“Рамштайн”: Украинага ўқ-дори ва янги турдаги қуролларни етказиб бериш давом этади
Онлайн режимида ўтказилган йиғилишда Украинага ўқ-дори ва янги турдаги қуролларни етказиб бериш билан боғлиқ масалалар муҳокама қилинди. Президент Зеленский “Рамштайн” якунларини сарҳисоб қилар экан, “керакли қарорлар олинди” деди.
Пентагон раҳбари Ллойд Остин эса Россиянинг қуроллари ҳам, дўстлари ҳам тугаб бораётганини айтди:
“Биз Россиянинг нафақат қурол-аслаҳаси, балки дўстлари ҳам тугаб бораётганини кўряпмиз. Аксилпутин коалицияси эса тобора кенгаймоқда. Украина мудофааси бўйича мулоқот гуруҳимиз Киевни қанча керак бўлса, шунча дастаклайди. Швеция 10 та танк беради, Норвегия АҚШ билан биргаликда NASAMS ҲҲМ тизимларини тақдим этади, Нидерландия эса Украинага қурол-аслаҳалар бориши тўхтаб қолмаслиги учун янги шартномалар тузилишини таъминлайди. Словения ҳам Украина учун энг зарур нарсалар рўйхатидаги баъзи бандларни бажаришни зиммасига олди”, деди АҚШ мудофаа вазири Ллойд Остин Украина мудофааси масалалари бўйича мулоқот гуруҳининг “Рамштайн” форматидаги 10-йиғилиши якунларига бағишланган брифингда.
“Ҳозирда Украинага пиёдалар жанговар машиналари ҳамда танклар етказиб берилмоқда, улар тез орада фронтда бўлади. Яхши тайёрланаётган украин аскарлари шарофати билан жанг майдонида навбатдаги муваффақиятли операцияларни кўрамиз”, дея қўшимча қилди Пентагон раҳбари.
Дания Украинага кўмаклашиш учун бир миллиард долларлик фонд ташкил қилади.
Фонднинг биринчи ва энг йирик ёрдами – Украина ҚК учун 5,4 млрд крон (тахминан 763 млн доллар)га қурол-аслаҳа ва ҳарбий техника сотиб олиш бўлади, дея хабар қилмоқда Би-би-си.
Шунингдек, қарийб 170 млн доллар Украина инфратузилмасини тиклашга, 56 млн долларлик яна бир транш эса бизнес ташаббусларини қўллаб-қувватлашга йўналтирилади. Бундан ташқари, ҳукумат 2024-2027 йилларда Украина армиясига 2022 ва 2023 йилларда берилган техника ва қуролларни янгилаш учун ҳам маблағ ажратмоқчи.
“Рамштайн” форматидаги коалиция Россия агрессиясига қарши курашда Украинага ҳарбий ёрдам кўрсатаётан 40 мамлакатни ўз ичига олади.
Мазкур коалиция 2022 йил 26 апрель куни АҚШнинг Германиядаги “Рамштайн” ҳарбий базасида бўлиб ўтган биринчи саммитда шаклланган.
Украиналик миллиардер Жеваго Франциянинг экстрадиция иши доирасида судда иштирок этди
Украиналик магнат Константин Жеваго ўн миллионлаб долларларни ўзлаштирганликда айбланиб, унга нисбатан суд бошланди. Судда уни Украинага экстрадиция қилиш масаласи кўриб чиқилди.
Жевагонинг иши Украина президенти Владимир Зеленский Совет Иттифоқи қулаганидан бери иқтисодиётда ҳукмронлик қилаётган олигархлар қанотларини қирқишга уринаётган пайтга тўғри келди.
Лондонда рўйхатга олинган темир гранулалар ишлаб чиқарувчи Феррехпо компаниясини раҳбари 49 ёшли украиналик миллиардер декабрь ойида Украина сўровига биноан ҳибсга олинган эди. У ҳозирда банкрот бўлган Финанc & Кредит Банкидан 113 миллион долларни ўзлаштиришда айбланган.
Жеваго 1 миллион евро гаров эвазига озод қилинди.
