Киев аҳолиси душанба куни портлаш садолари билан уйғонди
Россия бугун эрта тонгдан ўнлаб “камикадзе” дронлари билан Киевдаги энергия иншоотларига ҳужум қилди. Бу бир ҳафта ичидаги Москванинг Киевга амалга оширган учинчи ҳаво ҳужуми бўлди.
“Ташқарини фақат ошхона деразасидан кузатаман. Ҳеч қаерга чиқмаяпман. Юмшоқ қилиб айтганда лаънати “катсаплар” (руслар), йўқ бўлсин дейман”, дейди шаҳар турғуни Ирина.
Украина ҳаво ҳужумидан мудофаа тизими ёрдамида 35 та дрондан 30 тасини уриб туширганини маълум қилди. Россия октябрь ойидан бери Украина элeктр тармоғини нишонга олиб келади.
"Путин ўлади. Уларнинг ҳаммаси ўлади. Биз улардан узоқроқ яшаймиз. Ҳамма нарсани қайта тиклаймиз, узоқ ва фаровон яшаймиз", дейди шаҳар турғуни Владимир.
"Камикадзе" дронлари бир марталик фойдаланиладиган арзон учувчисиз қурилмалар бўлиб, улар тезликда нишон томон пасайиб, нишон билан тўқнашувдан олдин портлайди.
Киев расмийларига кўра, 23 та дрондан 18 таси уриб туширилган.
Украина ҳарбийлари дронлар Азов денгизининг шарқий соҳилидан учирилгани ва Эронда ишлаб чиқарилган Шаҳед дронлари эканини таъкидлади.
Бахмутда жанглар давом этмоқда
Дрондан олинган тасвирларда Украинанинг Бахмут шаҳрида жанглар кетаётганини кўриш мумкин
Олинган видеода вайрон бўлган бинолар ва портлашлар акс этган. Видеода Россия "артиллерия ва миномётлар билан фуқаролик инфратузилмасини вайрон қилаётгани” айтилган.
Рейтерс видеонинг жойлашувини тасдиқлашга муваффақ бўлди. Бироқ, видео тасвирга олинган санани мустақил равишда тасдиқлай олмади.
Бахмут сўнгги ҳафталарда яна шиддатли жанглар марказига айланди.
Ҳарбий экспертларнинг таъкидлашича, шаҳар иккала томон учун ҳам стратегик аҳамиятга эга бўлмасада, сўнгги кунларда Россия армияси, жумладан, Вагнер гуруҳи жангчилари шаҳарни бомбардимон қилишни кучайтирган.
Бахмут шаҳрида кучли портлашлар содир бўлаётган бир пайтда одамлар озиқ-овқат ва кийим-кечак сотиб олиш учун кўчага чиқишга мажбур.
“Нархлар осмон. Нафақамиз ҳеч нарсага етмайди. Ҳозир уйимга ҳеч нима қилмаганми ёки йўқ билмайман. Ҳар кун шунақа доимий қўрқув билан ўтади, - дейди Галина исмли украиналик аёл.
Маҳаллий ёнғин хизмати маълумотларига кўра, Россия бир хил позицияларни қайта-қайта нишонга олаётганлиги боис, ёнғинларни бартараф этиш тобора қийинлашмоқда.
“Бу ерда қолган одамлар кўп эмас. Шунинг учун ёнғинлар сони камайганди. Аммо Россиянинг бомбардимонлари натижасида яна ёнғинлар кўпайди”, — деди Бахмут ўт ўчириш хизмати бошлиғининг ўринбосари.
Bилоят губернатори маълумотларига кўра, Бахмутда 12 мингдан камроқ аҳоли қолган.
Россиянинг дрон ҳужумларидан кейин Киевда ёнғин чиқди
Бугун Россия эрта тонгда яна дронлар ёрдамида Киевдаги энергия инфратузилмасини нишонга олди. Натижада энергия иншоотида катта ёнғин кузатилган.
Украина расмийлари мамлакат ҳаво ҳужумидан мудофаа тизими 20 та дрондан 15 тасини уриб туширганини билдирди.
“Мен шу ерда ўтирган эдим. Тўсатдан шовқин ва кетидан дарҳол портлаш овози эшитилди. Уч-тўрт дақиқадан сўнг иккинчи портлаш содир бўлди”, — деди киевликлардан бири Рейтерс агентлигига.
Киев мерининг айтишича, ҳозирча ҳужум оқибатида ҳалок бўлганлар ёки жароҳатланганлар йўқ. Соломянка ва Шевченко туманларидаги портлаш нуқталарида тиббиёт ходимлари ишламоқда.
Украина барча мудофаа сценарийларига тайёрланмоқда
Владимир Зеленский мамлакат чегараларини ҳимоя қилиш “доимий устувор вазифа” экани ҳамда Украина Россия ва Беларус билан юзага келиши мумкин бўлган барча сценарийларга тайёр эканини билдирди.
"Биз чегара ҳақида ҳам батафсил гаплашдик. Россия билан бўлгани каби Беларус билан ҳам чегарани ҳимоя қилиш доимий устувор вазифамиз. Биз барча эҳтимолий мудофаа сценарийларига тайёрланяпмиз. Минскдан фойдаланиш ҳам уларга бу урушда ёрдам бермайди. Буни Украина қарши урушда бир неча бор кўрдик." деди Зеленский ўзининг тунги видеомурожаатида.
Зеленский бу ҳақда Владимир Путиннинг Беларусга ташрифи арафасида, Москванинг эҳтимолий янги ҳужуми Беларус орқали бўлиши ҳақидаги гап-сўзлар фонида таъкидлаб ўтди.
Зеленский ўз мурожаатида Ғарб давлатларини Украинани кўпроқ ҳаво ҳужумидан мудофаа тизимлари билан таъминлашга чақирди. Зеленский шунингдек, Украина шарқидаги энг шиддатли жанглар кетаётган Бахмут шаҳри Украина кучлари назоратида эканини айтди.
Россиянинг инфратузилма обьектларига уюштирган сўнгги ҳужумларидан сўнг уч миллион аҳоли учун электр энергияси қайта тикланди. Икки кун ўтиб эса умумий тўққиз миллион украиналик хонадонида электр энергияси таъминоти қайта йўлга қўйилди, дея маълум қилди Зеленский.
Россия ўтган жума куни Украина электр тармоғига ракеталар билан вайрон қилган эди. Ҳужум натижасида тўққиз энергетика обьектига зарар етди, камида уч киши ҳалок бўлди.