“Пастроқ учиб келиб, термобарни нишонга аниқ отамиз” - украиналик дрон оператори ҳикояси
Макс Украина ҚКнинг князь Константин Островский номидаги 30-бригадасида зарбдор дронларни бошқаради. У 2014 йилдан бери жанг қилмоқда.
Макснинг машинасини бутун бошли кўчма арсенал дейиш мумкин, у қўллайдиган дронлар эса термобар гранаталар билан жиҳозланган: Макс уларни дрондан россияликларнинг Донбассдаги позицияларига ташлайди.
“Портлаш кучи шу қадарки, майдони 10 квадрат метрга тенг олов булути ҳосил бўлади. Гранаталарни ўзимизнинг танкчилардан қистаб олганман”, – дейди у ўз ихтиросидан ғурурланиб.
Макс бир неча университетни тамомлаган, бироқ ҳозир урушдан бошқа нарсани ўйлай олмайди. У бригадаси билан бирга, бир неча ойдан бери уруш ўчоғи бўлиб турган Бахмутда жанг қилмоқда. Макс айтишича, шиддатли жанглар шароитида дронлар узоқ яшай олмайди:
“Мен артиллерияда ҳам бўлдим, пиёда аскар ва разведкачи бўлиб ҳам хизмат қилдим, жуда кўп қуролларни кўрдим, лекин, менимча, ҳозирда дронлардан самаралироқ қурол йўқ. Дрон – энг яхши разведкачи: йўқотсак – ачинмаймиз, одам эмас-ку ҳарқалай. Аммо қақшатқич жангларда дронлар узоқ яшамайди. Бир ҳафта хизмат қилган дронни чемпион ёки ветеран деса бўлади”,– дейди у.
У ўз дронлари айниқса пастлаб учирилганида яхши самара беришини айтади: оператор нишонни равшан кўриши ва аниқ зарба бериши керак:
“Биз душманни яққол кўришимиз керак. Шу боис аввало ёввойиларни эфкалар (Ф-1 гранаталари) билан тийиб оламиз, токи пана-пасқамда биқиниб ётишсин, дронлар товуши эшитилганида уларга ўқ уза олишмасин. Шундан кейин дронлар пастлаб учиб бориб, термобарни нишонга аниқ отади. Шу йўл билан бир кунда биттадан олтитагача душманни йўқ қиламан”.
Макс оператор сифатида иши натижаларини видеога олиб, ўз телеграм-каналида эълон қилиб туради. Атай шундай қиламан, дейди – россияликларга уларнинг Украинадаги қотилликлари, бузғунчиликлари учун албатта хун олинишини эслатиб туриш учун.
“Ҳар гал граната нишонга текканида ғалаба тобора яқинлашганини ҳис қиламан. Куним бекор ўтмагани дилимдан кечади. Биламан, уруш ҳали-бери тугамайди, лекин танамизда жон бор экан – жанг қилаверамиз. Чарчадик, дейишга ҳаққимиз йўқ”, дея ҳикоясини якунлайди Макс.
Россия Давлат Думаси кўнгиллилар ва ёлланма жангчиларини “обрўсизлантирган” шахсларга 15 йилгача қамоқ жазоси белгиланган қонун лойиҳасини қабул қилди
Россия Давлат Думаси Украинадаги урушнинг барча иштирокчилари, жумладан кўнгилли аскарлар ва Россия армиясига “кўмаклашаётган” ташкилотлар вакилларини “обрўсизлантирганлик” ва улар ҳақида “фейклар” тарқатганлик учун жазо назарда тутилган қонун лойиҳасини учинчи ўқишда қабул қилди.
Бу ҳақда Дума спикери Вячеслав Володин ўз телеграм-каналида маълум қилмоқда. Мазкур қонун, хусусан, “Вагнер ХҲШ” ёлланма жангчиларининг ҳарбий жиноятлари ҳақида гапирганларни узоқ муддатга қамашга рухсат беради.
