Украина шаҳарлари яна дрон ҳужумига тутилди
Россия кучлари Украина шаҳарларини яна Эронда ишлаб чиқарилган “ҳудкуш дрон”лардан ҳужумга тутди.
Киев вилоятидаги аҳоли яшайдиган мавзега қилинган дрон зарбасидан камида тўрт киши ҳалок бўлгани хабар қилинмоқда.
Украина ҳарбийларига кўра, чоршанба куни учирилган 21 та дрондан 16 таси уриб туширилган.
Украина Фавқулодда вазиятлар хизмати пойтахтдан 60 километр жанубда жойлашган Ржищев шаҳрида иккита ётоқхона ва ўқув муассасаси тунги ҳужумда қисман вайрон бўлганини маълум қилди.
Бу ерда 20 киши касалхонага ётқизилган ва бир неча киши бедарак йўқолган.
Беш қаватли ётоқхона биносининг юқори қавати ҳужум оқибатида вайрон бўлган. Чоршанба куни Одесса, Житомир, Запорожье шаҳарлари ҳам ҳужумга тутилди.
Украина президенти Владимир Зеленский Россияни “шаҳарни ҳайвоний ваҳшийлик билан ўққа тутаётган”ликда айблади.
Шаҳар ҳокими вазифасини бажарувчи Анатолий Куртиевнинг айтишича, Запорожьеда 25 киши касалхонага ётқизилган, бир киши ҳалок бўлган.
Украинанинг пойтахти ва шимолий ҳудудларида сиреналар янгради ва ҳарбийлар Эронда ишлаб чиқарилган 21 та "Шаҳед" худкуш дронидан 16 тасини уриб туширганини айтишди.
Украина президенти Владимир Зелеq⁶нский ўз чиқишида Хитой раҳбари Си Цинпиннинг Россияни бир неча соат олдин тарк этганига ишора қилиб, “ҳар сафар кимдир Москвада тинчлик деган сўзни эшитишга уринса, ўша заҳотиёқ янги ҳужумларга буйруқ" берилишини айтди.
13 ой олдин Украинага бостириб кирган Россия сўнгги ҳужумлар ҳақида дарҳол изоҳ бермади.
Украина Қуролли кучлари фронтда бир марталик картон дронлардан фойдаланмоқда
Ҳар ой Австралиядан қарийб 100 та шунақа дрон келтирилади.
Дрон корпуси намиқиб қолмаслиги учун пишиқ картон устидан мум сурилган.
Қурилма 3-5 килограммгача юкни кўтара олади, юк билан 1-3 соат учади, парвоз узунлиги эса 40 дан 120 километргача. Улар асосан ўқ-дори, овқат ва дори-дармон етказиб беришда қўлланмоқда.
Шунингдек, бу дронлардан разведкада ва душман устига портловчи мосламаларни ташлашда ҳам фойдаланиш мумкин.
Рус артиллерияси вайрон қилган Украинанинг Богоявленка қишлоғи
БМТ: уруш бошидан буён Украинада 8 мингдан ортиқ тинч аҳоли нобуд бўлди
БМТнинг Инсон ҳуқуқлари бўйича олий комиссари бошқармаси Россия босқини бошланганидан буён Украина тинч аҳолисидан 8 319 киши ўлганини ва 13 892 киши яраланганини қайд этди, дейилади ташкилотнинг ҳафталик ҳисоботида.
“Бошқарма ҳақиқий рақамлар сезиларли даражада катта деб ҳисоблайди, чунки қизғин жанг ҳаракатлари бўлаётган айрим ҳудудлардан маълумот кеч етиб келмоқда, баъзи маълумотлар эса ҳозирча тасдиқлангани йўқ. Чунончи, Мариуполь (Донецк вилояти), Лисичанск, Попасной ва Северодонецк (Луганск вилояти)да тинч аҳоли орасида қурбонлар жуда кўплиги ҳақида хабарлар бор”, дея урғуланади ҳисоботда.
Март ойи бошидан бери Россия зарбаларидан Украинанинг 113 фуқароси ҳалок бўлиб, 356 киши жароҳат олгани қайд этилди.