Австрия собиқ ташқи ишлар вазири Рязан вилоятидаги базмда кўриниш берди
Россия билан яқин алоқалари туфайли танилган Австрия собиқ ташқи ишлар вазири Карин Кнайсл ўтган ҳафта Рязан вилоятидаги базмда кўриниш берди.
Кнайсл маҳаллий матбуотга берган интервьюсида Петрушово қишлоғида уй ижарага олгани ва у ерда бир ой қолишни режалаштирганини билдирди.
Кнайсл рус тилини ўрганаётгани ҳамда китоб ёзаётганини қўшимча қилган.
2018 йилда Кнайсл тўйида Россия президенти Владимир Путин қатнашиб, у билан бирга рақсга тушгани учун қаттиқ танқид қилинган.
Карин Кнайсл шунингдек, 2022 йилгача Россия нефть гиганти Роснефт директорлар кенгаши аъзоси бўлиб ишлаган. У Украинага босқин бошланишидан бироз олдин истеъфога чиққан.
Россия Мудофаа вазири: Россия ўзининг ғарбий чегараларига қўшимча қўшин жойлаштиради
Россия мудофаа вазири Сергей Шойгу Финляндия АҚШ бошчилигидаги НАТО иттифоқига қўшилиши ортидан Россия ўзининг ғарбий чегараларига қўшин жойлаштиришини айтди.
Шойгу мудофаа вазирлиги йиғилишида НАТОга аъзо Полша ўз армиясини кучайтириш режаларини аллақачон эълон қилганини, Финляндияда эса НАТО ўз базасини жойлаштириши кутилаётганини таъкидлади.
"Шойгу Финляндиянинг НАТОга киргани, Швециянинг эса келгусида альянсга қўшилишини «беқарорлаштирувчи жиддий омил» деб атади. Финляндия ва Швеция ўтган йил Россия Украинага бостириб киргандан сўнг, узоқ йиллик бетарафлик сиёсатидан воз кечиб НАТОга аъзо бўлиш истагини билдирди.
Унинг сўзларига кўра, Полша қитъада энг қудратли армия қуриш ниятини эълон қилган ҳолда, «АҚШнинг Россияга қарши сиёсатининг асосий қуроли»га айланган.
Шойгу НАТОнинг Шарқий Европада жойлашган ҳарбийлари сони ўтган йилнинг февраль ойидан буён икки ярим баробарга ошгани ва ҳозир уларнинг умумий сони 30 минг кишига етганини урғулади.
Германиядан Украинага қўшимча Patriot лар
Германия ва Украина Киевга қўшимча Patriot зенит-ракета комплексларини етказиб беришга келишиб олди, деди Украина президенти Владимир Зеленский 9-август, чоршанба куни кечки мурожаатида.
“Бугун Германиядан келган хушхабар - биз Олаф Шолц билан келишилган айни нарсадир. Қўшимча Patriot тизимлари етиб келди. Катта раҳмат, Олаф, бу бизнинг халқимизни рус терроридан ҳимоя қилиш учун керак. Германия, шахсан канцлерга ушбу келишувни амалга оширгани учун раҳмат - бу, албатта, халқимизнинг минглаб ҳаётини сақлаб қолади. Бу, албатта, бизни Украина учун тўлақонли ҳаво қалқонини яратишга яқинлаштиради. Бу одамларга, шаҳарларга, қишлоқларга ёрдам беради”, деди Владимир Зеленский.
Чоршанба куни Германия Украинага яна иккита Patriot ракетасини жўнатишқарорини эълон қилган эди.
Янги ҳарбий ёрдам пакетига, шунингдек, 10 та Bandvagn 206 занжирли вездеходлар, 6,5 минг 155 мм артиллерия снарядлари, портловчи ўқ-дориларни зарарсизлантириш материаллари, 5 та транспорт воситаси, 4 та ВЕКТОР разведкачи дрони, дурбинлар, тягачлар, ярим тиркама ва юк тушириш транспорт воситалари, 100 MG5 пулемётлари ва 40 минг дона тиббий аптечкалар киради.
2022 йилда Россияда сўнгги ўн йилликда энг кўп портлашлар содир бўлган
Россия ФВВ маълумотида турар-жой бинолари, омборлар ва шахталар портлагани қайд қилинган. Статистикада Қрим кўприги ҳам тилга олинган. Портлашлар натижасида 55 киши ўлиб, 10 647 киши жабрланган.
Энг кўп ҳолларда портлашларга портловчи буюмлар, яъни ракета, граната, бомба ва миналар сабаб бўлгани айтилади.
2013 йилдан 2022 йилгача Россия ФВВ ҳар йили кўпи билан 20 та портлаш ҳодисасини қайд этиб келган, уларда жабр кўрганлар сони минглаб кишини ташкил қилади.