Ўтган ҳафта Украина суди 2015 йилда банкрот деб эълон қилинган банк устидан қарийб 46 миллиард гривна (1,25 миллиард доллар) миқдоридаги товон пули ундиришга ҳукм чиқарди. Суд компенсация учун «Жеваго»нинг Феррехпўдаги акцияларини мусодара қилишга қарор қилди.
Форбес Украине ойлик нашри Жевагонинг бойлигини 2021 йилда 2,4 миллиард долларга, 2022 йил охирида эса 1,4 миллиард долларга баҳолаган.
Бахмут учун жанглар давом этмоқда
Чоршанба куни Днепропетровск вилоятидаги Марганец шаҳри руслар томонидан ўққа тутилди – у ерда икки аёл ўлди, ўнлаб турар-жой биноси вайрон бўлди. Кун давомида Украинанинг кўплаб ҳудудларида, жумладан, Харковда ҳам ҳаво ҳужуми ҳақида огоҳлантириш эълон қилинди.
Асосий жанглар Донбассда бўлиб ўтмоқда: вагнерчилар Бахмут ва унинг атрофида жуда сустлик билан олға силжишмоқда (Пригожин алоҳида стратегик аҳамиятга эга бўлмаган Зализнянское қишлоғини қўлга киритганини эълон қилди).
Бундан ташқари, Америка урушни ўрганиш институти рус қўшинларининг Купянскдан шимоли-шарқда, Харков ва Луганск вилоятларида Сватово-Кременная чизиғи бўйлаб кичик олдинга силжиши, шунингдек, Авдиевка-Донецк линияси бўйлаб давом этаётган Россия ҳужумлари ҳақида ёзади.
Институт ҳисоб-китобларига кўра, феврал ойида Россия рекорд даражада йўқотишларга учраган ҳолда Украина ҳудудининг атиги 0,039 фоизини эгаллаб олди.
Россия Бахмут шаҳри яқинида кичик ютуқларга эришмоқда. Аммо бу катта йўқотишлар эвазига бўлмоқда, деди юқори даражали АҚШ генерали Марк Милли.
"Ҳозирда Бахмут ва унинг атрофида шиддатли жанглар кетмоқда. Руслар эса кичик тактик ютуқларга эришмоқда, аммо катта талафотлар эвазига. Фронт чизиғининг бошқа қисмларида вазият нисбатан ўзгармай қолмоқда. Ҳар икки томон маневрда сезиларли ютуқларга эришмади. Кўпгина мамлакатлар Украина мудофаасига кўмаклашиш учун ўқ-дори билан таъминлаш ва украин ҳарбийларини ўқитиш бўйича жиддий ҳаракатларни амалга оширмоқда”, - деди бирлашган штаб раҳбари генерал Марк Милли.
Ростов-Донда ФСБ бошқармасига қарашли бино ёнмоқда
Ростов-Дон шаҳри марказида ФСБнинг чегараларни қўриқлаш бошқармаси жойлашган бино ёнмоқда. Бошқарма омборида ҳар 5-10 сонияда ўқ-дорилар портлаяпти, дея хабар қилди 161.ru сайти ҳуқуқ-тартибот идораларида манбасига таяниб.
Ижтимоий тармоқларда эса воқеа жойидан олинган видеолар тарқалмоқда.
Ёнғин чегара бошқармасининг асосий биносида эмас, балки омборида бўлмоқда. Телеграм-каналларга кўра, гувоҳлар “пақиллаган товушлар”ни эшитганларини айтишган.
“Осторожно, новости” нашри ёнғиндан олдин портлаш содир бўлгани ҳақида ёзди.
Baza телеграм-канали омбор ходимларидан икки киши жабрланганини маълум қилмоқда. Бино ертўласида одамлар қолиб кетган бўлиши мумкин.
Mash канали маълумотига кўра, атиги бир киши жабрланган ва оғир аҳволда касалхонага ётқизилган.
ФВВ ёнғин бўлганини тасдиқлади, тафсилотлар ҳозирча йўқ, деб ёзмоқда Озодликнинг рус хизмати.
Ростов вилояти Украинанинг фаол ҳарбий ҳаракатлар бўлаётган Донецк ва Луганск вилоятлари билан чегарадош.