Асир алмашинув: 200 жангчи ватанига қайтарилди
10 апрель куни иккала томон 200 дан ортиқ рус ва украин асирларини ўзаро алмашди.
«Бугун яна 100 нафар ҳимоячимизни, жумладан 80 нафар эркак ва 20 нафар аёлни уйга қайтаришга муваффақ бўлдик. Улар чегарачилар, ҳарбий денгиз пиёда аскарлари, миллий гвардиячилар. Қолаверса, улар орасида Азовстал ҳимоячилари ҳам бор. Пасха байрами арафасида улар билан юзлаб оилаларга чинакам қувонч ҳам кириб боради. Биз бутун халқимизни рус истибдодидан озод қилиш йўлида давом этамиз. Ҳеч кимни унутмаймиз ва ортга қайтарамиз!», деди Украина президенти Владимир Зеленский.
Асир алмашинув доирасида Россияга 106 нафар жангчи қайтарилган.
Россия Мудофаа вазирлиги маълумотига кўра, 106 нафар ҳарбий асир Москвада вазирликнинг тиббий муассасаларида муолажа ва реабилитациядан ўтишади.
Украина расмийларига кўра, қайтарилган жангчилар орасида Қуролли кучлар хизматчилари, денгизчилар, чегарачилар ва Миллий Гвардия ходимлари бўлиб, уларнинг айримлари яраланган ва турли хасталикларга чалинган. Уларга тиббий ёрдам кўрсатилади.
Февраль ойи бошида Украинадаги ҳарбий асирлар ҳуқуқлари бўйича омбудсман Алёна Вербицкая Россияда уч мингдан зиёд украиналик асирликда эканини билдирган. Бундан ташқари, 15 мингдан ортиқ фуқаровий шахс бедарак кетган, деб ҳисобланади. Россия томони ўз асирлари тўғрисидаги расмий маълумотларни очиқлаган эмас.
Россия кучлари Донецк вилоятидаги икки шаҳарга ҳужумни кучайтирмоқда
Украина ҳарбийларига кўра, якшанба куни улар душманнинг 40 дан ортиқ ҳужумини қайтарган. Украина Қуролли кучлари Бош штаби маълумотларига кўра, Авдиивка ва Бахмутда аёвсиз жанглар кетмоқда. Рус қўшинлари Бахмутни бир неча ойдан бери эгаллашга уриниб келади.
Украина президенти Владимир Зеленский ўзининг тунги видеомурожаатида Россия православларининг якшанба кунги байрамида ҳам ҳаводан ҳужум уюштирганини қоралади.
“Ҳар бир насроний байрами бизга ёвузлик ҳеч қачон ғолиб бўлмаслигига ишонишни ўргатади. Бунга ишонишимиз керак ва ишонамиз ҳам. Биз ёвузликнинг мағлубиятини яқинлаштиришимиз керак ва буни яқинлаштиряпмиз”, деди Зеленский.
Православ христианлар бир ҳафтадан кейин Пасха байрамини нишонлайди. Украина аҳолисининг катта қисми православ христианлардир.
Россия Мудофаа вазирлиги якшанба куни Запорожье яқинидаги 70 минг тонна ёнилғи сақланаётган омбор йўқ қилинганини маълум қилди.
Украина президенти Владимир Зеленский, шунингдек кечаги нутқида Запорожьега бўлган ҳужумни ҳам қоралади:
“Кеча тунда Россия армияси Запорожье шаҳрига С-300 ракеталари билан ҳужум қилди. Турар-жой биноси вайрон бўлди. Ичкарида уч киши бўлган: бир эркак, бир аёл ва уларнинг Ирина исмли ўсмир ёшидаги қизи. Бу йил у қизалоқ 11 ёшга тўлган бўларди. Лекин у ҳалок бўлди. Эркак ҳам вафот этди. Аёлнинг аҳволи оғир, ҳозир касалхонада. Террорчи давлат православ пальма якшанбасини шундай ўтказмоқда. Бу орқали Россия ўзини дунёдан ва инсониятдан янада кўпроқ изоляция қилади".
Сиздирилган ҳужжатлар
Тhе Nеw York Times газетасининг хабар беришича, Пентагоннинг сиздирилган махфий ҳужжатлари, АҚШнинг Россия-Украина можаросига қанчалик чуқур аралашганини кўрсатади.