“Бугун ўз ҳаётини хатарга қўйиб, мамлакат ва фуқаролар хавфсизлигини таъмин этаётган барча аскарлар турли иғво ва ёлғонлардан ҳимояланди. Ғаламисларни оғир жазо – 15 йилгача қамоқ кутмоқда”, деб ёзди Володин.
Эслатиб ўтамиз, Россия ҳукумати Украинада уруш бошланганидан сўнг РФ Мудофаа вазирлиги хабарномасидан фарқ қилувчи ҳар қандай ахборотни “ёлғон” ва “провакация” деб талқин қилмоқда.
Масалан, Россия армиясининг Мариуполдаги тинч аҳоли яширинган Дарама театри биносига, Мариуполь туғруқхонасига зарбалари, шунингдек Украинадаги турар-жой биноларининг қасддан ўққа тутилиши, тинч аҳолининг ўлдирилиши ва жинсий зўрланишига доир маълумотлар аллақачон “фейк” деб топилган.
Қонун лойиҳаси Россия армиясига оид “фейклар” ҳақидаги мавжуд моддага (Россия ЖКнинг 207.3-моддаси) тузатишлар киритишни тақазо этади. “Фейклар” тўғрисидаги қонун шу пайтгача фақат ҳарбий кадрлар ва сафарбар қилинган аскарларни ҳимоя қилмоқда эди, унда кўнгилли тузилмалар ва ХҲШлар ҳақида ҳеч нима дейилмаган.
Юқоридаги модданинг биринчи қисмида энг оғир жазо уч йилдан беш йилга узайтирилади. Иккинчи ва учинчи қисмлардаги энг оғир жазо эса мос равишда 10 ва 15 йиллик қамоққа ўзгартирилади.
Бахмутда вазият ҳануз «жуда оғир»
Пригожин ўз аудио баёнотида унинг жангчилари шаҳар марказига яқин боргани сари, жанглар янада шиддатли бўлаётгани ва унинг жангчилари артиллерия ҳамда танклар ҳужуми билан қарши олинаётганини айтди:
«Душман ҳар бир қарич ер учун курашмоқда. Шаҳар марказига яқин борганимиз сари, жанглар қийинлашяпти. Бизни артиллерия, танклардан ўққа тутишмоқда. Украинлар у ерда чексиз захира тўплаган. Лекин биз олдинга боряпмиз ва шундай давом этамиз».
Пригожин, Россия армияси унинг қўшинларига 27 та юк машинасида ўқ-дори ва ёрдам етказганини билдирди. У Вагнер жангчилари ва рус қўшинлари ўртасида ҳеч қандай можаро йўқлигини қўшимча қилди.
Ваҳоланки, аввалги интервьюсида Пригожин, қуроллар кечикаётганидан шикоят қилганди. Бу гал у, "Бахмутни эгаллаганимиздан сўнг, ҳудудлардан янги жангчилар ёллашни бошлаймиз” деб билдирди. Бир неча кун олдин Вагнер Бахмутдаги оғир йўқотишлардан сўнг ўз сафини тўлдириш мақсадида 42 шаҳарда аскар ёллаш марказларини очганини билдирган.
«Урушга маҳбус аёллар ёлланяпти»
Украина қуролли кучлари ва журналист Ольга Романова, фронтга Россия қамоқларидаги аёллар йўлланаётгани ҳақида хабар қилди.
"Фронтда шахсий таркибдан кўп қурбон берилди ва душман, сафини тўлдириш учун муқобил манбалардан фойдаланмоқда. Ўтган ҳафтада Донецкка бораётган поезд вагонларидан бирида маҳбус аёллар бор эди”, дея хабар тарқатди Украина ҚК.
"Русь сидящая" ташкилоти раҳбари ва журналист Ольга Романова бу маълумтни тасдиқлади. Унинг айтишича, маҳбус аёлларни Россия жанубидаги қамоқхоналардан ёллашган ва шу кунга қадар Украинага юзга яқин аёлни йўллашган.