Подоляк Путиннинг Мариуполга ташрифи ҳақида: жиноятчи доим жиноят содир бўлган жойга интилади
"Жиноятчи ҳар доим жиноят содир бўлган жойга интилади", деди Украина президенти девони раҳбари маслаҳатчиси Михаил Подоляк Россия президенти Владимир Путиннинг босиб олинган Мариуполга ташрифини шарҳлар экан.
“Цивилизациялашган дунё мамлакатлари “уруш режиссёри” (Путин В. В. ) чегарани кесиб ўтиши билан ҳибсга олинишини эълон қилган бир пайтда, минглаб Мариуполь оилаларининг ўлдирилиши ташкилотчиси шаҳар вайроналари ва оммавий қабрларга қойил қолиш учун келмоқда.“— деб ёзди Подоляк Твиттерда.
БМТ "дон битими" узайтирилганини тасдиқлади
Украина донини Қора денгиз портларидан экспорт қилишга рухсат берувчи келишув муддати узайтирилди.
Бу келишувни узайтириш бўйича Туркия воситачилигида бир неча кун давом этган музокаралардан сўнг келишувга эришилди.
Туркия президенти Ражаб Тойиб Эрдўғон битим узайтирилишига эришилганини эълон қилди, бироқ у узайтириш қанча муддатга эканлигини ошкор қилмади.
Москва келишувнинг 60 кунга узайтирилишига эътироз билдирмаслигини айтган бўлса, Украина расмийси томонлар 120 кунга келишиб олганини айтди.
Келишув июл ойида Бирлашган Миллатлар Ташкилоти ва Туркия томонидан Россия ва Украина билан тузилган ва ноябр ойида яна 120 кунга узайтирилган.
У ўтган йилнинг феврал ойида Россиянинг Украинага бостириб кириши ва Қора денгиз блокадаси сабаб бўлган глобал озиқ-овқат инқирозига қарши курашиш учун ишлаб чиқилган.
Бирлашган Миллатлар Ташкилотининг таъкидлашича, келишув дастлабки икки муддатда 25 миллион тонна дон ва озиқ-овқат маҳсулотларини етказиб беришга имкон берди, бу эса глобал озиқ-овқат нархларини туширишга ва бозорларни барқарорлаштиришга йўл очади.
Канада Украинага “Леопард 2” танкларини жўнатмоқда
Канада Мудофаа вазирлиги 19 март куни танкларнинг самолётларга ортилаётгани видеосини эълон қилди.
Ўтган ҳафта Оттаванинг Киевга кўрсатаётган сўнгги ҳарбий ёрдами доирасида Канада 8000 га яқин артиллерия ўқ-дорилари ва ўнлаб ҳаво мудофаа ракеталарини юборган.
Канада, шунингдек, Украинага Дания, Германия ва Нидерландия томонидан совға қилинган “Леопард 1” жанговар танклари учун 1800 дан ортиқ ўқ-дорилар ҳам жўнатган.
Украинанинг халқаро миқёсдаги энг фаол тарафдорларидан бири бўлган Бош вазир Жастин Трюдонинг либерал ҳукумати ўтган йили Россия босқинининг бошланишидан буён Киевга 1 миллиард Канада долларидан ортиқ ҳарбий ёрдам ажратди.
Канада яқин ҳафталарда Украинада бўлиши кутилаётган саккизта “Леопард 2” асосий жанговар танкларини совға қилишини аллақачон эълон қилди, дейилади вазирлик баёнотида.
Путин Украинанинг ишғол қилинган ҳудудларига сафар қилгани иддао қилинди
Владимир Путин гўёки Россия томонидан босиб олинган Мариуполга ташриф буюргани ҳақидаги хабарлар ортидан давлат каналлари президент ва бош вазир ўринбосари Хуснуллин ўртасидаги учрашув видеосини кўрсатди.
РИА "Новости"нинг монтаж қилинган видеоси биринчи қисмида Владимир Путин машина ҳайдаётгани, Марат Хуснуллин эса олдинги ўриндиқда ўтириб, унга аҳоли ва тадбиркорларга “ёрдам”лар ҳақида гапириб беради.
Машина ойнаси ташқариси қоронғи, бу видеода бошқа нарсани кўришнинг иложи йўқ.
Видеонинг иккинчи қисмида Путин ва Хуснуллин бинони кўздан кечирмоқда. РИА "Новости"нинг таъкидлашича, бу филармония биноси. Путин аудиториядаги стуллардан бирига ўтириб: “Қулай, чиройли”, дейди. Шу билан видео тугайди.
Озодлик уруш шароитида бу видеоларнинг ҳақиқийлигини тасдиқлаш имконнига эга эмас.
Кремль шунингдек, 19 март, якшанба куни президент Владимир Путин Украинадаги ҳарбий операция бўйича олий қўмондонлиги билан учрашаётгани акс этган видеони ҳам эълон қилди.
Путин Бош штаб бошлиғи Валерий Герасимов ва Россиянинг Украинадаги ҳарбий амалиётлари қўмондони ўринбосари генерал Сергей Суровикин билан учрашди. Генерал Герасимов Украинадаги Россия кучларининг умумий қўмондони.
Учрашув Путин ярим оролнинг Россия томонидан Украинадан қўшиб олинганининг тўққиз йиллиги муносабати билан шанба куни эълон қилинмаган ташриф билан Қримга борганидан сўнг ва Халқаро Жиноят Суди (ХЖС) Россия раҳбарини ҳибсга олишга ордер берганидан икки кун ўтиб бўлиб ўтди.
ХЖС жума куни Путинга қарши ҳибсга олиш учун ордер чиқарди ва уни ҳарбий жиноятда айблаб, юзлаб болаларни Украинадан ноқонуний равишда депортация қилишда айблади.
Путин ҳали ХЖС қарори бўйича очиқчасига изоҳ бермади.