Россиянинг Украина билан чегарадош Белгород вилоятида портлашлар, камида икки киши ҳалок бўлган
Россиянинг Украина билан чегарасидаги Белгород вилояти, Шебекино шаҳарчасида жума кунги отишма пайтида икки аёл ҳалок бўлган, яна икки киши яраланган.
Бу ҳақда вилоят губернатори Вячеслав Гладков маълум қилди.
Гладков, шунингдек, Волоконовский ва Валуйский туманлари ҳам ҳужумга тутилгани, бунинг оқибатида хусусий уйлар ва бошқа объектлар зиён кўргани ҳақида хабар берди.
Ўз навбатида Украинада тузилган “Россия Озодлиги” легиони жума куни ўзининг Телеграм каналида ўз жангчилари Белгород вилоятида рейдларни давом эттираётгани, уларнинг нишони тинч аҳоли эмаслигини даъво қилмоқда.
Гуруҳ Белгород вилоятидаги Новая Таволжанка қишлоғида “Озод Россия” рамзлари туширилган танклари ҳаракат қилаётгани акс этган тасвирларни ҳам эълон қилди.
Рейтер агентлиги суратнинг геолокациясини аниқлади ва унинг ҳақиқатан ҳам Новая Таволжанканинг жанубий чеккасида олинганини тасдиқлайди.
Худди шу каналда эълон қилинган видеода шу ҳудудда содир бўлаётгани айтилаётган отишма акс этган.
"Легион" вакиллари рус қўшинлари бутун ҳудудларни артиллерия билан ҳужумга тутаётганини даъво қилмоқда: уларга кўра, рус қўшинлари Renault автомашинасини ҳужумга тутиб, уни ичидаги тинч аҳоли орасидан бўлган икки кишини ўлдирган.
Ҳарбий ҳаракатлар шароитида урушаётган томонлар иддаоларини мустақил манбалардан тасдиқлаш имконсиз.
Украина билан чегарадош Белгород, Брянск ва Курск вилоятлари маъмуриятларининг маълум қилишича, дронлар тунда ва эрталаб уларнинг ҳудудларига ҳужум қилган.
Бу ҳақда сўнгги пайтларда биринчи марта Беларус билан чегарадош Смоленск вилояти раҳбари ҳам маълум қилди.
"Бугун, тахминан соат 03: 00да Починковский тумани Пересна қишлоғида ва Смоленск туманидаги Диваси қишлоғида иккита узоқ масофали учувчисиз учоқ ёнилғи-энергетика комплекси объектларига ҳужум қилди. Қурбонлар ва жароҳатланганлар йўқ. жиддий зарар ва ёнғинлар ҳам йўқ”, — деб ёзди Смоленск вилояти губернатори Василий Анохин.
База нашрига кўра, камикадзе дронлари нефтни қайта ишлаш заводи ва газ тақсимлаш станциясига ҳужум қилган.
“Транснефт” нефтни қайта ишлаш заводи ҳудудида битта дрон портлади. Ярим соатдан кейин яна бир дрон газ тақсимлаш шохобчасига урилди, деб ёзади База нашри Телеграм каналида.
Курск вилояти раҳбари Роман Старовоитнинг маълум қилишича, кеча тунда Курск ҳаво ҳужумидан мудофаа тизими яқинида бир нечта учувчисиз самолётлар уриб туширилган. Унинг сўзларига кўра, дрон ҳужуми қурбонлари бўлмаган, кўп қаватли уйнинг кириш қисми ва яна бир қанча хусусий уйлар зарар кўрган.
Россия ғалла келишувига тўсқинлик қилмоқда
Украина расмийларига кўра, Россия яна Қора денгиз бўйича БМТ томонидан қўллаб-қувватланган ғалла келишувига тўсқинлик қилмоқда.
Киев 1 июн, пайшанба куни Москвани Украинанинг барча портларига кемаларни рўйхатга олишни тўхтатганликда айблади.
Бирлашган Миллатлар Ташкилоти вакилининг айтишича, Россия расмийларга Украинанинг Одесса вилоятидаги Пивденний портида рўйхатга олишни чеклашини айтган.
Бирлашган Миллатлар Ташкилоти ва Туркия ўтган июл ойида Қора денгиз дон ташаббусига воситачилик қилган эди.
Бу ташаббус ғалла экспортчиси бўлган Россиянинг Украинага бостириб кириши оқибатида янада оғирлашган глобал озиқ-овқат инқирозини енгиш учун мўлжалланган.
Россия май ойида шартномани икки ойга узайтиришга рози бўлди.
Аммо энди у ўз ғалла ва ўғитларини экспорт қилиш йўлидаги тўсиқларни бартараф этиш бўйича келишув бажарилмаса, битимни тўхтатишини айтмоқда.
Бирлашган Миллатлар Ташкилотининг таъкидлашича, апрелдан майгача кемалар жўнаб кетишида "доимий секинлашув" кузатилган.
Шунингдек, кемалар учун ўртача кунлик текшириш даражаси учга тушгани айтилган.
Украина вазирлигининг таъкидлашича, Россия май ойининг сўнгги икки кунида фақат битта кирувчи кемани текшириш учун рўйхатдан ўтказган.
Бу ташаббуснинг "қўпол бузилиши" деб аталган. Россия вазирлик баёнотига изоҳ бермади.
