Зеленский: “Бахмут қуласа, Путин бу ғалабани сотади”
Украина кучлари Россиянинг тинимсиз ҳужумларига қармай Авдиивка, Бахмут шаҳарлари мудофаасини ушлаб турибди.
Украина Бош штабининг 29 март кунги ҳисоботида айтилишича, Бахмут, Авдиивка, Маринка ва Лиман Россиянинг тинимсиз ҳужумларига асосий нишони бўлиб қолмоқда, Украина ҳарбийлари, сўнгги 24 соат ичида жами 57 та душман ҳужумини қайтарган.
Россия қўшинлари, шунингдек, бутун фронт чизиғи бўйлаб 18 та ҳаво ва 3 та ракета зарбалари, шунингдек, 50 та ракета зарбаларини амалга оширган.
Бу маълумотни уруш шароитида мустақил равишда текшириш имконсиз. Жанубда эса Россия кучлари Херсон вилоятини ҳужумга тутмоқда.
“Ўтган сутка давомида душман вилоятини 34 марта – Херсон шаҳрининг ўзини уч марта ҳужумга тутди”, — деди Херсон ҳарбий раҳбари Александр Прокудин Телеграмда.
Ҳужумларга асосан турар-жой бинолари, касалхона ва заводлар нишон бўлган.
Украина президенти Владимир Зеленский мамлакати кучлари ҳар қандай ҳолатда Бахмутни ушлаб туриши кераклигини яна бир бор тасдиқлади.
Зеленский “агар Бахмут қуласа Путин бу ғалабасини Эрон ва Хитойга сотади”, деб айтди.
Украина ҳарбий қўмондонлари қарши ҳужумларни бошлашга яқин қолгани, бироқ айни пайтда Бахмут устидан назоратни ушлаб туриш приоритет эканини айтишади.
Украина ҳарбийлари 28 март куни узоқ вақтдан бери ваъда қилинган Ғарб техникаси, жумладан, Германиянинг “Леопард 2” танкларини олганини маълум қилди.
Президент Зеленский кечки видеомурожаатида дунё Россиянинг тажовузкорлигини тўхтатиш учун тезроқ ҳаракат қилиши кераклигини айтди.
Зеленский ўз чиқишида “Россия тажовузкорлиги баъзилар айтганидан анча тезроқ тугаши” мумкинлигига ишонишини қўшимча қилди.
"Агар дунё тезроқ ҳаракат қилса, дунё ҳал қатъийроқ бўлса, бу уруш тезроқ тугайди, деди Зеленский..
Таниқли инглиз актёри Орландо Блум Киевга сафар қилди
Бу актёрнинг 2016 йилдан бери Украинага биринчи сафари. "Мен бу ерда оҳирги марта бўлганимдан бери уруш бутун мамлакат бўйлаб авж олишини тасаввур ҳам қилмаганман. Аммо бугун мен ЮНИСЕФ томонидан қўллаб-қувватланадиган "Спилно" марказида болаларнинг ўйнаши, ўрганиши ва билим олиши учун хавфсиз жойда болаларнинг кулгисини эшитиш бахтига муяссар бўлдим", деб ёзди Блум Инстаграмда.
Орландо Блум “Узуклар ҳукмдори”, “Қариб қароқчилари” каби филмлардаги роллари орқали танилган. У Украина президенти Владимир Зеленский билан ҳам учрашди.
"ЮНИСЕФнинг яхши ният элчиси Орландо Блум Украинага, бизнинг Донбасга кенг кўламли урушдан олдин ҳам ташриф буюрган эди. У бу тажовуз қандай кулфатлар олиб келганини, уни тўхтатиш, урушдан кейин Украинани қайта тиклаш учун дунёнинг саъй-ҳаракатлари қанчалик кенг кўламли бўлиши кераклигини билади”, - деди Украина президенти Владимир Зеленский актёр билан учрашув сўнгида.
