Британия Ўзбекистонда ўтадиган бокс бўйича ЖЧни бойкот қилди
Буюк Британия Бокс федерацияси Россия ва Беларусь спортчиларига ўз мамлакатлари байроғи остида иштирок этишга рухсат этилгани учун Ўзбекистонда эркаклар ўртасида ўтказиладиган жаҳон чемпионатида қатнашмасликка қарор қилди. Бу ҳақда ташкилот сайтида маълум қилинган.
“Мазкур қарор бокснинг Олимпия дастуридаги бўлғуси ўрни ҳамда Халқаро бокс ассоциацияси (IBA)нинг Халқаро Олимпия қўмитаси позициясига зид равишда Россия ва Беларусь спортчиларига ўз миллий байроқлари остида қатнашишга рухсат бериш қарори билан боғлиқ хавотирларни акс эттиради”, дейилади ташкилот баёнотида.
Федерация Россиянинг Украинага босқинини қоралаб, Украина халқи, боксчилари, мураббийлари ва давлат расмийлари билан бирдамлигини изҳор қилган.
Эркаклар ўртасида бокс бўйича жаҳон чемпионати 30 апрель – 14 май кунлари Тошкентда бўлиб ўтади.
Бойкотлар муносабат билдирган Ўзбекистон Бокс федерацияси баёнот бериб, мамлакат турнирга мезбонлик ҳуқуқини қўлга киритганида бунақа чекловлар бўлмаганини эслатди. “Ўзбекистон “спорт – сиёсатдан холи” деган тамойилни қўллаб-қувватлайди”, дея урғулаган федерация.
Мария Львова-Белова: ХЖС айбловлари «беъманилик»
Россиянинг болалар ҳуқуқлари бўйича комиссари Мария Львова-Белова ўзига нисбатан Халқаро жиноий суд томонидан қўйилган айбловлар «беъманилик» дея атади:
«Халқаро жиноий суднинг айбловларига келсак, улар жуда мавҳум. Бизга ҳеч қандай ҳужжат келмади. Бизни нимада айблашаётганини тушунмаяпмиз. Барча айбловлар жуда оддийдек кўринади «гўёки болаларни депортация қилишда қатнашган» эмишман. Мен ҳам болалигимда жуда кўп қўрқинчли ҳикояларни айтганман. Бизга факт келтиринг, улар билан шуғулланамиз. Ҳозирча эса ҳамма айбловлар беъманилик, ноаниқ ва тушунарсиз».
Март ойида Ҳаагадаги Халқаро жиноят суди Россия президенти Владимир Путинни ҳамда Мария Львова-Беловани ҳибсга олишга ордер берди. Бу иккиси ҳарбий жиноятларда, аниқроғи Украинанинг оккупация қилинган ҳудудларидан аҳолини, хусусан, болаларни мажбурий депортация қилиш ва кўчиришда гумонланмоқда. Халқаро ҳуқуқ ушбу жиноятларни геноцид деб баҳолаши мумкин.
Львова-Белова ўзи раҳбарлик қилаётган комиссия Украина шарқидаги болалар ўз оилаларидан ажралгани борасида ҳеч қандай маълумотга эга эмаслигини таъкидлаб, Россия 2022 йил февралидан бери Донбасс вилоятидан беш миллиондан ортиқ қочқинни қабул қилганини қўшимча қилди. Улардан 730 минг нафари болалар.
Бахмут учун шиддатли жанглар давом этмоқда
Украина Россиянинг Бахмутни эгаллагани борасидаги даъволарини инкор этар экан, Бахмут атрофида шиддатли жанглар тўхтамаяпти.
Бахмут учун жангларда ҳар икки томондан ҳам йўқотишлар катта. Шаҳарнинг катта қисми вайрон бўлган.
Украина қуролли кучлари Бош штаби сўнгги 24 соат ичида душманнинг 45 та ҳужуми қайтарилгани, Бахмут билан бирга Авдивка ва Маринка ҳам қайноқ тўқнашувлар марказига айланганини билдирди.
Макрон: Хитой Украинадаги урушда муҳим роль ўйнаши мумкин
Франция президенти Эммануэл Макрон Хитой Украинадаги урушда муҳим роль ўйнаши мумкинлигини айтди.
Пекинга давлат ташрифи билан борган Макрон Хитой билан мулоқот зарурлигини ҳамда Россияга Хитой билан эксклюзив мулоқот ўтказишга йўл қўйиб бўлмаслигини таъкидлади:
“Хитой билан бу мулоқот жуда муҳим, чунки биз Европа Иттифоқи вакиллари Хитой билан эксклюзив мулоқотни Европанинг бошқа қисмига русларга қолдиришимиз нотўғри бўлади."