Путин урушни 1,5 кунга тўхтатишга топшириқ берди
Россия президенти Владимир Путин Украина ҳудудидаги ҳарбий ҳаракатларни 1,5 кунга тўхтатиб туришга қарор қилган.
Бу ҳақда хабар қилган Кремль расмийларига кўра, Путин Россия Мудофаа вазири Сергей Шойгуга 6 январь соат 12дан 7 январь соат 24гача Украина ҳудудида ўт очишни тўхтатиш борасида топшириқ берган.
Путиннинг бу қарори Рождество байрами билан боғланмоқда. Кремль Украина томонини ҳам Рождество муносабати билан вақтинча ўт очишни тўхтатиб туришга чақирган.
Украина томони ҳозирча бу таклифга бирор муносабат билдирганича йўқ. Бу 5 январь куни Киев вақти билан соат 18гача олинган маълумот. Тафсилотлар Озодликнинг тармоқлардаги саҳифалари орқали янгилаб борилади.
Пригожин: Уруш учун "Вагнер"га ёлланган маҳкумларнинг судланганлиги бекор қилинди
“Вагнер” ҳарбий ширкати эгаси, Владимир Путинга яқинлиги билан танилган россиялик тадбиркор Евгений Пригожин Украина билан урушга ёлланган ва шартнома бўйича олти ой хизматни якунлаган маҳкумларнинг биринчи гуруҳи афв этилганини билдирди. Гап тахминан 20 киши ҳақида бормоқда.
Пригожинга кўра, уларнинг судланганлиги бекор қилинган. Ҳуқуқ фаоллари эса бунақа маҳкумларни афв этишнинг юридик механизмлари мавжуд эмаслигини айтишади.
Пригожин собиқ маҳкумларни кузатар экан, уларга шундай насиҳат қилди:
“Бўкиб ичманглар, қорадори истеъмол қилманглар, аёлларни зўрламанглар”.
Россия қамоқхоналарида жазо муддатини ўтаётган маҳкумларни, жумладан қотиллик, талончилик ва жинсий тажовуз сингари оғир ва ўта оғир жиноятлари учун судланганларни Украина билан урушга жўнатиш бир неча ойдан бери давом этмоқда. Уларни ёллаш билан Евгений Пригожин шахсан шуғулланаётгани ҳам маълум. У Россия қамоқхоналарини айланиб, маҳкумларни Украинага урушга боришга тарғиб этади. Мазкур ҳолат, айниқса урушга боришга розилик берган маҳкумларга, улар ярим йиллик хизматдан сўнг тирик қолган тақдирда афв ваъда қилиниши ҳуқуқбонларда кўплаб саволлар туғдирмоқда.
21 декабрда “Вагнер”гуруҳининг Луганскдаги ҳарбий лагеридан қочиб кетган уч нафар Ўзбекистон ватандоши тақдири ҳануз номаълум. Улар ҳам Россия қамоғида сақланаётган пайти “Вагнер” томонидан Украина урушида қатнашиш учун ёлланган бўлишган. Уларнинг қамалиш сабаблари маълум эмас.
Россия Ички ишлар вазирлиги хабарига кўра, “Вагнер” ширкати лагеридан уч ўзбекистонликдан ташқари яна уч маҳкум қочган. Улар Қирғизистон, Беларусь ва Россия ватандошларидир. Ҳозирда бу олти кишига нисбатан қидирув эълон қилинган.
Россия Украинада кетма-кет муваффақиятсизликка учрагач, вагнерчилар ва қодировчиларга таянишга мажбур қолмоқда.
Эрдўғон Путинни урушни тўхтатишга чақирди
Туркия президенти Ражаб Тоййиб Эрдўғон Россия президенти билан телефон орқали мулоқотида Россиянинг сулҳга чақирувлари “ҳарбий ҳаракатларни бир томонлама тўхтатиш ва келишмовчиликни одилона ҳал қилиш” билан мустаҳкамланиши лозимлигини айтди, дея хабар қилмоқда “Анадўлу” агентлиги Туркия президенти маъмуриятига таянган ҳолда.
Кремлнинг ушбу сўзлашувга доир хабарномасида Эрдўғоннинг даъвати ҳақида ҳеч нима дейилмаган. Хабарнома матнида Владимир Путин “Россиянинг Киев ҳукумати маълум ва бир неча бор эълон қилинган талабларни бажариши ҳамда янги ҳудудий воқеликни ҳисобга олиши шарти билан жиддий мулоқотга ҳозирлигини яна бир карра тасдиқлаган”лиги хусусида сўз боради.
Аввалроқ Россия ташқи ишлар вазири Сергей Лавров Россия Владимир Зеленский ва Жо Байден Вашингтонда муҳокама қилган “тинчлик формуласи” бўйича ҳеч бир музокараларда иштирок этмаслигини айтган эди.
Туркия лидери Россиянинг Украинага босқини оқибатларини бартараф этишда фаол иштирок этишга уриниб келмоқда. Хусусан, Украина ғалласини Қора денгиз портларидан экспорт қилиш бўйича битим Туркия воситачилигида тузилган ва сўнгра узайтирилган эди. Шунингдек, икки ўртадаги энг шов-шувли асирлар алмашуви ҳам Эрдўған шафелигида амалга ошди – ўшанда Россия тутқунликдаги “Азов” батальони командирларини Путиннинг яқин кишиларидан бири ўлароқ танилган украиналик собиқ сиёсатчи Виктор Медведчукка айирбошлаган эди.
Зеленский зирҳли танклар учун Францияга миннатдорлик билдирди
Украина президенти Владимир Зеленский зирҳли танклар юбориш қарори учун Францияга миннатдорлик билдирди:
"Франция Европадан Украинага мудофаа ёрдамини янги босқичга олиб чиқди. Президент Макронга бу ёрдам учун миннатдорлик билдираман. Бизга ҳали кўп зирҳли техникалар керак, жумладан Францияда ишлаб чиқарилган танклар ҳам. Бу қолган ҳамкорларимизга аниқ сигнал бўлади. Ғарб типидаги танклар ҳалигача Украинага нега етказиб берилмаётганига асосли сабаб йўқ. Бу украиналиклар учун хавфсизликни, европаликлар учун эса тинчликни таъминлашда жуда муҳим аҳамиятга эга”.
Таҳлилчилар Францияда ишлаб чиқарилган бу танклар Украинага юбориладиган илк Ғарб зирҳли техникаси эканини таъкидламоқда. Чунки ҳозирга қадар НАТО мамлакатлари Украинага Совет Иттифоқи даврида ишлаб чиқарилган зирҳли машина ва танкларни етказиб берган эди.