Запорожье АЭСнинг сўнгги реактори тўғон ўпирилиши туфайли тўхтатилди
Запорожье АЭСнинг ишлаб турган охирги реактори Каховка ГЭС тўғони ўпирилиши ортидан вужудга келган вайронкор тошқин манзарасида хавфсизликни таъминлаш учун пайшанбадан бошлаб “совуқ тўхтов” режимига ўтказилди, дея маълум қилмоқда Украинанинг “Энергоатом” давлат ширкати.
Каховка сув омбори Запорожье АЭСнинг совитиш тизимини сув билан таъминлайди. Сешанба куни ГЭС тўғони ўпирилиши тўғонда сув сатҳи пасайиб кетишига ва атрофдаги ҳудудларни қалин сув босишига олиб келган эди.
Украина ва Россия тўғондаги ҳалокат учун бир-бирини айблади.
Украина жанубидаги Запорожье АЭС Европанинг энг йирик атом электр станцияларидан бири бўлиб, айни пайтда уни Россия назорат қилмоқда. Тўғон ўпирилганидан сўнг станциянинг олти реакторидан бештаси бирин-кетин тўхтатилган эди.
Мазкур ҳолатда барча бошқарув стерженлари ядровий бўлиниш реакциясини тўхтатиш учун реакторнинг фаол зонасига киритилади, реактор ичидаги босим ва ҳарорат эса тобора пасайиб, совитишда камроқ сув сарфлай бошлайди.
Шанба куни “Энергоатом” Запорожье АЭСда вазият барқарор ва назоратда эканини маълум қилган.
Волонтёрлар Днепрнинг сўл қирғоғида юзлаб одам йўқолганини айтишмоқда
Херсон вилоятининг Россия ишғол қилган қисми – Днепр дарёси сўл қирғоғидаги сув босган ҳудудларда 374 кишининг тақдири мавҳум бўлиб турибди. Бу ҳақда волонтёрларга таянган ҳолда “Агентство” нашри хабар қилмоқда.
Хабарга кўра, йўқолганлардан икки нафари катта эҳтимол билан, ҳалок бўлган. Волонтёрлар яна бир киши ўлганини тасдиқлаганлар.
Волонтёрлар координатори айтишича, 9 июнь куни сув босган ҳудудлардан бир неча ўн кишини олиб чиқиб кетишга муваффақ бўлинган. “Агентство” волонтёрлар харитасида 315 та мурожаатга “эвакуация қилинди” деб белгиланганини қайд этган.
Волонтёрлар базасида ҳозирда эвакуация қилиш сўралган 1700 дан зиёд мурожаат мавжуд, ҳар бир мурожаат бир неча кишидан тушган бўлиши мумкин.
Украинада 700 минг киши тоза ичимлик сувидан бебаҳра қолди
Каховка ГЭС тўғони вайрон бўлиши натижасида Украинада қарийб 700 минг киши тоза ичимлик сувисиз қолди.
Бу ҳақда Associated Press агентлигига берган интервьюсидаБМТ бош котибининг гуманитар масалалар бўйича ўринбосари Мартин Гриффитс маълум қилди.
Ичимлик сувидан бебаҳра одамлар Украина назоратидаги ҳудудларда ҳам, Россия ишғол этган туманларда ҳам бор.
Сув ифлослангани сабабли Херсон вилоятида сув ҳавзаларида чўмилиш ва балиқ овлаш, шунингдек ҳайвонларни суғориш ва маҳаллий сув манбаларидан ичиш учун сув олиш тақиқланган.
Гриффитсга кўра, БМТ Украина назорат қилаётган сув босган ҳудудларда 30 минг аҳолига ёрдам берган. Жойларда кўплаб волонтёрлар иш олиб бормоқда.
Россия ҳарбийлари эса ўз назоратидаги ҳудудларга БМТ вакилларини ўтказишмаяпти.
Трюдо: Украинанинг НАТОга аъзо бўлиши "жуда ижобий" қадам
Канада бош вазири Жастин Трюдо Киевга ташрифи чоғида Украинанинг НАТОга қўшилиши бўйича музокараларни қўллаб-қувватлашини билдирди:
"Канада ва бошқа кўплаб давлатлар вазият имкон берса Украинанинг НАТОга қўшилишини қўллаб-қувватламоқда. Бу бўйича давом этаётган музокараларга ижобий қарайман".
Трюдо, шунингдек, Канадада рўйхатдан ўтган Россияга тегишли юк самолётини мусодара қилиш ва Украинага бериш ҳаракати Ғарб давлатлари "Путин ва унинг шерикларини товон тўлашга жиддий ёндашаётганини" кўрсатади, дея таъкидлади.
Россияда рўйхатдан ўтган “Волга-Днепр” логистика компаниясига тегишли Антонов 124 самолёти Россия Украинага бостириб кириб, Канада Россия самолётлари учун ҳаво ҳудудини ёпиб қўйганидан бери Торонто Пирсон халқаро аэропортида сақланмоқда.
Трюдо Владимир Путиннинг Украина кучлари шарқий фронтда катта йўқотишларга учрагани ҳақидаги иддаоларини рад этар экан, Путин “ҳар гал гап бошлаганда, ёлғон гапиради”, дея фикр билдирди.
Трюдо Киевга ташрифидан аввалроқ Украинага 500 миллион долларлик янги ҳарбий ёрдам ажратилишини эълон қилган.