Украина бир руҳонийини 28 маҳбусга алмаштирди
Украина Хавфсизлик хизмати раҳбари Василий Малюк “Интерфакс-Украина” агентлигига берган интервюсида Украина православ черкови (Москва Патриархати) руҳонийларига нисбатан босқинчи ҳокимият билан ҳамкорлик қилиш ва Россия агрессиясини маъқуллаганликда гумон қилиниб, 61 жиноий иш қўзғатилганини маълум қилди.
19 нафар руҳоний учун Украина фуқаролиги тўхтатилди.
Малюкнинг сўзларига кўра, Россия билан ҳамкорликда айбланган бир руҳоний 28 нафар украиналик ҳарбий асирга алмаштирилган. СБУ раҳбари бу шахснинг исмини айтмади.
Столтенберг Украина муваффақиятига ишонади
Украинага ташриф буюрган НАТО бош котиби Йенс Столтенберг Россия қўшинларига қарши эҳтимолий ҳужум бошланиши учун вақт жадвалини белгилаш Киевнинг ихтиёрида эканини айтди.
Столтенберг "Озодлик" радиосининг Украина хизмати ва "Настояшее время" телеканалига берган интервюсида у бутун дунё Украина ҳарбийларининг жасорати ва уларнинг аввал душман томонидан босиб олинган ҳудудни озод қилиш қобилиятига ишонч ҳосил қилганини таъкидлади.
НАТО бош котибига кўра, Украина иттифоқчилари сўнгги ойларда Киевга ҳарбий юк етказиб бериш ҳажмини сезиларли даражада оширган. Бу биринчи навбатда танклар, бошқа зирҳли транспорт воситалари, артиллерия ва ҳаво ҳужумидан мудофаа тизимларига тегишли. “Ишончим комилки, Украина ўз ҳудудларини озод қилиш бўйича янги операция бошлашга қарор қилса, у муваффақиятга эришади”, — деди Йенс Столтенберг.
Украинанинг НАТОга қўшилиш истиқболлари масаласида Столтенберг Киевда аввал айтган сўзларини такрорлади: Алянс Украина аъзо бўлиши керак, деб ҳисоблайди. Бироқ, унинг таъкидлашича, биринчи навбатда тажовузкор Россия устидан ғалаба қозониш керак, "чунки бизга Украина суверен ва мустақил Европа давлати сифатида керак. Бусиз аъзолик ҳақидаги ҳар қандай гапнинг маъноси йўқ", деди НАТО Бош котиби.
АҚШда ишланган Patriot зенит-ракета тизимлари Украинага етиб борди
Бу - 15-20 километр баландлик, 20 километргача радиусда ҳаводан келаётган нишонни аниқ ура оладиган қудратли тизимдир. Бунга қадар Германия ҳам ўзида мавжуд Patriot зенит-ракета тизимларини Украинага берган эди.
НАТО Бош котиби Йенс Столтенберг Россиянинг босқинидан бери илк марта Киевга борди ва бу сафари билан альянс Украинанинг қарши ҳужумга тайёргарлигини дастаклашини билдирди. Столтенберг Киевдаги марказий майдонда урушда ҳалок бўлган украиналик аскарлар хотирасига ҳурмат бажо келтирди ва вайрон қилинган Россия ҳарбий техникаларини кўздан кечирди.
Айни пайтда, АҚШда ишлаб чиқарилган Patriot зенит-ракета тизимлари Украинага етиб боргани хабар қилинди. Украина Мудофаа вазири Алексей Резниковга кўра, узоқ кутилган мазкур тизим воситасида шаҳарлар ва инфраструктураларни вайрон қилаётган Россия ҳарбий самолётларидан Украина осмонини жуда яхши ҳимоя қилиш мумкин бўлади.
Иттифоқчилар Украинага етказиб берилган мазкур тизим уларнинг ғалаба учун қўшган янги ҳиссаси экани, яъни бу қуроллар бўлажак контрҳужумларда Украинанинг қудратини оширишга қаратилганини айтмоқда.
Украина мудофаа вазири АҚШ, Германия ва Нидерландияга кўрсатилган ёрдам учун миннатдорчилик билдирди.
Вазир қайси давлат қанча ракета тизимини етказиб берганига оид маълумотларни очиқламади. Аввалроқ Германия Украинага Patriot бергани маълум қилинган эди.
Алексей Резников биринчи марта Вашингтондан 2021 йилнинг августида, яъни Россиянинг Украинага босқинидан беш ой олдин ва Россия Қримни аннексия қилганидан етти йил ўтгач, Patriot тизимлари беришни илтимос қилганини ҳам айтаркан, ўшанда Вашингтон бу илтимосга рад жавоби берганини ҳам эслатди.
Украина ҳарбийлари Patriot тизимини бошқариш машғулотларидан ўтган. Бу тизимни бошқариш учун битта батареяга 90 нафар аскар керак бўлади.
АҚШ президенти Украинага 325 миллион доллар ёрдам эълон қилди
АҚШ президенти Жо Байден Украинага 325 миллион долларлик янги ҳарбий ёрдам пакети ажратилганини эълон қилди. Бу ҳақда Оқ уй матбуот хизмати маълум қилмоқда.
Ҳарбий ёрдам HIMARS ялпи ўт очиш тизимлари учун ракеталар, артиллерия снарядлари, танкка қарши миналар, ўқотар қурол патронлари ва бошқа жанговар воситалар, шунингдек қўриқлаш жиҳозларини ўз ичига олади.
Россия Украинага кенг миқёсда бостириб кирганидан бери АҚШнинг Киевга хавфсизлик соҳасида кўрсатган ёрдами ҳажми 35 миллиард доллардан ошди. АҚШ ҳукумати Украинани қанча керак бўлса, шунча қўллаб-қувватлашга тайёрлигини урғулаб келади.