Нидерландия украиналик учувчиларни тайёрлашни бошлайди
Нидерландия ташқи ишлар вазири Вопке Хоекстра АҚШ президенти Жо Байден иттифоқчиларнинг қўшма ўқув дастурини қўллаб-қувватлаганидан сўнг, украиналик учувчиларни Ф-16 қирувчи учоқларига ўқитиш “эртароқ” бошланишини билдирди:
"Биз Украиналик учувчиларни тайёрлашни эртароқ бошлашга қарор қилдик. Чунки Украинага қирувчи учоқларни юборганимизда учувчилар тайёр бўлиши керак. Лекин бу алоҳида қарор. Ҳозирда буни муҳокама қилмаяпмиз".
Европа Иттифоқининг ташқи сиёсат бўйича раҳбари Жозеп Боррел Украинага қирувчи учоқлар етказиб берилишига умид билдирди.
Франция ташқи ишлар вазири Кетрин Колонна Франция украиналик учувчиларни ўқитишда ёрдам беришга тайёрлигини маълум қилди. У шунингдек, ўқув жараёни узоқ вақт олиши мумкинлигини ҳам қўшимча қилди:
"Бунга бир неча ой кетади. Шундай экан келинг, ишни босқичма-босқич амалга оширайлик. Ҳозирда Украинанинг асосан ўқ-дорилар, зирҳли машиналар, танклар ва техник хизматга эҳтиёжи бор".
Молдовада ҳукумат тарафдорлари митинг ўтказди
Кеча ўн минглаб молдоваликлар пойтахт Кишинёвда ҳукуматнинг Европа томон ҳаракатини қўллаб-қувватлаш учун митингга йиғилди.
Москванинг Украинага бостириб кириши Молдовани хавотирга солиб қўйди.
Молдова ҳукумати Россиянинг ҳаракатларини бир неча бор қоралар экан, Европа Иттифоқига қўшилиш учун ариза топширди.
Молдова президент Майя Санду Россияни ҳукуматга қарши норозилик намойишлари ва ташвиқотни кучайтириш орқали мамлакатнинг Европага интеграциясини бузишга уринаётганликда айблади. Москва эса буни рад этди.
Полиция 75 мингдан ортиқ одам намойишда иштирок этганини билдирди.
Санду Молдова 2030 йилда Европа Иттифоқига аъзо бўлишини таъкидлаб, молдоваликлар энди "Европа чеккасида" қолишни истамайди, деди:
"Молдоваликлар, европаликлар 7 йилдан кейин биз Европа Иттифоқининг тўлақонли аъзосига айланишимиз керак. Биз, Молдова халқи, мамлакатимиз бошини тик кўтарганча, Европа Иттифоқи томон шахдам одимлайди деган ортга қайтмас қарорга келдик".
Кишинёвга ташриф буюрган Роберта Метсола ҳам митингда сўзга чиқиб, Европа Молдовани “бағрини очиб ” қарши олишини айтди.
Намойишчилар ҳукуматни мамлакатнинг Европага интеграциясини конституцияда ҳам акс эттиришга чақирди.
Россияпараст мухолиф Шор партияси етакчиси, сургундаги тадбиркор Илан Шор бир қанча шаҳарларда ўтказилган норозилик намойишларида Молдова ташқи сиёсати бўйича референдум ўтказишга чақирди
Россиянинг Молдовадаги таъсир воситаси сифатида танилган Шор АҚШ санкциялари остида. У 2014 йилда Молдова банкларидан 1 миллиард доллар ўғирлашда айбдор деб топилган ва ўтган ой сиртдан 15 йиллик қамоқ жазосига ҳукм қилинган.
Россия ИИВ актёр Алексей Панинни қидирувга берди
Россия ИИВ актёр Алексей Панинни қидирувга берди. Унинг шахсий маълумотлари қидирувдаги шахслар базасида пайдо бўлганинидан биринчи бўлиб “Вёрстка” нашри хабар топган.
