Халқаро Жиноят Суди Лукашенкони ҳибсга олиш ордерини берадими?
Европа суди 13 сентябрь куни Ҳаагадаги Халқаро жиноят судини Беларусь диктатори Александр Лукашенкони ҳибсга олишга ордер бериш чақириғи акс этган резолюция учун овоз берди. Ҳисоботда Лукашенко Россия президенти Владимир Путин билан бир қаторда Украинага қарши урушга алоқадор экани айтилган. Бу ҳақда Европарламент сайти орқали маълум қилинган.
Резолюцияга кўра, Европарламент Лукашенко режимининг “Россиянинг Украинага қарши ноқонуний ва асоссиз уруши”даги иштирокини ҳамда “Москванинг жанговар риторикасини такрорлайдиган нафрат сўзлари, дезинформация ва ташвиқотни рағбатлантириши”ни қоралайди. Бундан ташқари, Европа парламенти Лукашенко режимини "Россия армиясига катта миқдордаги ўқ-дорилар ва ҳарбий техника етказиб бериш", Россия қўшинларини Белоруссияга жойлаштириш ва тайёрлаш, Россия томонидан ҳомийлик қилинган"Вагнер" "террорчи ташкилоти" фаолиятини рағбатлантириш учун қоралади.
Европа парламенти, шунингдек, Лукашенко режимини ишғол қилинган Украина ҳудудларидан 2150 нафар бола, жумладан, етим болаларни Беларусдаги соғломлаштириш лагерларига ноқонуний олиб чиқиб кетишга алоқадор , улар “руслаштириш” ва “мафкуравий босимга”га учрамоқда деб ҳисоблайди. Резолюцияда қайд этилишича, Рим статутига кўра, бу “депортация ёки аҳолини мажбуран кўчириш” сифатида баҳоланиши мумкин.
Ҳаагада жойлашган Халқаро жиноят суди жорий йилнинг март ойида Россия президенти Владимир Путин ва болалар омбудсмени Мария Львова-Беловани ҳибсга олишга ордер берган эди. Ордер берилишига Путин ва Львова-Белова Украинадан болаларни ноқонуний равишда депортация қилганликда гумонлангани асос бўлган.
Роскомнадзор Қирғизистоннинг 24.kg ва Тожикистоннинг “Паем” нашрлари сайтларини блоклади
Роскомнадзор Россиянинг Украинага қарши тўлақонли босқинига бағишланган материаллар эълон қилгани учун Тожикистоннинг “Паем” ва Қирғизистоннинг 24.kg нашрлари сайтларини блоклаб қўйди.
Фақат айрим саҳифаларга кириш чекланиши айтилган бўлса-да, сайтлар бутунлай блокланган. Россия ҳудудидан уларга VPN билангина кириш мумкин. Ҳолбуки, Роскомнадзор санкциясида провайдерлар муайян саҳифаларнигина блоклаши керак эди.
Севастополда урилган рус кемалари суратлари пайдо бўлди
13 сентябр куни Қримнинг Севастопол шаҳридаги кемасозлик заводига Украина ракета ҳужумидан олдин ва кейин олинган сунъий йўлдош тасвирлари Интернетда пайдо бўлди. Украина расмийларининг таъкидлашича, Россия ҳарбий-денгиз кучларининг иккита кемаси, Минск десант кемаси ва Ростов-Дон дизел-электр сув ости кемаси жиддий зарар кўрган.
Россия Мудофаа вазирлиги баёнотида Украина эрта тонгда Қора денгиздаги денгиз кемасозлик заводига 10 та қанотли ракета ва 3 тезюрар сувусти дрон билан ҳужум қилиб, таъмирдан ўтаётган икки денгиз кемасига зарар етказгани айтилади.
Баёнотда келган ракеталарнинг 7-си уриб туширилгани ва ҳужумчи қайиқлар Россия патрул кемаси томонидан йўқ қилингани айтилган. Кейинроқ рус қўмондонлиги иккита кемаси тўлиқ таъмирланиб, хизматга қайтиши, Киев иддаолари асоссиз эканлигини билдирди.
Defense Express нашри тарихда биринчи марта Севастополга Украина қанотли ракеталарининг сув ости кемасини йўқ қилиш учун ишлатилганига эътибор қаратди.
Очиқ манбалардан олинган маълумотга кўра, Ростов-Дон дизел-электр сув ости кемасининг 300 млн долларга баҳоланган.
Зеленский: Украинада келгуси йил энг кам иш ҳақи миқдори оширилади
Владимир Зеленский Украинада келгуси йил энг кам иш ҳақи миқдори оширилади, деди.
"Мен бош вазирга келаси йилнинг биринчи ярмида Украинада энг кам иш ҳақини ошириш учун асос тайёрлашга топшириқ бердим. Давлат ишининг барча элементлари урушнинг давом этишига қараб мослаштирилиши керак. Ғалаба бизники бўлади. Қуролларимиз билан Украина учун зарур бўлган барча мақсадларга эришамиз. Украиналикларни керакли иш жойлари билан таъминлай оладиган иқтисодиётимиз бўлади. Давлатнинг ижтимоий функциялари бажарилиши керак. Давлатнинг вазифалари, айниқса рақамли хизматлар Европанинг исталган давлатидан кўра замонавийроқ бўлиши керак. Буларнинг барчаси Украина ғалабасини яқинлаштирадиган воситалардир", деди Украина президенти.
Зеленский, шунингдек, Украина қурол ишлаб чиқариш учун мудофаа буджетини ошираётганини айтиб, бу учун 100 миллиард гривна ёки 27 миллион АҚШ доллари ажратилишини эълон қилди.