Москвага дрон ҳужумларининг баъзи тафсилотлари
Маsh ва Shot телеграм каналлари Москванинг Ленинский проспектидаги турар жой биносининг 14-қаватидаги квартирага портловчи мослама ўрнатилган учта дрон учиб киргани ҳақида хабар берди. Бироқ, портлаш содир бўлмаган.
“РИА Новости” Ленинский проспектидан олинган видеони чоп этиб, у ерда фавқулодда хизматлар ишлаётгани ҳақида хабар бермоқда.
Ленинский проспектининг Удальцова кўчасидан Михаил Певцов кўчасигача бўлган қисмида йўл ҳаракати тўхтатилган.
Москва вилояти губернатори Андрей Воробёвнинг айтишича, Москвага яқинлашаётганда бир нечта учувчисиз учоқлар уриб туширилган.
"База" телеграм каналига кўра, уларнинг сони ўндан ортиқ бўлган. Ҳаммаси бўлиб, "База" маълумотларига кўра, эрталабки ҳужумда камида 25 та учувчисиз учоқ қайд этилган. Уларнинг аксарияти ҳаво ҳужумидан мудофаа кучлари томонидан уриб туширилган, дронларнинг бир қисми жуда паст баландликда учаётганда симлар ва дарахтларга тутилган. Учта дрон турар-жой биноларига - Ленинский проспекти, Профсоюзная ва Атласова кўчаларига қулаган.
Москвага янги дрон ҳужумлари
Москва мери Сергей Собянин ўзининг Телеграм-каналида 30 май куни эрталаб Россия пойтахтининг бир қанча қисмлари дрон ҳужумига тутилганини маълум қилди.
Собянин, "ҳужум оқибатида бир нечта биноларга кичик зарар етди" деди.
“Ҳеч ким жиддий жароҳат олмаган”, — дея қўшимча қилди у.
Телеграм каналлари 30 май куни эрталаб Москва вилоятида 10 дан ортиқ дрон уриб туширилгани ҳақида хабар бермоқда.
Фавқулодда хизматлар вакилининг РИА Новостига айтишича, учувчисиз самолётлар Москвадаги иккита турар-жой биносига зарба берган. Маълумотни мустақил равишда текшириш имконсиз.
Россия Тергов қўмитаси ҳеч ким жабрланмаганини маълум қилди.
Киевга дрон ҳужумлари, камида бир киши ҳалок бўлди
Россия 30 май куни эрта тонгда Киевни яна дрон ҳужумига тутди. Камида бир киши ҳалок бўлгани ва бир неча киши яралангани хабар қилинмоқда.
Украина ҳукумати дронларнинг аксарияти Украина ҳаво мудофааси томонидан уриб туширилганини билдирди.
Киев мери Виталий Кличконинг Телеграмдаги саҳифасида маълум қилишича, пойтахтнинг бир қанча туманларида ёнғинлар рўй берган.
"Бир киши ҳалок бўлди. Ҳаммаси бўлиб тўрт нафар жабрланувчи Голосеевский туманидаги касалхонага ётқизилди", деб ёзади Кличко.
Украина ҳарбийларининг айтишича, Россия Киевга Эронда ишлаб чиқарилган учувчисиз учоқлардан зарбалар берган. Ҳужум маҳаллий вақт билан эрталаб соат 4: 30гача давом этган.
"Россия шимол ва жанубдан жами 31 та камикадзе дронларини учради. Ҳаво ҳужумидан мудофаа кучлари 29 та дронни йўқ қилди", - дея маълум қилди Киев ҳарбий штаби.
Деярли барча дронлар Киев чеккасида ва пойтахт тепасида уриб туширилган.
Ғарб томонидан тақдим этилган мураккаб ускуналар Украина шаҳарларини Россия ҳаво ҳужумлари- ҳам учувчисиз учоқларидан, ҳам самолёт ракеталаридан тўсишда анча қўл келмоқда.
Россия сўнгги икки кун давомида Украинага ракета ва дрон ҳужумларини кучайтирди, ҳафтада бир неча марта ҳужум тўлқинлари билан ҳарбий объектлар ва таъминотларни нишонга олди.
Украина президенти маъмурияти Москванинг урушни тугатиш шартлари ҳақидаги баёнотларига муносабат билдирди
"Москванинг Россия Ташқи ишлар вазирлиги орқали қўяётган талаблари Россия раҳбариятининг ҳуқуқий ва амалдаги лаёқатсизлигини яна бир бор тасдиқлайди. Шунинг учун "Украинанинг бунга қарши шартлари" ҳақиқатга яқин - барча қўшинларни Украина суверен ҳудудидан зудлик билан олиб чиқиб кетиш. СССР парчаланиб кетгани ва пост-совет мамлакатлари суверенитетнинг тўлалигича тан олниши, уруш жиноятчиларининг топширилиши”, — деб ёзди Украина президенти маслаҳатчиси Михайло Подоляк Твиттерда.
Шунингдек, Подолякнинг сўзларига кўра, Киев Россия ҳудудида демилитаризация зонасини таъминлаш, ҳужум қуролларини камайтириш ва қонун билан белгиланган репарация тўловлари дастурини ҳам талаб қилади.
Аввалроқ Россия Федерацияси ташқи ишлар вазири ўринбосари Михаил Галузин Россиянинг ТАСС агентлигига берган интервюсида Россия талаблари ҳақида гапирган эди. Россия томони “халқларнинг ўз тақдирини ўзи белгилаш ҳуқуқини амалга ошириш натижасида юзага келган янги ҳудудий воқеликларни”, яъни босиб олинган Украина ҳудудларини Москва назорати остида қолдиришни тан олишни талаб қилишда давом этмоқда, дея айтган Галузин.