Вахтанг Кикабидзе 84 ёшида вафот этди
Россиянинг Украинага босқинини муттасил қоралаб келган таниқли грузиин актёри, қўшиқчи, режиссёр ва жамоат арбоби Вахтанг Кикабидзе 84 ёшида вафот этди.
Актёрнинг касаллик ортидан вафот этгани айтилди. 1980 йилда Грузияда халқ артисти унвонига сазовор бўлган Вахтанг Кикабидзе ўтган асрнинг 70-йилларида режиссёр Георгий Данелия фильмларида ўйнаган роллари ва эстрада саҳнасидаги чиқишлари билан собиқ СССР бўйлаб танилганди.
Айниқса, машҳур “Мимино” фильмидаги роли орқали уни ўзбек томошабинлари ҳам яхши таниган.
Кикабидзе Қрим аннексиясини ҳам, Россия қўшинларининг 2022 йил февралида Украинага бостириб киришини ҳам қоралаб чиққан.
2008 йилдаги Россия-Грузия урушидан буён Россияда чиқиш қилмаган. Ўтган йилги интервьюларидан бирида Кикабидзе “агар ҳеч бўлмаганда 20 ёшга кичик бўлганимда, қўлимга милтиқ ёки автомат олиб, қардош мамлакатни ҳимоя қилишга борган бўлардим”, деган эди.
Москванинг бир неча туманида ҳаво ҳужумидан мудофаа комплекслари жойлаштирилди
Бу ҳақда The Village нашри, шунингдек SOTA ва “ЧТД” телеграм-каналлари хабар қилмоқда.
Улар маълумот тасдиғи сифатида жойлаштирилган ҳарбий техникалар фотосуратларини эълон қилишган. Суратлардан бирида Тимирязев номидаги қишлоқ хўжалиги академиясининг тажриба даласида турган С-400 зенит-ракета комплекси акс этган.
Ушбу комплекслардан иборат яна битта батарея “Сокольники” ва “Лосиний остров” истироҳат боғлари орасига, турар-жой бинолари яқинига жойлаштирилган. “ЧТД” телеграм-канали манбасига кўра, С-400 Москва вилоятининг Шёлково мавзесидаги ҳарбий аэродромни қўриқламоқда.
Шунингдек, Коптевда ҳамда Рублёво-Успенский шоссеси яқинида ҳам ҳарбий техникалар пайдо бўлгани ҳақида хабарлар бор.
Москва маъмурияти ва Мудофаа вазирлиги пойтахтда ҲҲМ комплекслари жойлаштирилгани тўғрисида бирон баёнот берган эмас, расмийлар ОАВларда чиққан маълумотни ҳам изоҳсиз қолдиришмоқда.
Доғистонлик аскарлар Украинада жанг қилишдан бош тортди
Доғистондаги 136-мотоўқчилар бригадасининг шартнома бўйича ҳарбий хизматчилари Украинада жанг қилишдан бош тортиб, бригаданинг Буйнакскдаги доимий базасига қайтишди.
Кавказ.Реалии сайти қўлга киритган суд материалларига кўра, ҳарбий хизматчи Заур Батирханов 2022 йилнинг март ойида фронтга жўнатилган.
Қўмондонлик тақдим этган ҳужжатларда Батирханов ва унинг бир неча хизматдоши, “махсус вазифаларни бажариш учун хизмат сафарида бўлган пайтида ўт очиш марраларини эгаллаш ҳақидаги буйруқни бажаришдан бўйин товлаган”и қайд этилган.
Батирханов билан бирга Украинадан қайтган ҳарбийлар аниқ сони очиқланмаган. Батирхановнинг ўзи қўпол интизомий қоидабузарликда айбланиб, ҳарбий хизматдан бўшатилган.
Аввалроқ Росгвардиянинг Қабирдин-Болқориядаги ходимлари, владикавказлик шартнома бўйича ҳарбий хизматчилар, Краснодардаги “Пластун” номли “омончилар” ротаси ходимлари ва бошқалар Украинада жанг қилишдан бош тортгани хабар қилинган эди.
Ҳуқуқ фаоллари жанг қилишни истамаган россиялик ҳарбийлар “ДХР” ҳудудидаги авахталарда сақланаётганини айтишади.
Днепрда кўпқаватли уйга ракета ташланди
Қутқарувчилар, тамоман тўкилиб тушган 9 қаватли турар-жой вайроналари остидан омон қолганларни қидирмоқда.
Бу бинога 14 январь оқшом ракета ташланди. Айни шаклдаги ҳужумлар Украина бўйлаб давом этмоқда.
Днепр шаҳрига қилинган ракета ҳужуми оқибатида ҳалок бўлганлар сони 20 нафардан ошди.
Вилоят губернатори Валентин Резниченко жабрланган 73 кишидан 40 нафари шифохонада экани, улардан тўрт нафари реанимациядалигини маълум қилди.
Фавқулодда вазиятлар ходимларининг вайроналар остидан одамларни қутқаришни давом эттирмоқда.
"Қутқарув операцияси давом этмоқда. 40 дан ортиқ одамнинг тақдири номаълум. Ҳужум натижасида 72 хонадон вайрон бўлган, 230 дан ортиқ хонадонга зарар етган”, дея маълум қилди Резниченко.
Украина томони Россия 14 январнинг ўзида уч марта дрон ҳужумлари уюштиргани, 57 марта ракета зарбаси бергани ҳамда оғир қуроллар ёрдамида 69 марта зарба берганини билдирди. Украина кучлари 26 та ракетани уриб туширган.
Москва бу йирик ҳужумга ҳозирча изоҳ бермади.