Байден келаси ҳафта Оқ уйда Зеленский билан учрашади
АҚШ президенти Жо Байден Украина президенти Владимир Зеленскийни 21 сентабр пайшанба куни Оқ уйда қабул қилади. АҚШ келгуси ҳафтада Украинага қўшимча ёрдам берилишини ҳам эълон қилиши кутилмоқда, деди Оқ уй миллий хавфсизлик бўйича маслаҳатчи Жек Салливан.
"Президент Байден пайшанба куни Украина президенти Зеленскийни Оқ уйда қабул қилиш учун Вашингтонга қайтади. Ва бу уларнинг Оқ уйда учинчи учрашуви бўлади”, деди Салливан.
Америкадаги баъзи нашрлар ташриф чоғида Қўшма Штатлар Украинага 300 километргача учадиган АТАCМS ракеталари етказиб берилишини эълон қилиши ҳақида хабар қилган эди.
Аммо, манбаларга кўра, Зеленскийнинг Вашингтонга бўлажак ташрифи чоғида АҚШ Украинага узоқ масофали ракеталарини топширишни эълон қилишни режалаштирмаяпти.
Аввалроқ, Америкадаги бир қанча нашрлар Байден маъмурияти уларни етказиб бериш бўйича қарор қабул қилишга яқин экани ҳақда ёзган эди.
Зеленский: Россия ҳаво ҳужумидан мудофаа тизими йўқ қилинди, бу жуда муҳим!
Украина президенти Владимир Зеленский Украина қуролли кучлари аннексия қилинган Қрим ярим оролида Россия ҳаво ҳужумидан мудофаа тизимини йўқ қилганини олқишлади.
Зеленский ўзининг тунги видеомурожаатида Украина Хавфсизлик хизмати ва денгиз кучларининг бутун таркиби ҳақида алоҳида тўхталди.
"Украина Хавфсизлик хизматининг бутун таркибини, шунингдек, денгиз кучларимизни алоҳида табриклайман. Бугунги "ғалаба" учун сизга раҳматлар айтаман - босқинчиларнинг Қрим заминидаги ҳаво ҳужумидан мудофаа тизими йўқ қилинди. "Бу жуда муҳим! Украина учун курашаётганларга шон-шарафлар!"
Украина ҳарбийлари пайшанба куни босиб олинган Қрим ғарбидаги Евпатория шаҳри яқинидаги Россия ҳаво ҳужумидан мудофаа тизимларига тунда узоқ масофадан ҳужум уюштирганини маълум қилган.
Россия Мудофаа вазирлиги баёнотида, ҳаво ҳужумидан мудофаа кучлари 2014 йилда Украинадан тортиб олинган ярим орол устида бир кечада 11 та учувчисиз учоқни уриб туширганини билдирди ва ҳеч қандай зарар ҳақида айтмаган.
Россиянинг “Самум” кемасига зарар етказишга муваффақ бўлган
Украина, афтидан, Россиянинг “Самум” кемасига зарар етказишга муваффақ бўлган.
Шанба куни эрталаб Украина телеграм каналларида Севастопол портига олиб кетилаётган кеманинг тасвирлари пайдо бўлди.
Видеонинг олинган санаси маълум эмас.
14 сентабр куни “Самум”га денгиз дрони билан ҳужум қилиш уриниши бўлганини Россия Мудофаа вазирлиги тасдиқлаганди. Аммо, вазирлик ҳужум қайтарилгани, кемага зиён етмаганини даъво қилиб чиққанди.
Украина хавфсизлик хизмати кемага экспериментал “Sea baby” деб аталувчи экспериментал дрон билан ҳужум қилинганини билдирган.
Москвада дрон ҳужумлари сабаб парвозлар кечиктирилган
Россия Мудофаа вазирлиги Украинанинг навбатдаги дрон ҳужумини “бостирганини” маълум қилди.
Россия томони иддаосича, дронлар Калуга ва Твер вилоятлари устида "йўқ қилинган".
Москва аэропортларида 30 та рейс кечиктирилган, яна 4 таси бекор қилинган.