New York Times: Россия урушда 110 минг аскаридан айрилди
Россия Федерал хавфсизлик хизматига кўра, Россиянинг Украинада ҳалок бўлган ва яраланган аскарлари сони қарийб 110 минг кишини ташкил қилади.
The New York Times ёзишича, ушбу маълумот яқинда интернетга сиздирилган АҚШ разведкасига оид махфий ҳужжатларда қайд этилган.
Куни кеча Reuters агентлиги ҳам сиздирилган ҳужжатларга ҳавола берган ҳолда, АҚШ ҳарбийлари ҳисоб-китобига кўра, Россия урушда 189,5 мингдан 223 мингтагача аскар йўқотгани ва шундан 35,5-43 минг нафари ҳалок бўлганлар экани ҳақида хабар тарқатган эди.
Аввалроқ “Медиазона” ҳамда “BBC News рус хизмати” волонтёрлар кўмагида Россия талафотларини мустақил ҳисоблаб чиққан. Улар очиқ маълумотларга таяниб, 2023 йилнинг апрель ойи бошларига қадар Украинага қарши урушда ҳалок бўлган 19 688 нафар россиялик ҳарбий исмларини аниқлаганлар.
Россия Мудофаа вазирлиги талафотлар бўйича сўнгги бор 2022 йил 21 сентябрда – сафарбарлик эълон қилинган куни маълумот берган. Ўшанда мудофаа вазири Сергей Шойгу Украинада Россиянинг 5937 нафар ҳарбий хизматчиси ўлганини айтган эди.
Пентагон ҳужжатлари сиздирилганидан жамоатчилик 5 апрель куни хабар топди, ўша куни Россияга оид қатор телеграм-каналлар деярли бир вақтда Украинадаги урушга доир маълумотлар мавжуд файлларни эълон қилди. Washington Post ёзишича, маълумотлар сиздирилишида АҚШ ҳарбий базаларидан бирида ишлаши тахмин қилинаётган бир эркакнинг қўли бор.
Пейсли «Same here» қўшиғини Киевда куйлади
Таниқли мусиқа юлдузи Бред Пейсли «Same here» номли қўшиғини Киевдаги Авлиё Майкл майдонида туриб куйлади.
Пейсли Украинани қайта қуриш дастури- UNITED24 нинг глобал элчиси сифатида Украинага биринчи марта келди. У ташриф давомида Владимир Зеленский билан учрашди.
Зеленский иштирокидаги «Same here» қўшиғи шу йилнинг 24 февралида чиқди. Унда Украина ҳақида сўз бормасада, қўшиқ Пейсли ва Зеленскийнинг телефондаги суҳбати билан якунланади.
Пейсли қўшиқдан тушган маблағ украиналикларга уй-жой қуришда кўмак бериш учун сарфланишини айтган.
Алла Пугачёва Украина ҳарбийларини молиялашда гумонланмоқда
Россия ҳукуматига оид “Хавфсизлик бўйича ва коррупцияга қарши кураш федерал лойиҳаси” раҳбари Виталий Бородин Бош прокуратурага мурожаат қилиб, таниқлик хонанда Алла Пугачёва Украина Қуролли кучларини молиялашда иштирок этган-этмаганини текширишни сўради.
ТАСС хабарига кўра, Бородин ўз аризасида Исроилда яшаётган Пугачёванинг гўёки “ Ғарб разведкаси билан алоқаларини” аниқлаганини ёзган.
Аввал ҳам Бородиннинг чақув хатлари ортидан бир қанча таниқли шахслар “хорижий агентлар” рўйхатига тиркалган.
Алла Пугачёва Россия Украинага бостириб кирганидан сўнг турмуш ўртоғи Максим Галкин ва фарзандлари билан мамлакатни тарк этган. Кремлнинг босқинчилик урушини қоралагани ортидан телебошловчи Максим Галкин ўтган йилнинг сентябрида “хорижий агент”лар рўйхатига киритилган эди. Шундан сўнг Алла Пугачёва “Инстаграм”да “Адлия вазирлигига мурожаат” эълон қилиб, эри билан ҳамфикрлиги сабабли уни ҳам рўйхатга қўшишни сўраган.
Украин снайперлари: Узилган ҳар бир ўқ олтинга тенг
Владимир ва Сергей снайперлардир. Улар Украина Қуролли Кучларининг 80-десант-штурм бригадасида хизмат қилишади.
Иккови ҳам бир неча йилдан бери уруш ичида юриб, дийдаси қотган: гап-сўзлари босиқ, вазмин – деярли ҳиссиётсиз. Улар ҳар куни душманни прицел орқали кўрадилар, ҳар куни Донбасснинг энг қайноқ нуқталарида бўладилар. Эгниларидан – зирҳли нимча, шарф ва аскарча ниқоб, қўлларидан – мерганлар милтиғи тушмайди сира.
Аскарлар айтишича, Бахмутдаги бинолар баъзан бир кунда бир неча марта қўлдан-қўлга ўтар экан. Жанглар кўп бўлади, узилган ҳар бир ўқ олтинга тенг, дейди снайпер йигитлар.
Снайперлар ўз ишларини прицелга ўрнатилган махсус камерага қайд қилиб қўйишади – бу ҳисобот учун керак.
“Ҳў, анави ёқда душманнинг чамаси саккиз чоғли аскари бор эди. Кейин бизникилар бориб, жасадларни санаб кўришди. Улардан иккитасини биз йўқ қилдик. Бири иккинчисининг мурдасини судраб кетмоқчи бўлганида асфаласофинга жўнатилди”, дейди стайпер йигит.