Актёр Орландо Блум ЮНИСЕФнинг яхши ният элчисидир. Ташкилотга кўра, бутун Украина бўйлаб ташкил этилган "Спилно" марказлари кўчирилган болалар ва уларнинг оилаларини қўллаб-қувватлайди, ўтган йили бу масканлар ярим миллиондан ортиқ болани бағрига олди.
Украина Бош прокуратурасига кўра, Россия Украинага қарши бошлаган ва қайриб 13 ойдан бери давом этаётган урушда 26 март холатига кўра, камида 465 нафар бола ҳалок бўлган.
Германия ва Британиянинг “Леопард”ва "Челленжер" танклари Украинада
Германия Украинага 18 та “Леопард-2” танкини етказиб берди ва яна кўпроқ танк беришга тайёрланмоқда, деди Олаф Шолц Нидерландияга ташрифи чоғида.
Германия Мудофаа вазирлиги маълумотига кўра, мақсад ёзгача дастлабки 25 та танкни, йил охиригача 80 тага яқин танкни ва 2024 йил давомида камида 100 та “Леопард” танкини тақдим этишдир.
Январ ойи охирида келишувга эришилгунга қадар Ғарб давлатлари Украинага танк етказиб бериш масаласида бир неча ҳафтадан бери тортишиб келган эди.
Канцлер Шолц, агар Германия Украинага “Леопард 2” танкларини юборса, АҚШ ҳам “Абрамс” асосий жанговар танкларини етказиб беришини таъкидлади. Энди бу кузда содир бўлади.
Украина мудофаа вазири Олексий Резников сешанба куни Украинага “яқинда етиб келган” Британиянинг “Чэлленжер 2” жанговар танклари тасвирини эълон қилди.
Резников ўзининг Твиттердаги саҳифасида танклардан бирига ўтиргани ва Британия Мудофаа вазири Бен Уоллес ва Буюк Британияга танклар учун миннатдорчилик билдирган видеосини жойлаштирди.
"Украинадан Буюк Британияга катта раҳмат", дейди Резников видеода.
У ўз твитида танклар "тез орада жанговар вазифани бажаришга жалб этилиши" ҳақида ёзди.
Британия Киевнинг кутилаётган қарши ҳужуми олдидан 14 та танк юборишга ваъда берган.
Украина қуруқликдаги кучлари қўмондони ўтган ҳафта тез орада қарши ҳужум бошланишини айтганди.
Германия мудофаа вазирлиги Украинага 18 та “Леопард 2” жанговар танки ва 40 та “Мардер” пиёда жанговар машинаси етиб келганини маълум қилди.
Украина президенти Владимир Зеленский кутилмаганда Запорожья вилоятидаги жабҳа чизиғига борди
У ерда Киев раҳбари БМТ Атом энергияси агентлиги раҳбари Рафаел Гросси билан учрашиб, Европадаги энг йирик атом электр станциясини ҳимоялаш масаласини муҳокама қилди.
Зеленский Атом энергияси бўйича халқаро агентлик раҳбарига заводда хавфсизликни тиклаш имкони йўқлиги, объект ҳали ҳам Россия назоратида эканлигини айтди.
“Бугун Запорожьедаги рус ракеталари турар-жой биноларига урилган жойга бордим. Оддий уйлар. Афсуски, куйган, қисман вайрон қилинган. Россиянинг бу ақлдан озган зарбасидан ўнлаб одам жароҳат олди. Террорчилар "Смерч" каби фаолкатли ракеталарини қаерга қаратаётганини аниқ билишган. Яқинларини йўқотганларга ҳамдардлик билдираман. 400 дан ортиқ одам ёрдам сўраб мурожаат қилди”, - деди Зеленский.
Зеленский, шунингдек Запорожье вилоятидаги “олд жабҳа”га бориб у ерда жанг қилаётган украин аскарлари билан ҳам учрашган.
Киев раҳбарининг фронт чизиғига ташрифи Германия канцлери Олаф Шолцнинг Германия Украинага ваъда қилган 18 та илғор “Леопард” жанговар танкларини етказиб берганини айтган пайтга тўғри келди.