Бахмутдаги украин ҳарбийлари Ғарбдаги ҳамкорларга миннатдорлик белгиси сифатида Украина байроғини бериб қўйишни сўрашди
Украина президенти Владимир Зеленский Бахмутга сафари чоғида шаҳар мудофаачилари унга Россия билан урушда Украинага қурол-аслаҳа билан кўмаклашаётган ғарблик ҳамкорларга етказиш учун байроқ беришганини айтди.
Зеленский Бахмут ҳақида сўзларкан, уни “Россия ишғол эта олмаган вайрона шаҳар” дея таърифлади.
Украина президенти Донецк вилоятининг ҳозирда энг шиддатли жанглар кечаётган Бахмут шаҳрига сешанба куни борган эди.
Бахмут қалъасидаги ҳарбийлар Украинага қурол-аслаҳадан кўмаклашаётган ғарблик ҳамкорларга бериб қўйиши учун президент Зеленскийга байроқ топширишди.
“Барча ватандошлардан сўрайман: қаерда бўлсангиз ҳам, илтимос, босқинчиларнинг энг аёвсиз ҳужумларига, телбаёна зарбаларига қарамай сабот билан курашаётган украин қаҳрамонларидан ёрдамингизни дариғ тутманг...
Ғорат қилинган, аммо бўйсунмаган Бахмутимизни, унинг мудофаачиларини қўллаб-қувватланг.
Жангчиларимиз бугун менинг қўлимга байроқ тутқазишиб, уни Украина учун муҳим қарорлар қабул қилувчи инсонларга етказишимни илтимос қилишди. Албатта етказамиз.
Биз бўш келмаймиз. Украина учун зарур дастакни албатта оламиз!”, деди Зеленский.
Путин “махсус амалиёт ҳудуди”га боргани ҳақидаги видео аслида Ростов-Донда суратга олинган бўлиб чиқди
Россия президенти Владимир Путиннинг 16 декабр куни “махсус ҳарбий амалиётга жалб қилинган қўшин турларининг бирлашган штаби”га ташрифи ҳақидаги видео аслида Ростов-Донда – Жанубий ҳарбий округ штабида суратга олинган. “Агентство” нашри видеодаги штаб интерьерини ушбу бинода илгари бўлиб ўтган тадбирлар фотосуратлари билан солиштиргач, шундай хулосага келди.
Ноябрда Россия Мудофаа вазирлиги ёйинлаган вазир Сергей Шойгунинг “Украинада махсус ҳарбий амалиёт ўтказаётган қўшин турлари Бирлашган гуруҳининг қўмондонлик пунктини инспекция қилган”ига бағишланган видео ҳам худди шу ерда суратга олинган бўлиб чиқди.
Аввалроқ Кремль 16 декабрда Путин кун бўйи Украина ҳудудидаги ҳарбий ҳаракатларда иштирок этаётган қўшин турлари бирлашган штабида ўтказганини маълум қилган эди. Фото ва видеоларда Путиннинг ёнида мудофаа вазири Сергей Шойгу, Бош штаб бошлиғи Валерий Герасимов ҳамда қўшинлар бирлашган гуруҳи қўмондони Сергей Суровикинлар акс этган. Президент ҳарбийлар билан айнан қаерда учрашгани хабарда очиқланмаган.
“Единая Россия”дан сайланган Давлат Думаси депутати, истеъфодаги генерал-лейтенант Андрей Гурулёв 20 декабрь куни Владимир Соловьёвнинг “Полний контакт” дастури ёйинида Путин “махсус ҳарбий амалиёт ҳудуди”да бўлганини айтди.
Президентнинг матбуот котиби Дмитрий Песков депутатнинг сўзларини “Российская газета”га шундай изоҳлади: “Агар у (Гурулёв) Путин жума куни бўлган штабни назарда тутаётган бўлса, унда бу тўғри”. Песков шундан бошқа тушунтириш бермаган. “Российская газета” эса Песковнинг изоҳини “Кремль Путин МҲА ҳудудига сафар қилганини тасдиқлади” деган сарлавҳа билан эълон қилди.
Ушбу хабар Украина президенти Владимир Зеленский Донецк вилоятининг бир неча ҳафтадан бери қақшатқич жанглар бўлаётган Бахмут шаҳрига бориб, украин мудофаачилари билан учрашганидан бир неча соат ўтиб пайдо бўлди.
