Зеленский: Халқаро ташкилотлар фалокат зонасида одамларга ёрдам бериши керак!
Украина президенти Владимир Зеленский халқаро ёрдам гуруҳлари Украинадаги Нова Каховка тўғони вайрон бўлиши оқибатларини бартараф этиш учун зудлик билан чора кўриши кераклигини айтди.
"Халқаро Қизил Хоч Қўмитаси каби ташкилотлар қутқарув операциясига зудлик билан киришини ва Херсон вилоятининг босиб олинган қисмидаги одамларга ҳам ёрдам бериши керак", деди Зеленский ўзининг кундалик видеомурожаатида.
“Агар халқаро ташкилот фалокат зонасида бўлмаса, бу унинг қобилиятсизлигини билдиради”, - деди Зеленский.
Зеленскийнинг айтишича, Украина жанубидаги рус қўшинлари томонидан босиб олинган ҳудудларда аҳоли сув, озиқ-овқат ва тиббий ёрдамсиз қолган ва бу ҳудудда қанча одам ҳалок бўлиши мумкинлигини айтиш қийин.
Украина бош вазири Бирлашган Миллатлар Ташкилоти, Халқаро Қизил Хоч ва бошқа ташкилотларни Россия босқинчи кучлари назорати остидаги ҳудудларда ҳеч қандай ёрдам олмаган Украина жанубидаги сув босган аҳолисига зудлик билан ёрдам беришга чақирди.
“Россия босқинчилари бу одамларга ёрдам беришга ҳаракат ҳам қилмаяпти, уларни ўлим билан юзма-юз қолдирган”, деди Денис Шмихал.
Тошқин юз минглаб аҳолини ичимлик сувидан маҳрум қилган, ўн минглаб гектар қишлоқ хўжалиги ерлари ботқоққа айланган, камида 500 минг гектар ер “чўлга” айланиш хавфи остида.
Россия ўзи назорат қилаётган Херсон вилоятининг кўплаб шаҳар ва қишлоқлари тўғон остидаги очиқ текисликларда жойлашган ҳудудларида фавқулодда ҳолат жорий қилди.
Украин кучлари Запорожье йўналишида жангларни давом эттирмоқда, Бахмутда ҳам илгарилаган
Украина кучлари Запорожье йўналишида келажакдаги жанглар учун муҳим стретегик позицияларни эгаллашга ҳаракат қилмоқда, дея билдирди украин кучлари вакили Валерий Шершен. Аммо, украин харбийси тафсилотларга тўхталмади.
Кеча тундан бери россиялик уруш тарафдори бўлган блогерлар Запорожьеда шиддатли жанглар кечаётгани ва Украина қўшинларининг Орехов шаҳридан жанубда Токмак шаҳри томон олдинга силжигани ҳақида хабар беришди.
Шу билан бирга, Украина кучлари Россия мудофаасининг биринчи чизиғини эгаллаб олгани ҳақида ҳам ёзди .
Айни пайтда содир бўлаётган воқеалар ҳақида мустақил маълумот олишнинг иложи йўқ. Украина қўмондонлиги одатда ўз қўшинларининг фаол ҳаракатлари ҳақидаги маълумот беришдан тийилади.
Бахмут йўналишида ҳам шиддатли жанглар давом этмоқда.
Украина кучлари Бахмут яқинида – шаҳар шимолида Берховка вилоятида ва жанубда Клещеевка вилоятида олдинга силжимоқда.
Бир неча ой давом этган шиддатли ҳужумдан сўнг рус қўшинлари Бахмутни эгаллаб олишди, аммо у ерда ҳужум ҳаракатларини тўхтади ва ҳозирда Украина кучлари муҳим стретегик тепаликларни эгаллаб, шаҳар яқинида қарши ҳужумга ўтмоқда.
Херсон вилоятида 600 кв.км. майдон сув остида
Украина фавқулодда хизматлари Украина жанубидаги Херсон вилоятида Каховка ГЭСи тўғонининг ёрилиши оқибатида юзага келган тошқин зонасида қолган минглаб аҳолини қутқариш ишларини давом эттирмоқда.
Қутқарувчилар ишига, хусусан, Россия кучлари назорати остидаги Днепрнинг чап қирғоғидан бўлаётган ҳужумлар, шунингдек, миналар билан боғлиқ хавфлар тўсқинлик қилмоқда.
Херсон вилояти ҳарбий бошқармаси бошлиғи Александр Прокудин пайшанба эрталаб сув тошқини даражаси ўртача 5, 5 метрдан ошганини айтди.
Минтақанинг 600 квадрат километри сув остида бўлиб, шундан 30 фоизга яқини ўнг қирғоқ, қолган қисми чап қирғоқдир, дейилади Прокудин ўзининг Телеграм-каналидаги хабарида.
Херсон вилояти аҳолисини эвакуация қилиш давом этаётгани ҳақида гапирар экан, вилоят раҳбари 8 июн эрталабгача хавфли ҳудудларни деярли 2 минг киши, энг кўп Херсоннинг Корабел туманидан – 1, 5 мингга яқин аҳоли тарк этганини айтди.
Россия Фавқулодда вазиятлар вазирлигининг хабар беришича, ўтган кун давомида департамент ходимлари сув босган ҳудудлардан 300 дан ортиқ одамни, жумладан, 70 нафар болани эвакуация қилишга муваффақ бўлган. Аввалроқ, ишғолчи ҳукумат чап қирғоқдан жами 4000 киши эвакуация қилинганини маълум қилган эди.
Украина давлат фавқулодда хизмати маълумотларига кўра, Украинанинг Каховка ГЭСи вайрон бўлганидан кейин сув босган ҳудудларида сув сатҳи кўтарилишда давом этмоқда, бироқ аввалгидан секинроқ. Департамент, шунингдек, Херсонда сув 5, 5 метрга кўтарилганини таъкидлади. Днепрнинг иккала қирғоғида 50 дан ортиқ аҳоли пунктлари тўлиқ ёки қисман сув остида қолган.
Эрдўғон Нова Каховка тўғонининг ёрилиши сабабларини текшириш учун халқаро комиссия тузишни таклиф қилди
Туркия президенти Украина ва Россия президентлари билан телефон орқали мулоқот чоғида халқаро комиссия тузишни таклиф қилди, деб ёзади Huuriyet нашри. Анқара раҳбари режасига кўра, унинг таркибига урушаётган томонлар, шунингдек, БМТ ва халқаро ҳамжамият экспертлари кириши керак.
Эрдўғон, унинг мамлакати нима бўлганини текшириш учун қўлидан келган барча ишни қилишга тайёр, деб ишонтирди, шунингдек, ғалла бўйича музокаралар муваффақиятига эътибор қаратди.
Владимир Зеленский Твиттерда Эрдўғоннинг чақириғи ҳақида бундай ёзди:
“У Россиянинг Каховка ГЭСидаги терактининг гуманитар ва экологик оқибатлари, хусусан, Запорижья АЭС учун хавфлар ҳақида гапирди ва Украинага фавқулодда вазиятларни бартараф этиш зарурияти рўйхатини топширди".