида ҳаво ҳужумидан мудофаа вазифаларини бажараётган йигитларимизга миннатдорчилик билдириш учун келдим. Улар "Гепард" қуроли билан жиҳозланган, у аллақачон душманнинг - тўртта "Шаҳид" учувчисиз учиш аппарати ва иккита қанотли ракетасини йўқ қилган», деди Украина Бирлашган Кучлари Қўмондони Сергей Наев.
Шунингдек, улар Киев тунги осмонида дрон уриб туширилгани акс эттирилган видеони ҳам тарқатишди.
“Шаҳед”лардан 10 таси Львов вилояти устида уриб туширилди, аҳолидан ҳеч ким жабрлангани йўқ, деди вилоят раҳбари Максим Козицкий.
Реутерс кадрлар қаерда эканлигини ва у суратга олинган санани мустақил равишда тасдиқлай олмади.