Украинада ногиронлар сони 3 млнга етди
Россиянинг тўлақонли босқини бошланганидан бери Украинада ногиронли бор кишилар сони 300 минг кишига ортди, дея маълум қилмоқда Украина ижтимоий сиёсат вазири Оксана Жолнович.
“Бугунги кунда Украинада улар сони 3 миллион кишини ташкил қилади. Бир ярим йил аввал 2,7 миллион эди”, деди Жолнович хоним.
Август ойи бошларида АҚШнинг The Wall Street Journal нашри протезлар ишлаб чиқаришда дунёда энг йирик бўлмиш Ottobock ширкати (Германия) маълумотига таянган ҳолда, тўлақонли урушнинг ўн етти ойи мобайнида қарийб 50 минг нафар украиналик қўл ва оёқларидан ажралиб, ногирон бўлиб қолгани ҳақида ёзган эди. WSJ мақоласида айтилишича, ампутант (қўли ёки оёғи кесилган) ногиронларнинг ҳақиқий сони кўпроқ бўлиши мумкин, чунки протезлаш вақт талаб қилади, айрим беморлар эса ампутацияни ҳафталаб ёки ҳатто ойлаб кутадилар.
Албания Бош вазири Россия вакили Небензяга жавоб берди
Украина президенти Владимир Зеленскийнинг БМТ Хавфсизлик кенгаши йиғилишида биринчи чиқиши олдидан Россия элчиси Василий Небензя кенгашнинг 15 аъзоси олдида унга сўз берилишига қарши чиқди:
“Шундай қарор қилинди” деган сўзни айтишга шошилдингиз. Иккита саволимиз бор эди. Биринчиси, аксарияти давлат ва ҳукумат раҳбарлари даражасида вакиллик қилувчи Хавфсизлик Кенгаши аъзолари сўзга чиқишдан олдин Украина Президенти Владимир Зеленскийга нима асосда сўз берилаётганини сўрамоқчи эдик?"
Сессияда раислик қилувчи Албания бош вазири Эди Рама Россия вакилига қисқа ва лўнда жавоб қайтарди.
"Бу ерда йиғилганлар ишонтириб айтмоқчиманки, бу Албания раислигидаги “махсус операция” эмас, балки Кенгашда ўрнатилган эски тартиб. Лекин, сиз кўп марта такрорлаганингиздек, бу ерда қоидабузарлик президент Зеленскийнинг кенгаш аъзолари олдида нутқ сўзлаши билан боғлиқ экан. Бунинг ечими бор. Агар рози бўлсангиз, сиз урушни тўхтатасиз ва президент Зеленский мутлақо сўзга чиқмайди", деди Албания бош вазири.
Небензя сессия шоуга айлантирилганини айтиб, Рамани ўрнатилган тартибнинг нейтрал қўриқчиси позициясидан чекинганликда айблади.
Саки аэродромига украин дронлари ва ракеталари ташланди
Рус ОАВлари маҳаллий аҳоли маълумотига таяниб хабар қилишича, Қримнинг Симферопол, Жанкой, Саки, Новофёдоровка ва Евпатория шаҳарлари устида дронлар кузатилган. Урушни қўллаб-қувватловчи ҳарбий мухбирларнинг “Военкоры Русской весны” телеграм-канали ушбу ҳужумни кенг кўламли деб атади.
Эрталаб УНИАН нашри Украина хавфсизлик хизматидаги манбаларига ҳавола берган ҳолда украин армияси оккупация қилинган Қримдаги “Саки” ҳарбий аэродромига ялпи зарбалар берганини тасдиқлади.
Манбага кўра, 21 сентябрга ўтар тунда аэродромда камида 12 та жанговар учоқ (Су-24 ва Су-30), шунингдек “Панцирь” кўчма зенит-ракета комплекси бўлган (Озодлик ушбу маълумотни ҳозирча тасдиқлай олмайди). Шунингдек, аэродром ҳудудида “Mojaher” дронлари операторларини тайёрлаш базаси ҳам жойлашган.
Украина расмийларидан бири “аввалига камикадзе дронлар Россия Ҳаводан мудофа тизимини чалғитди, шундан сўнг “Нептун” ракеталари учирилган”, дея маълумот берди. Россия Мудофаа вазирлиги аэродромга ракеталар билан зарба берилганини тасдиқлагани йўқ.
Киевга ракета ҳужумлари
Киевга қилинган ракета ҳужумлари натижасида 7 киши яраланди, жумладан икки бола.