Сунак: Зеленскийнинг G7даги «тарихий» иштироки кучли сигнал
Буюк Британия бош вазири Риши Сунак Украина президенти Владимир Зеленскийнинг Япониянинг Хиросима шаҳрида бўлиб ўтаётган «Еттилик гуруҳи» етакчилари саммитида иштирок этиши «тарихий аҳамиятга эга» эканини айтди ва G7 иттифоқчилари бирдамлигини борасида кучли сигнал беришини таъкидлади.
Зеленский дастлаб саммитда онлайн иштирок этиши режалаштирилган эди, бироқ кеча кутилмаганда Зеленский саммитда шахсан қатнашиш учун Франция учоғида Японияга келди.
«G7 етакчиларининг президент Зеленский билан елкама-елка тургани G7 иттифоқчиларининг бирлиги ва қатъияти ҳақида кучли сигнал беради. Биз Украина билан қанча вақт керак бўлса, шунча вақт бирга бўламиз, чунки уларнинг хавфсизлиги бизнинг хавфсизлигимиздир», деди Британия бош вазири Риши Сунак.
Байден: «Биз Украинани ташлаб қўймаймиз»
АҚШ президенти Жо Байден Украинага 375 миллион долларлик янги ҳарбий ёрдам пакети ажратилишини эълон қилди ва Владимир Зеленскийга АҚШ Украина мудофаасини кучайтириш учун қўлидан келган барча ишни қилаётганини урғулади.
Японияда бўлиб ўтаётган G7 саммити доирасида Байден Зеленский билан учрашди. У янги ҳарбий ёрдам пакети ўқ-дорилар, артиллерия, зирҳли машиналар ва машғулотларни ўз ичига олишини билдирди.
«Биз Украинани қўллаб-қувватлаймиз ва ваъда бераманки сизни ташлаб қўймасмиз», деди Ақш Президенти Жо Байден.
Байден билан Зеленский учрашувида мухбирлар Зеленскийга Бахмут қўлдан келдими дея савол беришди
"Бундай бўлгани йўқ. Бироқ улар ҳамма нарсани вайрон қилишди. Бу фожиа... лекин бугун Бахмут фақат қалбимизда. Бахмутда жуда кўп русларнинг жасадларидан бошқа ҳеч нарса йўқ. Лекин уларнинг ўзлари ерларимизга келишди. Бахмутдаги ҳимоячиларимиз кучли қаршилик кўрсатмоқда. Биз уларнинг матонатини қадрлаймиз”, деди Зеленский.
Жо Байден украиналик учувчиларни Ф-16 қирувчи самолётларига ўқитиш дастурини маъқуллашини билдирди. АҚШ расмийларига кўра, етакчи демократик давлатлар раҳбарлари Россияга кучлироқ босим ўтказиш устида ишламоқда.
Қўшма Штатлар Украинага ўзини ҳимоя қилиш учун қурол-яроғ юбораётганини таъкидлаб, Украинадан Россия ҳудудига ҳужум қилмасликни талаб қилган.
Зеленский: «Украина кучайиб бормоқда»
Украина президенти Владимир Зеленский Японияда бўлиб ўтаётган Катта еттилик саммитидан кейин Украина янада кучайишини таъкидлади:
«Бугун Японияда G7 саммити олдидан учрашув ва музокараларнинг биринчи куни бўлиб ўтди. Биз шериклар билан позицияларни мувофиқлаштириб, мудофаа, қурол-яроғ, қирувчи самолётлар бериш борасида қўшма ҳаракатларга тайёргарлик кўрамиз. Украина манфаати учун имкон қадар кўпроқ давлат ва етакчиларни жалб қиламиз».
Зеленский Киев ҳаво мудофаасини мустаҳкамлашга ёрдам бергани учун Британия бош вазири Риши Сунакга миннатдорлик билдирди.
АҚШ президенти Жо Байден Вашингтон украиналик ҳарбийларни Ф-16 қирувчи самолётларидан фойдаланишга ўргатадиган ўқув дастурларини қўллаб-қувватлашини айтди. Бу ҳақида АҚШнинг юқори мартабали расмийлари маълум қилди.
Риши Сунак Буюк Британия Голландия, Бельгия ва Дания билан «Украинанинг ҳарбий ҳаво кучлари қобилиятини ошириш учун» иш олиб боришини билдирди.
Пригожин Бахмут устидан тўлиқ назорат ўрнатилганини даъво қилди, Украина инкор қилмоқда
“Вагнер” ҲХШ раҳбари Евгений Пригожин 20 май куни ёйинлаган видеосида «Вагнер гуруҳи» жангчилари Бахмутни қўлга киритишни якунлаганини айтди. Украина бу даъвони рад этиб, шаҳар атрофида жанглар давом этаётганини билдирди.
Рейтерс Пригожин Бахмутдан туриб видеомурожаат қилганини тасдиқлашга муваффақ бўлди. Бироқ видео санасини мустақил равишда тасдиқлай олмади.
«Самолёт» деб аталувчи кўп қаватли бино эгалланиши билан бугун, кундузи соат 12 да Бахмутни тўлиқ эгаллаш якунланди ”, “Вагнер” ҲХШ раҳбари Евгений Пригожин
Украина ҳарбий матбуот котиби Сергей Череватий «Бу ҳақиқат эмас. Бизнинг бўлинмалар Бахмутда жанг қилмоқда» дея маълум қилди Рейтерс агентлигига.
Пригожин видеомурожаатида вагнерчилар дам олиш ва қайта тайёрланиш учун 25 майдан Бахмутдан чекиниши ва бошқарувни рус армиясига топширишини айтди.
Пригожин шунингдек Вагнер кучлари етарли даражада ўқ-дорилар билан таъминланмаганлиги боис кўп йўқотишларга учраганини ҳам таъкидлади.
Пригожин Японияда «Катта еттилик гуруҳи» саммитида қатнашаётган Украина президенти Владимир Зеленский ва АҚШ президенти Жо Байденни ҳам тилга олди.
Украина армиясининг жасоратини олқишлар экан, Пригожин Зеленскийга мурожаат қилиб, «Бугун Байденни кўрганингизда, уни пешонасидан ўпиб, мендан унга салом айтинг», дея кесатиқ қилди.