Европа Иттифоқи суди тадбиркор Евгений Пригожиннинг онасига нисбатан санкцияларни бекор қилди
Европа Иттифоқи суди бизнесмен ва Вагнер ХҲШ асосчиси Евгений Пригожиннинг онаси Виолетта Пригожинага нисбатан чеклов чораларини бекор қилди. Бу ҳақда суд қарорида айтилган.
Европа Иттифоқининг Виолетта Пригожинага қарши санкциялари Россиянинг Украинага кенг кўламли босқинидан сўнг киритилган. Бунинг мантиқий сабаби унинг Concord Management and Consulting ва ўғли билан боғлиқ бўлган бошқа бизнесларнинг эгаси эканлиги, шунингдек, Украинанинг ҳудудий яхлитлиги, суверенитети ва мустақиллигига путур етказадиган сиёсатни қўллаб-қувватлаши эди.
Виолетта Пригожина Европа Иттифоқи судига унга нисбатан санкциялар қўллаш қарорини бекор қилишни сўраб мурожаат қилди. Тақдим этилган материалларга кўра, Пригожина 2017 йилдан бери Concord Management and Consulting компаниясининг эгаси эмас. Шунингдек, Пригожинга нисбатан санксиялар жорий этилган пайтда унга алоқадор бошқа компанияларга эгалиги ҳам исботланмаган.
Суд Пригожинани санкциялар рўйхатига киритиш тўғрисидаги қарор фақат уларнинг муносабатларига асослангани, унинг ўғли Украинанинг ҳудудий яхлитлиги, суверенитети ва мустақиллигига путур етказадиган ҳаракатлар учун жавобгар бўлса ҳам, уни санкциялар рўйхатига киритишни асослаш учун етарли эмас, деб ҳисоблади.
Россия суди Украинадаги урушга қарши бўлган фаолни 8,5 йилга қамади
Москва суди ижтимоий тармоқлар орқали Украинадаги урушни қоралаган россиялик Дмитрий Иванов армия ҳақида ёлғон маълумот тарқатишда айблаб, саккиз ярим йиллик қамоқ жазосига ҳукм қилди.
Дмитрий Иванов Москва давлат университети талабаларидан иборат телеграм каналда урушни қоралаб келган. У қонунбузарлик содир этганини рад этди.
«Бир нарсани тушунишингиз керак, Россия президенти Владимир Путин эмас. Биз уни сайлаганимиз йўқ. У биздан Украина уруш бошлаш борасида ҳисоблашмади. Россияда ўн миллионлаб одам бу жиноий урушга қарши. Кўпчилигимизнинг Украинада дўстларимиз ва қариндошларимиз бор ва уларнинг ичидан ўтаётган нарсаларни ҳис қиляпмиз », дея таъкидлади Иванов Сота Телеграм каналидаги видеода.
Унинг адвокати Мария Эйсмонт Иванов жазони умумий тартибли колонияда ўташини маълум қилди.
Урушдан ва ҳарбий сафарбарликдан норози юз минглаб россияликлар мамлакатни тарк этди. Россияда урушни танқид қилганлар армияни обрўсизлантириш айби билан қамоққа олинади.
Жорий ҳафтада Украина Польшадан яна 10 та “Леопард” олади
Польша мудофаа вазири Мариуш Блашчак ушбу ҳафтада Украинага Германияда ишлаб чиқарилган 10 та Leopard 2 танклари келишини маълум қилди.
Польша Киевга бунақа танклардан жами 14 та ваъда қилган бўлиб, тўрттаси аллақачон Украинага етказилган.
Январь ойида Германия “Леопард” танкларига эга мамлакатларга уларни Украинага беришга рухсат этганди. Бундан ташқари, Варшава Киевга ўзи ишлаб чиқарган PT-91 русумли танклардан 60 та жўнатмоқчи.
Евроиттифоқ жинсий зўравонлиги учун россиялик икки ҳарбийга қарши санкция жорий этди
Улар – 90-гвардия танк дивизияси командири Рамил Ибатуллин ҳамда генерал-майор Николай Кузнецовлардир. ЕИ ҳужжатида улар украин аҳолисига нисбатан жинсий зўравонлик ҳолатларига алоқадорлиги айтилган.
Кузнецов 2021 йилнинг июлида Россия миллий гвардияси қўшинларининг Ф.Дзержинский номидаги Тезкор вазифаларни бажарувчи махсус дивизиясига командир этиб тайинланган эди.
Озодликнинг рус хизмати ҳамда “Схеми” лойиҳасининг суриштируви қаҳрамони бўлмиш Роман Биковский худди шу дивизияда хизмат қилган.
Биковский Украинада эканида хотини Ольга унга қўнғироқ қилиб, “украин аёлларини жинсий зўрлашга рухсат” берган эди.
Украинада Ольга Биковская уруш даври қонунларини бузишда айбланиб, халқаро қидирувга берилган.