Украина ҚК бир нечта йўналиш бўйича илгари сурилганини айтмоқда
Украина Қуролли Кучлари Бош штаби Украина Қуролли Кучларининг Запороже вилоятида, Новоданиловка-Вербове йўналишида олға силжиши ҳақида хабар берди. Хабарда айтилишича, украиналик ҳарбийлар “босиб олинган линияларда мустаҳкамланган”. Бундан ташқари, Донетск вилоятида - Бахмут йўналишида Украина Қуролли кучларининг ҳужум операциялари давом этмоқда.
Украин жангчилари Днепрнинг ўнг қирғоғида байроқ ўрнатаётгани видеосини ёйинлади.
Бош штаб шунингдек, Россия миномёт ва артиллериядан Суми, Чернигов, Запорожье ва Херсондаги аҳоли пунктларини ўққа тутганини тасдиқлади.
29 август - Украинада ҳалок бўлган Украина ҳимоячилари хотираси куни нишонланмоқда
9 йил аввал айнан шу куни рус қўшинлари Иловайск яқинидаги қамалдан чиқиб кетаётган Украина ҳарбий колонналарини оғир қуроллардан ўққа тутган эди.
Украина аскарлари хотирасини қадрлаш куни 2019 йилда президент Владимир Зеленскийнинг фармони билан таъсис этилган.
Украинадаги уруш 9 йилдан бери давом этмоқда, кенг кўламли босқинчилик бошланганига эса 1,5 йил бўлди. Бу вақт ичида жанговар ҳаракатлар туфайли минглаб Украина фуқаролари ҳалок бўлди. Украина аниқ ҳарбий йўқотишларни ошкор этмай келади – бу ҳарбий сир.
Бу куни Украинанинг ҳар бир шаҳрида вафот этган ҳарбий хизматчи қаҳрамонлар хиёбонларида ва ибодатхоналарда шарафланади.
Полтавадаги ҳужумда 3 киши ҳалок бўлди
28 августга ўтар кечаси Россия кучларининг Полтава вилояти Гоголево посёлкасидаги нефт корхонасига ҳужумида камида уч киши ҳалок бўлган.
Бу ҳақда Украина Ички ишлар вазири Игорь Клименко Телеграмда маълум қилди. Украина президенти идораси раҳбари Андрей Ермакка кўра, ҳужумда тунги сменада ишлаётган 5 киши жабрланган.
Хабарларга кўра, Россия ҳужуми оқибатида ишлаб чиқариш цехи бутунлай вайрон бўлган.
Россия томони эса қурол-аслаҳа омборини нишонга олганини даъво қилмоқда.
Россия фуқаролигини олмоқчи бўлган мигрантларга Мудофаа вазирлиги билан шартнома тузиш талаби қўйилмоқда
Калуга вилоятида мигрантлардан Россия Мудофаа вазирлиги билан шартнома имзолаш талаб этилмоқда. Акс ҳолда уларнинг фуқароликка кириш учун тўплаган ҳужжатлари қабул қилинмаяпти.
Мазкур муаммога, асосан Марказий Осиё мамлакатларидан келган мигрант эркаклар дуч келишмоқда, аммо украиналик камида бир қочқин ҳам шундай талабнома олгани маълум, деб ёзди "7х7" нашри ҳуқуқ фаоли Татьяна Котлярга иқтибосан.
Суҳбатдошга кўра, Калуга вилоятида мигрантларнинг фуқароликка ўтиш учун ҳужжат топшириши билан боғлиқ муаммолар апрель ойида бошланган, март ойида “ҳужжатларни қабул қилиш ва паспорт беришда бирон қийинчилик бўлмаган”.
Шунингдек, ҳуқуқ фаоли масъул мулозимлар ҳатто тайёр паспортларни беришни ҳам пайсалга солаётганини айтмоқда.
“Миграция бўлимида фуқаролик олиш учун ҳужжат топшираётганлар жуда кўп, айниқса Тожикистон фуқаролари. Россия паспортини олишга талабгор аёлларнинг ҳужжатларини гап-сўзсиз қабул қилишяпти, аммо эркакларнинг барчаси ҳарбий комиссариатларга юборилмоқда.
Тунов куни Калугада яшовчи танишимни учратиб қолдим. У бир ҳафта олдин ҳужжатларини олиб борганини, лекин қабул қилишмагани ва ҳарбий комиссариатга йўллашганини айтди”, дейди Котляр.
Харьков вилоятидан бўлган Никита Петров Калуга вилоятида вақтинчалик бошпана олган, кейинроқ эса Россия фуқаролигига ўтиш учун ҳужжат топширганди.
Обнинск тумани полициясида ундан урушда иштирок этиш учун Мудофаа вазирлиги билан шартнома тузгани ҳақида маълумотнома келтиришни сўрашган.
Шундан сўнг Петров фуқаролик ўрнига яшаш рухсатномаси олиш учун ҳужжат топширишга қарор қилган.