Лукашенко: Россия Беларусни ҳимоя қилишига кафолат керак
Украинага босқинда Путинни яқиндан қўллаётган Александр Лукашенко Белорус ҳужумга учраган тақдирда Россия ёрдамга келиши борасида Кремлдан кафолат сўради.
Лукашенко бу ҳақида Россия Мудофаа вазири Сергей Шойгу билан Минскдаги учрашувда суҳбатлашган.
Лукашенконинг сўзларига кўра, бу масалани аввалроқ Россия президенти Владимир Путин билан ҳам муҳокама қилган. У Путин билан хавфсизлик кафолатлари зарурлиги ва уни расмийлаштириш зарурати ҳақида келишиб олган.
"Агар Беларусга ҳужум бўлса, Россия Беларусни ўз ҳудуди каби ҳимоя қилади. Бизга шундай кафолат керак. Аслида, 90 йилларда бу масала озми кўпми муҳокама қилинган эди. Ғарбнинг ҳатти-ҳаракатларидан кейин бу ҳақида унутилган. Хўш, Америка бизга қандай хавфсизлик кафолатларини бериши мумкин? Ҳеч қандай. Бизга нисбатан провокация қўзғатишдан ташқари. Биз Россиядаги биродарларимиздан тўлиқ хавфсизлик кафолатига муҳтожмиз”.
Ҳозирда рус кучлари контингентини ўзида сақлаётган Беларус Россияга Украинадаги ҳарбий кампанияси давомида ёрдам таклиф қилган.
Минск Россияга урушнинг илк даврида Киевга ҳужум учун ўз ҳудудидан фойдаланишга рухсат берган эди.
Кўплаб қўшма ҳарбий машғулотлар ва юқори даражадаги рус расмийларининг ташрифлари Беларуснинг Украинага қарши янги ҳужумга расман қўшилиши мумкинлиги ҳақидаги тахминларни келтириб чиқарди.
Лукашенко эса буни рад этар экан, бироқ Беларус ўз ҳудудига ташқи тажовуз бўлган тақдирда бунга жавоб беришини таъкидлаб келади.
Пушилин: Бахмутнинг 75 фоизи бизнинг назоратида
Бахмут шаҳри ҳозирда энг қонли жанглар майдонига айланган. Ҳар икки томон берган катта инсоний йўқотишлар биринчи жаҳон урушидаги талофатларга қиёсланмоқда.
Украина расмийлари АҚШ махфий ҳужжатлари сизиши ортидан Киев қарши ҳужум режаларига ўзгартириш киритаётгани тўғрисидаги хабарларни рад этар экан, Россия кучлари кеча ҳам Украина шарқидаги шаҳарларга ҳужум уюштирди.
Рус қўшинлари Украинанинг Бахмутдаги позицияларига ҳамда бошқа шаҳар қишлоқларни ҳаво ва артиллериядан ўққа тутди, дея хабар берди Киев.
Вагнер гуруҳи нафақат Бахмут, балки бутун Украинадаги урушда муҳим роль ўйнамоқда. Вагнер ҳарбий ширкати Африка ва Суриядаги ҳарбий жиноятларда айбланган.
«Вагнер гуруҳи олдинга силжимоқда. Ҳозир эса аниқ айта оламанки, шаҳарнинг 75 фоиздан ортиғи бизнинг ҳарбийларимиз назоратида. Бугун биз вайронагарчилик кўламини баҳолаш имконига эгамиз», Донецк вилоятининг Россия назоратидаги ҳудуди раҳбари Денис Пушилин.
Донецк вилоятининг Россия назоратидаги ҳудуди раҳбари Денис Пушилин бу гапни Бахмутда туриб айтганини таъкидлади.
Пушилин гўёки, Бахмутда юргани акс этган видеони Телеграм каналига жойлади.
Уруш шароитда Пушилинннинг бу иддаосини Озодлик мустақил текшириш имконига эга эмас.
Россия учун Бахмутни эгаллаш бутун Украина бўйлаб ҳужум қилиш имконини беради. Киев ва Ғарб эса Бахмут рамзий аҳамиятга эга эканлигини айтган.
The Washington Post: Миср Россияга яширинча 40 мингта реактив снаряд бермоқчи
The Washington Post хабарига кўра, Миср Россияга яширинча 40 мингта реактив снаряд етказиб беришни режалаган.
Нашр аниқлашича, АҚШнинг Яқин Шарқдаги энг яқин иттифоқчиларидан бири ва АҚШдан кўп ёрдам олувчи мамлакат бўлмиш Миср президенти Абдул Фаттоҳ Ас-Сиси яқинда ўз тобеларига Россияга махфий равишда жўнатиш учун 40 мингта ракета тайёрлаб қўйишни буюрган.
The Washington Post Пентагондан “сиздирилган” ҳужжатларга таянганини ёзган.
Айни пайтда Миср ташқи ишлар вазири Аҳмад Абу Зайд журналистлар саволларига жавоб бераркан, Миср ушбу можарода бетараф қолаётганини ва Россия билан Украинани ҳарбий ҳаракатларни тўхтатишга чақираётганини урғулаган.
"Ҳар бир парвоз охиргиси бўлиши мумкин"
28 яшар украиналик ҳарбий учувчи Дмитрий Шкаревский МиГ-29 қирувчи учоғини бошқаради.
– Биз, учувчилар учун ҳар бир парвоз охиргиси бўлиши мумкин, чунки ҳавода кутилмаган ҳолатлар кўп бўлади. Турли вазифаларни бажарганмиз. Бошида қўпорувчи гуруҳларни аниқлаш мақсадида разведка парвозларини амалга оширдик. Баъзан ракеталарга, “Шаҳид” дронларига ва ҲҲМ тизимларига зарба бериш учун ҳавога кўтариламиз. Гоҳида эса штурмчи учоқларимиз душманга зарба бераётган пайтда биз уларни пана қилиб турамиз, дейди ҳарбий учувчи Шкаревский.
2023 йилнинг февралида Россия ҚКнинг кенг кўламли ҳужуми чоғида Шкаревский бошқараётган учоқ зарба еган эди. Бироқ у тирик қолган.
Шкаревский уруш давомида 70 дан ортиқ марта жанговар парвоз қилган, Россиянинг “Калибр” русумли иккита ракетасини уриб туширган ва битта ҳаво ҳужумига қарши тизимни йўқ қилган.
-Ватанимга фойдам тегяпти, кўпчилик қила олмайдиган ишни қиляпман, бу ракеталар қаердадир портлаб, одамларни ўлдириши мумкин эди, мен бунга йўл қўймадим, деб жуда хурсанд бўлганман, албатта. Ҳар гал жанговар топшириқни бажариб, яхши натижага эришганингни билганингда бу бизни ғалабага бир қадам яқинлаштирганини ҳис этасан. Бу жуда ёқимли туйғу, дейди ҳарбий учувчи Шкаревский.