Киевнинг билдиришича, 50 та кема Туркия сувларида текширувдан ўтишни кутиб, 2, 4 миллион тонна Украина озиқ-овқатини хорижга етказиб беришга тайёр.
Баъзи кемалар 3 ойдан ортиқ текширувларни кутишган.
Киевга ракета ҳужумлари, 15 та ракета ва 21 та дроннинг барчаси уриб туширилган
Россия Украина пойтахти Киевга кетма-кет олтинчи кундирки ракета ҳужуми уюштирмоқда.
Украина расмийлари 2 июнь куни мамлакатнинг ҳаво ҳужумидан мудофаа кучлари пойтахт Киев осмонида 15 та ракета ва 21 та дроннинг барчасини уриб туширганини билдирди.
Украина Бош прокуратураси 2 июнь куни ҳужумларда 68 ёшли эркак ва 11 ёшли боланинг яраланганини маълум қилди.
Аввалроқ, Киев ҳокими Виталий Кличко Телеграмда ҳужумлар ҳақида ёзар экан аҳолидан қутқарув хизматларига ҳеч қандай қўнғироқ бўлмаганини айтганди.
“Огоҳлантиришдан сўнг ҳам пойтахтнинг Дарница туманидаги йўлда ёнаётган ракета парчалари топилди. Қутқарув ва ўт ўчириш хизмати воқеа жойига йўл олди”, — деб ёзди Кличко.
Россия қўшинлари май ойи бошидан бери Украина шаҳарларига, хусусан, Киевга қарши ҳужумларини кучайтирди.
Украина пойтахти май ойи бошидан бери Россия ҳаво ҳужумларининг 19 та тўлқинини бошдан кечирди.
Киев ҳарбий маъмурияти 1 июнь куни пойтахтга ракета парчалари қулаши оқибатида уч киши, жумладан 11 ёшли қиз ҳалок бўлганини маълум қилди. Яна 11 киши жароҳатланган.
Ҳалок бўлганларнинг икки нафари қулфланган бомбапанасига кира олмай қолган.
Кличко 2 июн куни шаҳарда барча бомбапаналарнинг ҳар доим очиқ бўлишини таъминлаш учун уларни мажбурий назорат қилиш зудлик билан амалга оширилишини айтди.
"Шаҳар ҳокимияти бомбапаналарнинг иши устидан назоратни кучайтирмоқда. Ҳа, саволлар бор. Ва биз бунинг устида ишлаймиз", деди у ва аҳоли объектларга кириш имкониятига ишонч ҳосил қилиш учун ихтиёрий равишда назорат қилишлари мумкинлигини қўшимча қилди.
Айни пайтда Россия вилоят ҳокимияти мамлакатнинг ғарбий Брянск вилоятидаги икки қишлоқ Украина кучлари томонидан ўққа тутилганини маълум қилди.
Вилоят губернатори Александр Богомазнинг Телеграмда маълум қилишича, ҳужумлардан ҳеч ким жабрланмаган.
Украина билан чегарадош жанубий Курск вилояти губернатори ҳаво ҳужумидан мудофаа тизимлари Украинанинг “бир нечта” учувчисиз учоқларини уриб туширганини айтди. У қурбонлар бор ёки йўқлигини айтмади.
Зеленский Молдовада: Биз НАТОга қўшилишга тайёрмиз!
Украина президенти Владимир Зеленский Молдовага сафари чоғида ўз мамлакати НАТОга аъзо бўлишга тайёрлигини яна бир бор таъкидлади.
У 1 июнь куни Украинанинг қўшниси мезбонлик қилаётган Европа сиёсий ҳамжамияти саммитида қатнашиш учун Кишиневга келди.
Зеленский Молдова президенти Майя Сандунинг ёнида туриб журналистларга гапирар экан “Киев Шимоий атлантика ҳарбий альянсига қўшилишга ҳар қачонгидан тайёр” деди..
Ослода НАТО ташқи ишлар вазирларининг икки кунлик учрашуви олдидан, Франция ташқи ишлар вазири Кэтрин Колонна ҳарбий альянс Украинага қандай хавфсизлик кафолатларини бериши ҳақида ўйлаб кўриши кераклигини айтди.
“Халқаро ҳуқуқнинг оддий тамойилини эсга олишим керак, яъни барча суверен давлатлар ўз иттифоқларини эркин танлаш ҳуқуқига эга”, — деди у.
Германия ташқи ишлар вазири Анналена Баербок уруш давом этаётган бир давлат иттифоққа қўшила олмаслигидан огоҳлантирди.
НАТО бош котиби Йенс Столтенберг альянснинг барча иттифоқчилари Украинанинг ҳарбий блокга қўшилишига рози эканини айтди.
"Украинанинг блокга қачон аъзо бўлишини НАТО иттифоқчилари ва Украина ҳал қилади. НАТО кенгайишига Москванинг қаршилик қилишига ҳаққи йўқ ", - деди Столтенберг.
Столтенберг, шунингдек, Швециянинг НАТОга аъзо бўлиш истагини муҳокама қилиш учун тез орада Туркияга боришини айтди, аммо Швеция аллақачон АҚШ бошчилигидаги ҳарбий иттифоқдан юқори даражада ҳимояланганлигини таъкидлади.