Май ойи бошларида Панинга нисбатан Россия ЖКнинг 205.2-моддаси (“Террорчилик фаолиятини амалга оширишга очиқ даъват қилиш ёки терроризмни оқлаш”) 2-қисми бўйича жиноят иши қўзғатилган эди. Актёр телеграм-каналида Керчь кўпригига зарба берилганидан қувончи ичига сиғмагани ҳақида ёзган эди.
Алексей Панин – Россия театр ва кино актёри, Россия Федерацияси Давлат мукофоти совриндори. У 2020 йилдан бери Испанияда яшайди.
Грузияда фаоллар Лавровнинг қизи мамлакатдан чиқиб кетишини талаб қилиб намойиш қилди
20 май куни эрталаб грузин фаоллари Кахетиядаги Kvareli Lake Resort меҳмонхонаси олдига келишди – аввалроқ ОАВлар Россия ташқи ишлар вазири Сергей Лавровнинг қизи Екатерина Винокурова шу ерга жойлашганини хабар қилган эди. Ушбу воқеадан сўнг отелни полиция ходимлари қуршаб олди.
Кейинроқ Грузия ИИВ 16 киши қўлга олинганини тасдиқлади, деб ёзади Newsgeorgia. Нашр хабарига кўра, “Ягона миллий ҳаракат” лидерларидан бири Леван Бежашвили акция иштирокчилари тарқалмоқчи эмаслигини айтган. “Биз Грузиянинг Лавровлар оиласи чорбоғига айлантирилишига йўл қўймаймиз”, дея ундан иқтибос келтирмоқда маҳаллий ОАВлар.
20 май оқшомида Грузия президенти Саломе Зурабишвили брифинг ўтказиб, Россия ТИВ раҳбарининг қизи Екатерина Винокурова ҳамда унинг эри Александр Винокуров иштирок этиши кутилаётган тўй бекор қилинганини билдирди.
“Ички ишлар вазири менга ваъда берди: бугун тўй-томоша қилмоқчи бўлган оила, ўша одамлар мамлакатдан кетишибди, тўй бўлмайди. Бир пайтлар Двлат думаси депутати Гавриловни мамлакатдан қувиб юборган жамият бу гал ҳам ғалаба қозонди”, деди у.
Озодликнинг грузин шуъбаси мухбири хабар қилишича, митингда мухолифатдаги партиялар вакиллари ҳамда жамоат фаоллари йиғилганлар. Улар Лавров оиласи аъзолари бўлиши мумкин деган тахминда меҳмонхонадан чиққан ҳар бир микроавтобусга тухумлар отишган.
Меҳмонхона ёнида қолган фаоллар орасида “Ягона миллий ҳаракат” собиқ аъзоси Ника Мелия ҳам бор. У журналистларга отел маъмурияти Лавровлар оиласи аъзолари, жумладан унинг қизи шу ердалигини тасдиқлаганини айтган.
19 май оқшомида Грузиянинг Mtavari Arkhi телеканали мамлакатга Россия ташқи ишлар вазири Сергей Лавровнинг қизи Екатерина Винокурова (Лаврова) эри Александр Винокуров билан бирга, қайин укасининг тўйида иштирок этиш учун келганини хабар қилган эди.
Телеканалга кўра, тўй Кахетия вилоятидаги Kvareli Lake Resort меҳмонхонасида ўтказилиши белгиланган. Шу муносабат билан меҳмонхона икки кунга ёпилган.
Айни чоғда отель маъмурияти “Фейсбук”даги саҳифасида Лавров фамилияли меҳмонлари йўқлигини билдирган.
“Маълум қиламизки, Лавровнинг қизи Kvareli Lake Resort отелига жойлашган, деган гап ҳақиқатга тўғри келмайди. Бизда Лавров фамилияли ҳеч ким қайд қилинмаган”, дейилади хабарда.
Mtavari Arkhi мухбири Kvareli Lake Resort’га қўнғироқ қилиб, ўзини гул дўкони ҳаммоли деб танитган ва Екатерина Лаврова номига гулдаста буюртма қилинганини айтиб, у хонасидами, йўқми, деб сўраган. Отель ходими гулдастани буюртмачига юбориш мумкинлигини айтган, дея хабар қилмоқда телеканал.