Бироқ Путин қаерда бўлганини узил-кесил аниқлаш имкони йўқ. Россия ҳукумати “махсус амалиёт зонаси” деганда одатда Украинанинг аннексия қилинган Қримдан ташқари барча ҳудудларини назарда тутади.
Расман Путин ҳали бирон марта ҳарбий ҳаракатлар ҳудудида бўлган эмас.
The Hill: АҚШ Конгресси Россияни “агрессор давлат” деб эълон қилмоқчи
АҚШ Конгресси Россияни “агрессор давлат” деб тан олиш тўғрисидаги қонун лойиҳаси устида ишламоқда.
Россияни “терроризмга ҳомий давлат” дебэътироф этиш ҳақидаги қонун лойиҳаси АҚШ ҳукумати томонидан рад этилганидан сўнг ўрнига шу қонунни қабул қилишмоқчи, деб ёзади The Hill.
Нашрга кўра, янги ҳужжатга мувофиқ, АҚШ президенти Украинага қарши агрессияда қатнашяпти, деб ҳисоблаган ҳар қандай мамлакат ҳам Россия қаторида “агрессор давлат” деб тан олиниши мумкин.
Шунингдек, лойиҳада АҚШ президентига “агрессия жинояти учун жавобгар, унга алоқадор ёки иштирокчи” бўлган ҳар қандай кишига нисбатан санкция қўллаш ваколатини бериш таклиф қилинмоқда.
АҚШ давлат котиби Энтони Блинкен CNNга берган интервьюсида қонун лойиҳаси устида иш олиб борилаётганини тасдиқлар экан, АҚШ ҳукумати шу йўл билан “терроризмга ҳомий давлат мақомини тадбиқ этиш билан боғлиқ айрим муаммоларни четлаб ўтмоқчи” эканини айтди.
"Путинга сигнал"
Зеленскийнинг ташрифи Россия президенти Владимир Путин Иккинчи жаҳон урушидан бери Европа ҳудудидаги энг йирик урушни бошлаб, Украинага бостириб кирганидан 300 кундан кўпроқ вақт ўтиб амалга оширилмоқда. Бу ташриф, шунингдек, Конгресснинг Украинага кенг кўламли ёрдамни ҳам ўз ичига олган 1,7 триллион долларлик харажатлар пакетини кўриб чиқишига тўғри келмоқда.
Сентябргача АҚШ ҳукуматини молиялаштирадиган бу қонун лойиҳаси Вакиллар палатаси ва Сенатдан ўтиши кутилмоқда.
Бироқ юқори мартабали амалдорнинг таъкидлашича, қўллов ҳар икки партиядан бўлишига Байден маъмуриятининг ишончи комил.
“Демак, бу муайян сиёсий партияга юбориладиган сигнал эмас, балки Путинга ва бутун дунёга Америка қанча керак бўлса, Украинага шунча ёрдам бериши ҳақида сигнал беради”, дейди расмий.
Украина ўзини ҳимоя қилиш учун АҚШ ҳарбий ёрдамига жуда боғлиқ. Агар қонун лойиҳаси ҳозир қабул қилинмаса, келаси йил бошида АҚШ ҳукумати фаолияти тўхтаб қолиши мумкин, ўшанда республикачилар Вакиллар палатасини назоратга олади ва кўпчилик Россия янги ҳужум бошлашини кутаётган бир пайтда Украинага ёрдам кечикади.
"Ҳозир Украинани молиялаштириш учун ҳамма нарса шу қонунга боғлиқ", дейди кучли диаспора гуруҳи бўлмиш Америка Конгресси Украина қўмитасининг алоқа бўйича директори Андрей Добрянский.
Шу ҳафта бошида Путин Беларус раҳбари Александр Лукашенко билан учрашиш учун уч йилдан бери биринчи марта Минскга борган эди.
Добрянскийнинг айтишича, Зеленский ҳам Путиннинг Беларусга ташрифидан кейин “катта шоу кўрсатиш” учун АҚШга келаётган бўлиши мумкин.
“Зеленский: “Мен хоҳлаган вақтда Оқ уйга бора оламан”, деб айта олади”, дейди у.
Бу ташриф Зеленскийнинг 3,5 йилдан кўпроқ вақт олдин президентликка келганидан буён Оқ уйга иккинчи ташрифи бўлади.
Зеленскийнинг сафари режаларини AP’га тасдиқлаган икки манбанинг айтишича, бу сафар хавфсизлик нуқтаи назаридан сўнгги дақиқада бекор қилиниши ҳам мумкин.