Польшада Россия элчиси совет аскари ҳайкали пойига гул қўя олмади
Украиналик фаоллар ва уларга хайрихоҳ поляклар Россиянинг Варшавадаги элчиси Сергей Андреевга Польша пойтахтидаги Қизил армия аскари ҳайкали пойига гулчамбар қўйишга йўл беришмади.
Ёдгорлик ўрнатилган қабристон дарвозаси ёнида элчини бир неча юз киши кутиб турган эди. Фаоллар у ерда Россиянинг Украинага босқинини қораловчи ҳамда Россия ҳарбийлари ушбу мамлакатда содир этган ҳарбий жиноятларни ёдга солувчи инсталляция ташкил қилдилар.
Андреев келгач, халойиқ “Рашистлар!” дея хитоб қилганча уни ва ҳамроҳларини қуршаб олиб, ёдгорлик томонга ўтказмади. Тўқнашув чиқди. Элчи, ўзи РИА Новостига билдиришича, зиён-заҳмат кўрмаган. Фаоллар босими остида қабристондан жўнаб кетаркан, у қайтишга ва гулчамбар қўйишга яна уриниб кўришини айтди.
Ўтган йили 9 май куни Варшавада Россия элчиси устига – Россиянинг Украинага босқинидан норозилик белгиси сифатида қизил бўёқ сепиб юборишган эди.
Европа Иттифоқи президенти Урсула фон дер Ляен Киевга келди
Еврокомиссия раҳбари Урсула фон дер Ляен Россиянинг янги ҳужумларидан сўнг Украина президенти Владимир Зеленский билан музокаралар ўтказиш учун Киевга ташриф буюрди.
Ташриф Европа Иттифоқининг Европа куни доирасида амалга оширилди. Украина Россия босқинидан кейин EИга аъзо бўлиш учун ариза топширгандан сўнг Ғарб институтларига қўшилиш амбицияларини илгари суриб келмоқда.
Фон дер Ляен 2014 йилги урушдан бери ҳалок бўлган украиналик аскарлар хотирасига ҳурмат бажо келтирди. У шунингдек Авлиё Михаил майдонида қўлга олинган рус техникаларининг очиқ кўргазмасига ҳам ташриф буюрди.
У “Биз учун муҳим бўлган қадриятлар ҳимоя қилинаётган Киевга йўл олганимдан хурсандман" дея твит қолдирди.
Европа Комиссияси фон дер Ляеннинг ташрифини бир кун олдин оммага эълон қилди. Одатда олий даражадаги раҳбарларнинг Украинага ташрифлари хавфсизлик нуқтаи назаридан сир тутилади.
Пригожин: Мудофаа вазирлиги ваъда қилинган ўқ-дорини барибир бермади
“Вагнер” ХҲШ асосчиси Евгений Пригожин навбатдаги видеомурожаатида ўз назоратидаги ёлланма жангчиларга Россия мудофаа вазирлигидан ўқ-дори барибир келмаганини айтди. Пригожинга кўра, “Вагнер” ХҲШ Бахмутда яна бир неча кун қолади: “ҳозирча урушамиз, қолган масалалар кейин ҳал қилинади”, деди у.
“Бугун “Вагнер” ХҲШ турли йўналишларда 280 метргача силжиди. Биз жами 53 минг метргача илгариладик. Душман назоратида атиги 2,37 квадрат километр қолмоқда. Ҳаракатни давом эттирамиз, ўқ-дорини кутяпмиз”, деди Пригожин.
Аввалроқ у Россия ҳарбий раҳбариятини “Вагнер” ХҲШ учун атай снаряд тақчиллигини яратишни айблаб, 10 майда ўз бўлинмаларини Бахмутдан олиб чиқиб кетиш билан пўписа қилган эди. 7 май куни эса Пригожин унга ўқ-дори етказиб беришга ваъда берилганини айтган.
“Путиннинг ошпази” сифатида ном чиқарган Пригожин ва унинг Вагнер гуруҳи АҚШ санкциялари остида. Украина урушига қадар у Вагнер эгаси эканини рад этиб келган. Шу йил январида Норвегияга қочган ва у ерда бошпана сўраган собиқ Вагнер жангчиси гуруҳ Украинада уруш жиноятларини содир этганига гувоҳ бўлганини айтган.
Москвада хавфсизлик чоралари кучайтирилган ҳолда Ғалаба байрамига бағишланган парад ўтказди
Россия 9 май иккинчи жаҳон урушида фашистлар Германияси устидан қозонилган ғалабанинг 78 йиллигини хавфсизлик чоралари кучайтирилган шароитда нишонлади. Кремлга ва бир нечта ҳудудларга қилинган ҳужумлардан сўнг бу йилги байрамда хавфсизлик чоралари одатдагиданда кучайтирилган.
Ғалаба куни Россияда энг муҳим давлат байрамларидан бири бўлиб, бу санада россияликлар иккинчи жаҳон урушида эришилган ғалабани нишонлайди.
Россия Украинадаги урушда минглаб аскарларини йўқотгани эса байрам тадбирини бошқача ҳиссиётларга тўлдирди.
Бу йилги парадда замонавий танклар кўринмади. Фақат совет давридаги Т-34 зирҳли танклари, ҳаво ҳужумидан мудофаа тизимлари ва баллистик ракеталарни учириш мосламаларини ўз ичига олган ҳарбий техникалар намойиш қилинди.
Россия президенти Владимир Путин ўз нутқида Россияга қарши уруш “бошлангани”ни айтиб, бунинг учун “Ғарб глобалист элитаси”ни айблади ва уларни нацистлар билан қиёслади. Путиннинг сўзларига кўра, улар “мамлакатнинг парчаланиши ва вайрон бўлишига эришмоқчи”. Россия Украинадаги уруш пайтида, Путин” таъкидлаганидек сўзларига кўра, "Донбассни ҳимоя қилади ва унинг хавфсизлигини таъминлайди".
Умуман олганда, Путин ўз нутқида иккинчи жаҳон уруши ҳақида эмас, балки ўзи махсус операция деб атаган Украинадаги уруш ҳақида гапирди. Путин Россия кучларининг Украинадан кутилаётган йирик қарши ҳужумга тайёргарлиги ҳақида тўхталмади.