Зеленский: Россия ўзининг сўнгги ҳарбий кучларини марказлаштиряпти
Ғарб давлатлари мудофаа вазирлари бугун Германияда Киевга ҳарбий ёрдам ҳажмини ошириш масаласини муҳокама қилди. Украина анчадан бери Ғарбдан Россиянинг шарқдаги ҳужумларини тўхтатиш учун замонавий танкларни етказиб беришни сўраб келмоқда.
АҚШ Мудофаа вазири Ллойд Остин ва штаб бошлиқлари бирлашган қўмитаси раиси генерал Марк Милли, Германиянинг Рамштейн ҳаво базасидаги йиғилишга бошчилик қилди. Йиғилиш кун тартибида хусусан, Пентагон 19 январь куни эълон қилган - Украинага яна 2,5 миллиард долларлик ҳарбий ёрдам пакети масаласи турибди. Бу ёрдам доирасида Украинага илк “Страйкер” зирҳли машиналари бериш режаланган.
Шунингдек, мудофаа вазирлари учрашувидаги муҳим масалалардан бири - Германиянинг “Леопард 2” русумли танкларини Европанинг бошқа давлатларига етказишдир. “Леопард” танкларини экспорт қилиш учун Берлиннинг розилиги керак. Германия ҳукумати Россия билан тўғридан-тўғри низога бормаслик учун бунга розилик бермай келмоқда. Украина ва Россия армияси урушда, асосан собиқ совет даврида ишлаб чиқарилган Т-72 танкларидан фойдаланмоқда.
Владимир Зеленский, Германия етакчиларига мурожаат қилиб, “Леопард танкларини етказиб бера оласизми ёки йўқ - очиғини айтинг!” дея қатъий савол қўйди.
Зеленский мудофаа вазирлари йиғилишидан “кучли якуний қарорлар кутаётганини” айтди:
"Россия ўз кучларини, охирги кучларини марказлаштиряпти. Шунинг билан нафрат бутун дунёдан устун эканига ҳаммани ишонитиришга уриняпти. Айнан шунинг учун ҳам сиз ва мен тезлашишимиз керак. Биз худди боласининг ҳаётини сақлашга ҳаракат қилаётган ота ёки она каби, ота-онаси тезкор ёрдамга муҳтожлигини кўриб турган ўғил ёки қиз каби тез ҳаракат қилишимиз керак”.
НАТО қўмондони: Ғарб танклари шунчаки танк эмас, бу - бутун бир яхлит тизим
НАТОнинг юқори мартабали ҳарбий қўмондони, Украина куч жиҳатдан Россияга бас келиши учун танклар муҳим эканини таъкидлади.
“Бизга барча тизимларда мувозанат бўлиши муҳим. Танклар ўт очиш, олға юриш ва мудофаа ўртасидаги мувозанатни ўзида мужассам қилади. Буни имкониятларнинг муқаддас учлиги дейиш мумкин. Ғарб танклари масаласига келсак, замонавий Ғарб технологияси, Россия технологиясидан устун деб ўйлайман. Аммо шуни ҳам таъкидлашни истардимки, Ғарб танклари шунчаки танк эмас, бу бутун бир яхлит тизим. Логистика, таъминот, нишонларни аниқлаш қобилиятларини бирлаштирган техника. Армияда кўп функцияли самарали техника инвидуал хусусиятга эга бўлган техникалардан кўра муҳимроқ. Шундай экан, бу Украина учун фойдали бўлишига умид қиламан”, деди генерал Кристофер Каволи.
АҚШ Украинага янги ҳарбий ёрдам пакетини эълон қилди
Қиймати 2,5 миллиард долларга тенг ушбу ёрдам юзлаб бронетранспортёр ва пиёдалар жанговар машиналарини, Украина учун ниҳоятда зарур бўлган ҲҲМ воситалари ва бошқа қуролларни ўз ичига олади, дейилади Пентагон пресс-релизида.
Бу гал Украина NASAMS илғор зенит-ракета комплекслари учун ракеталар, саккизта “Авенжер” зенит-ракета комплекслари, 59 та “Брэдли” пиёдалар жанговар машиналари, 90 та “Страйкер” бронетранспортёрлари (улардан 20 тасига миналарни зарарсизлантирувчи ғалтаклар ўрнатилган), миналардан ва пистирмадан бўладиган ҳужумлардан ҳимояланган 53 та бронетранспортёр ҳамда 350 та тезкор ғилдиракли транспорт воситаларини олади.
Ёрдам пакетига HIMARS ракета тизимлари ва NASAMS ЗРК учун ўқ-дорилар, HARM русумли ракеталар, артиллерия снарядлари ва бошқа қуроллар ҳам киритилган.
Бундан ташқари, Киевга “Клеймор” пиёдаларга қарши миналари, 2000 та танкка қарши ракеталар, 3 миллиондан ортиқ ўқотар қурол патронлари, тунда кўриш ускуналари, эҳтиёт қисмлар ва бошқа жиҳозлар тақдим этилади.
Бироқ янги пакетда танклар назарда тутилмаган.
Дизертир рус аскарлари сони ортмоқда
Россия армияси оддий аскари Дмитрий Перов 31 ёшда эди. 13 январь куни у Украинанинг жанглар бўлаётган ҳудудида жойлашган ҳарбий қисмни ўзбошимчалик билан тарк этади.
Перов ўзи билан автомат, бешта ўқдон ва бир нечта гранатани олиб кетади. Ҳар ҳолда Воронеж ички ишлар бошқармаси тарқатган билгида шундай дейилган. Россия телеграм-каналлари эса, ўз навбатида, ташқи кузатув камераларидан олинган видеони ёйинлади. Унда Воронеждаги автобус бекатида турган одам Перов экани айтилади.
Қочоқ аскар 17 январь куни уйида, онасининг ёнида бўлгани маълум. Эртасига эса полиция Дмитрий Перовни Липецк вилоятида тутишга ҳаракат қилади. Айтишларича, аскар қаршилик кўрсатгач, “спецназ” жангчилари уни отиб ўлдиришган.
Россия Жиноят кодексида дезертирлик учун модда бор. Унда етти йилгача қамоқ жазоси назарда тутилган. Қурол билан қочган эса 10 йилгача муддатга қамалади. Сафарбарлик даврида ёки ҳарбий можаро шароитида қочганлар энг кўп – 15 йилгача озодликдан маҳрум қилинадилар.
Урушдан нафақат сафарбар қилинганлар, балки ёлланма аскарлар ҳам қочишмоқда. Январь ойида “Вагнер ХҲШ” жангчиси Андрей Медведев Норвегияга қочиб кетди. Ҳозир у Ослода, чет эл фуқароларини сақлаш марказида.