Украина артиллерия бўлинмаси Донецкда Россия қўшинларини нишонга олмоқда
Украина Донецк вилоятидаги фронт чизиғига артиллерия бўлинмаларини жойлаштирди..
Кеча Украина аскарлари Россия позицияларига Град ракеталари билан зарба берди.
«Ҳозир вазият кескин, аммо бизнинг кучлар барқарор ушлаб турибди. Душман олдинга силжишга уринмоқда. Лекин биз бор эканмиз, бундай бўлмайди, Биз душманни даф қиламиз”, дейди Украина аскари "Ворон".
Донецк вилояти ҳарбий маъмурияти раҳбари Павло Кириленконинг маълум қилишича, бир кун аввал Донецк вилоятида бир фуқаро ҳалок бўлган, яна бир одам яраланган.
"Бу тажовузкорларни ўз ҳудудларига олиб бориб, бутунлай тор-мор этиш керак. Аммо буни биз қиламизми йўқ, билмайман. Чунки уларда аллақачон ички сиёсий ўзгаришлар бошланган. Балки уларнинг мамлакати қулаши мумкин. Аммо, шуниси аниқки, русларни ҳудудимиздан бутунлай ҳайдаб чиқариш лозим”, дейди украин аскари Богдан.
Украина аскарлари Ғарбдан келган қуроллар русларга қарши курашда қўл келаётганини айтмоқда
Ғарбдан қурол-яроғлар келгач, Россия ҳужумларига қарши туриш бирмунча осонлашди, дейди украин ҳарбийлари.
Украина ғарб танклари, зирҳли техникалари устунлик беришига, об-ҳавонинг яхшиланиши эса олдинга силжишига имкон беришига умид қилмоқда.
«Биз Ғарбдан кўп қурол олдик. Баҳор мени хурсанд қиляпти. Умид қиламанки, ҳаммаси тез орада тугайди», дейди украин ҳарбийси Олександр.
Бўлинма зобити Олексей душман Украина кучларининг кучли қаршилигига дуч келганидан кейин ҳужумга ўтишга чўчиб қолганини айтади:
«Ҳужум бошлашса, бунга муносиб жавоб олишяпти, бу жуда яхши».
Украин аскарлари Россиянинг артиллерия ва ҳаво ҳужумлари камайганини билдирди.
«Русларнинг артиллерия ва ҳаво ҳужумлари аста-секин камаймоқда. Бу эса уларда ўқ-дори захираси камайиб бораётганини кўрсатади”, — дейди Андрей исмли украин аскари.
Россия мусулмон ҳарбий асирларни алмаштиришдан бош тортди
Рамазон ойи муносабати билан Украина Россияга ислом динига эътиқод қилувчи ҳарбий асирларни “барчани барчага” принципи бўйича айирбошлаш таклифи билан чиққан, аммо Россия таклифдан бош тортган.
Бу ҳақда “Америка овози” билан интервьюсида Украина президенти офиси раҳбарининг коммуникациялар бўйича маслаҳатчиси Дарья Заривна сўзлаб берди.
“Биз ислом маданияти ва анъаналарига ҳурмат белгиси бўлсин учун қўлимиздаги мусулмон асирларни сонидан қатъий назар “барчани барчага” принципи бўйича алмашишни таклиф қилгандик. Афсуски, Россия таклифга рўйхушлик бермади”, деган Заривна.
Россия Украина президенти офиси вакилининг сўзларига изоҳ бергани йўқ.
Босиб олинган ҳудудлардан олиб кетилган 31 бола Украинага қайтарилди
Мураккаб қутқарув миссиясидан сўнг Беларусдан Украинага келтирилган болаларни ота оналар кўз ёшлари билан қарши олди.
Ўтган йили Даша Ракк синглиси билан Россия босиб олган Херсондан Қримдаги оромгоҳга бир неча ҳафтага кетишга рози бўлган. Бироқ Россия расмийлари болаларга у ерда анча вақт қолишларини айтишган
«Улар бизни асраб олишларини, васийликка олишларини, айтишди. Бизга узоқ муддат қолишимизни айтишганида, ҳаммамиз йиғлай бошладик», дейди Даша.
Дашанинг онаси Наталянинг айтишича, у қизларини қайтариб олиш учун Украинадан Полша, Беларус ва Москва орқали Қримга борган. Украинанинг Қрим ярим ороли 2014 йилда Россия томонидан аннексия қилинган.
«Жуда қийин бўлди, лекин биз тўхтамадик, кечалари ухламадик, ўтириб ухлаган кунларимиз бўлди.У ерда қолган болаларнинг кўзёши одамнинг юрагини эзади», дейди она Қримдаги лагерга қилган саёҳатини тасвирлаб.
Украинанинг ҳисоб-китобларига кўра, ўтган йилнинг февраль ойида бошланган босқинидан кейин Қримга 19,5 мингга яқин украиналик бола олиб кетилган. Киев буни ноқонуний депортация сифатида қоралаб келади.
Россия эса болалар ўғирланганини рад этиб, болалар эвакуация қилинганини иддао қилиб келади.
«Ҳозир бешинчи қутқарув миссияси якунланиши арафасида. Бу миссия мураккаблиги ва қутқарилган болалар сони бўйича алоҳида аҳамиятга эга бўлди. Беш ой ичида беш марта жойини ўзгартирган болалар бор. Уларнинг баъзилари каламуш ва сувараклар билан яшашга мажбур бўлган», деди «Украинани қутқариш» инсонпарварлик ташкилоти асосчиси Никола Кулеба.
Россия Ташқи ишлар вазирлиги изоҳ бериш сўровига жавоб бермади.