Украинада рус шоири ва генерали бюстлари олиб ташланди
Полтавада рус шоири Александр Пушкин ва Совет генерали Николай Ватутин ёдгорликлари демонтаж қилинди.
Пушкин бюсти Полтавада Совет даврида ўрнатилган. 1944 йилда Украина қўзғолончилар армияси (УПА) бўлинмалари билан тўқнашувда яраланганидан кейин вафот этган Николай Ватутин ҳайкали 2013 йилда ўрнатилган. Ўшандан бери маҳаллий аҳоли уни бузиб ташлашни талаб қилиб келган.
Полтава ҳокимияти Совет генерали Алексей Зигин ҳайкалини ҳам демонтаж қилмоқчи.
Россиянинг кенг миқёсли босқини бошланганидан сўнг Украинада Россия ёки Совет Иттифоқи билан боғлиқ бўлган аҳоли пунктлари, кўчалар, майдонлар ва боғлар номлари ўзгартирилмоқда, шунингдек, ёдгорликлар олиб ташланмоқда. Олдинроқ Харьковда шоир Пушкин ва маршал Георгий Жуков ҳайкали, Одессада Суворов ва Екатерина II бюстлари олиб ташланганди, Киевда эса Она Ватан монументидаги СССР герби демонтаж қилинмоқда.
Шу йилнинг Март ойида Украина Олий Радаси Россия билан боғлиқ номларни географик объектларга беришни тақиқловчи қонунни қабул қилганди.
Зеленский Днепрга ташриф буюрди
27 июл куни президент Владимир Зеленский жанг майдонидаги вазият, қўшинлар таъминоти ва ҳаво ҳужумидан мудофаа тизимини мустаҳкамлаш чораларини муҳокама қилиш учун Украина жануби-шарқидаги Днепр шаҳрига ташриф буюрди.
Зеленский ҳукумат қўшинларни ўқ-дорилар билан таъминлашга катта эътибор қаратаётганини айтди. У маҳаллий касалхонага ҳам ташриф буюрди.
“Сизларни Тиббиёт ходимлари куни билан табриклайман. Ўғил-қизларимизнинг ҳаётини сақлаб қолаётганингиз, бутун вақтингизни, ҳаётингиз ва соғлигингизни жангчиларимизни даволашга сарфлаётганингиз учун ташаккур билдираман”, деди Украина президенти.
Зеленский, шунингдек, яқинда 50 ёшни қаршилаган ВСУ бош қўмондони генерал Валерий Залужнийни пистолет билан тақдирлади.
Минтақа пойтахти Днепр шаҳрида урушдан олдин 1 миллионга яқин аҳоли яшаган, 2022 йил 24 февралда Россиянинг кенг кўламли босқинидан кейин шаҳар Украина учун логистика ва гуманитар марказига айланди.
27 июл куни кечқурун Россия армияси Украинага 43 ракета билан ҳужум қилди
27 июл куни кечқурун Россия армияси Украинага йирик ракета ҳужумини амалга оширди: ҳужумда учта Калибр ракетаси, 36 Х-русумли ракеталар ва 4та Кинжал ракетаси иштирок этган. Украина ҳаво мудофааси 36 та ракетани уриб туширишга муваффақ бўлганини хабар қилди, Киевда кучли портлаш қайд этилди. Ҳужумга Хмелницкий вилоятидаги ҳарбий аэродром учради: у ердан украинлар Қримдаги нишонларга "Сторм Шадоw" ракеталарини учирган.
Одесса вилоятидаги порт инфратузилмасига рус ракетаси урилди, бир киши ҳалок бўлди. Вилоят ҳарбий бошқармаси бошлиғи Олег Киперга кўра, “Калибр” ракеталари Қора денгиздаги сув ости кемасидан учирилган.
Украина хавфсизлик хизмати ўтган йилги Қрим кўпригидаги портлаш учун жавобгарликни ўз зиммасига олди
"Кўплаб махсус операциялар амалга оширилди. Уларнинг баъзилари ҳақида ғалабадан кейин очиқ ва баланд овозда гапирамиз, қолганларини эса очиқлай олмаймиз. Ўтган йилнинг 8 октябрида бизнинг операциямиз натижасида Қрим кўприги вайрон бўлди”, деди Васил Малюк, Украина Хавфсизлик хизмати раҳбари.
Ўтган йилнинг 8 октябрида 19 км узунликдаги Қрим кўприги юк машинаси портлаши оқибатида вайрон бўлган эди.
Россия президенти Владимир Путин мазкур портлашни "ўта муҳим фуқаролик инфратузилмасини йўқ қилишга қаратилган террорчилик ҳаракати" деб атаган.