Сўнгги кунларда интернетда АҚШ ва НАТОнинг Украинага тегишли ҳарбий маълумотлари сиздирилди. Материалларда Украинанинг ҳарбий салоҳияти ва қурол конфигурацияси, жанг майдони хариталари, ҳар икки томоннинг йўқотишлари ва ҳатто ўта махфий таснифига эга разведка маълумотлари келтирилган.
Тhе Nеw York Times газетаси пайшанба куни 100 дан ортиқ экани тахмин қилинган бир қанча махфий ҳужжатлар, жумладан Яқин Шарққа оид ҳужжатлар ижтимоий тармоқларга юклангани хабар берди.
Интернетга сиздирилган ҳужжатлар агар ҳақиқий бўлиб чиқса, бу АҚШ можарода чуқурроқ иштирок этаётгани, Украинага илгари маълум бўлганидан кўра кўпроқ разведка маълумотларини тақдим этаётганини кўрсатади.
АҚШ ҳукуматининг ўчириш ҳаракатларига қарамасдан, баъзи ҳужжатлар ҳали ҳам интернетда айланмоқда. Ҳужжатларнинг баъзиларида жанг майдони хариталари турли саналар билан келтирилган. Ҳужжатлардаги охирги сана 1 март эканини кўриш мумкин.
Пентагонга оид бу махфий ҳужжатларнинг сиздирилиши туфайли Киев айрим ҳарбий режаларини ўзгартирган.
Бу ҳақда, Украина президенти Владимир Зеленскийга яқин манбасига таянган ҳолда CNN телеканали хабар бермоқда.
Айнан қандай режалар ўзгаргани очиқланмади, бироқ маълумотлар сиздирилиши Пентагонни шу пайтгача ҳукуматдаги юзлаб киши учун ҳар куни очиқ бўлган ўта муҳим ҳужжатлардан фойдаланувчилар доирасини чеклашга мажбур этгани айтилмоқда.
CNNга кўра, сиздирилган ҳужжатлар Discord мессенжери платформасида эълон қилинган. The New York Times улардан бири – Украинанинг Бахмутидаги жанговар ҳаракатлар харитаси 4chan аноним форумига жойлаштирилгани ҳақида ёзган эди.
Ҳужжатлар орасида Украинанинг Ҳаво ҳужумидан мудофаа имкониятлари камайиб бораётганига доир таҳлил ҳам мавжуд. Пентагоннинг исми сир қолишини истаган мулозимлари ҳужжатлар ҳақиқий бўлиши мумкинлигини тан олганлар.
Украина президенти офиси, бу ҳужжатларни “фотошоп” деб атади. Киев ушбу воқеа Россия махсус хизматлари операцияси бўлиши мумкинлигини ҳам истисно қилмайди.
Бироқ Би-би-си рус хизмати, айрим ҳарбий блогерлар буни – Ғарбнинг ахборот операцияси бўлиб, улар шу йўл билан Россия қўмондонлигини чалғитмоқчи, деб ҳисоблаётгани ҳақида ёзади.
Москва ҳужжатлар сиздирилиши юзасидан изоҳ бераркан, АҚШ ва НАТОнинг Украинадаги можарога бевосита ёки билвосита қўшилганига “зиғирча шубҳа қилмаслиги”ни урғулади.
ОАВ: “Вагнер” ХҲШ Туркия билан музокара олиб борган
The Washington Post журналистлари яқинда Интернетда тарқалган АҚШ миллий хавфсизлигига доир махфий ҳужжатларнинг 50 саҳифадан ортиқ қисмини ўрганиб чиқишди.
Улардан англашиладики, “Вагнер” ХҲШ қурол-аслаҳа харид қилиш масаласида НАТО аъзоси бўлмиш мамлакат – Туркия билан музокара олиб борган экан.
“Февраль бошида “Вагнер” ХҲШ вакиллари Мали ва Украинадаги жангчилари учун Туркиядан қурол ва асбоб-анжом сотиб олиш мақсадида турклар билан алоқа боғлаган”, дейилади ҳисоботлардан бирида.
The Washington Post хабарига кўра, Мали муваққат президенти Ассими Гоита унинг мамлакати “Вагнер” ХҲШ учун Туркиядан қурол-аслаҳа сотиб олишга тайёрлигини тасдиқлаган.
Музокара қандай якунлангани, Туркия расмийларининг бундан хабари бор ёки йўқлиги очиқланмаган. Туркия ҳукумати матбуот хизмати ҳамда Малининг АҚШдаги элчихонаси Washington Post газетасига изоҳ беришдан бош тортган.