Сафарбарликка қарши намойишларда 150дан ортиқ одам ҳибсга олинган
Инсон ҳуқуқлари бўйича "ОВД-инфо" лойиҳасига кўра, Путин эълон қилган ҳарбий сафарбарликка қарши намойишларда юздан ортиқ киши, жумладан Екатеринбургда 30 киши. Красноярскда 16 киши, Перм ва Уфада 14 киши, Иркутскда 7 киши ҳибсга олинган.
Бугун эрталаб Москва прокуратураси сафарбарликка қарши кўча намойишларида қатнашганлик учун жиноий жавобгарликка тортилиши билан таҳдид қилган эди.
Бундан олдин Хабаровск, Улан-удеда ҳам намойишлар куч билан бостирилгани ҳақида хабар берилганди.
АҚШ Конгресси Кремлга яқин бўлган шахсларга санкция қўллаш ҳақидаги қонун лойиҳасини қабул қилди
АҚШ Конгресси Вакиллар палатаси Россиянинг юқори мартабали амалдорлари, тадбиркорлари ва Кремлга яқин бўлган оммавий ахборот воситалари ходимларига қарши санциялар тўғрисидаги қонун лойиҳасини қабул қилди.
Санкция қўлланилиши керак бўлганлар орасида тадбиркор Роман Абрамович, "Биринчи канал" директори Константин Эрнст, "РТ" раҳбари Маргарита Симонян, телебошловчи Владимир Соловёв, Марказий банк раҳбари Элвира Набиуллина, актёр Марат Башаров, қўшиқчилар Николай Басков, Олег Газманов ва Филипп Киркоров, дирижор Валерий Гергиев, Рус православ черкови патриархи Кирилл, оммавий ахборот воситалари Владимир Путиннинг яқин дўсти деб атаган Светлана Кривоногих, Ҳисоб палатаси раҳбари Алексей Кудрин, режиссёр Никита Михалков, медиа менежери Кристина Потупчик. , Давлат Думаси депутати Валентина Терешковалар бор.
Қонун кучга кириши учун қонун лойиҳаси Сенат томонидан маъқулланиши ва президент томонидан имзоланиши керак.
НАТО Бош котиби: Ғарб Россия таҳдидларига қарши туради
НАТО Бош котиби Йенс Столтенберг сўзларига кўра, Путиннинг нутқи эскалациянинг яққол белгисидир, бироқ унинг айтган ҳамма гаплари кутилмаган ҳол эмас.
Путин ўз кучини ошириб баҳолади, Украинада уруш бошлаб, хатога йўл қўйди ва унинг сўнгги баёнотлари бунинг яққол далилидир, деб ҳисоблайди НАТО Бош котиби.
Унинг сўзларига кўра, яна юз минглаб одамларни фронтга жўнатиш нафақат можарони, балки Россия армиясининг мавқеини ҳам оғирлаштиради. Россия қўшинлари ёмон жиҳозланган ва тегишли қўмондонлик ва назоратга эга эмас, деди Столтенберг.
Россияда сафарбарлик эълон қилингач, Москвадан Истанбул, Ереван ва Минскга учоқ чипталари тугаб қолди
Россияда сафарбарлик эълон қилингач, Москвадан Истанбул, Ереван ва Минскга тўғридан-тўғри рейслар учун барча чипталар тугаб қолди.
Аэрофлот веб-сайтида 21 сентябр куни Москвадан Минскка чипталар аллақачон йўқлигини кўриш мумкин.
Ҳали ҳам 22 сентябр куни Беларус пойтахтига учиб кетиш мумкин - қуйи классда 43 106 рубл (бу одатдаги нархдан деярли 10 баравар юқори, тахминан 700 доллар эквиваленти) ёки бизнес-классда 106 631 рублга, аммо бу чипталар ҳам тезлик билан сотилмоқда.
Ушбу санада Минск ва Ереван, Истанбул, Олмаота, шунингдек, Тбилиси, Батуми, Кутаиси шаҳарларига рейслар амалга оширилмайди. Ушбу рейсларга чипталарни фақат октябрь бошида олиш мумкин.
Шу билан бирга, нашрнинг ёзишича, рус тилида сўзлашувчи муҳожирларнинг Интернет тармоқларида эркакларга Грузия ва Финляндия билан қуруқликдаги чегарани кесиб ўтиш тақиқлангани, гарчи аёллар муаммосиз киритилаётгани ҳақида маълумотлар пайдо бўлган. ФСБ чегара хизмати ҳозирча буни расман изоҳлаганича йўқ.
Расмий равишда, Россия ҳукумати маълум ёшдаги эркаклар ёки сафарбарлик қилинадиган фуқаролар Россиядан ташқарига чиқа олмаслиги ҳақида ҳеч қандай баёнот бермади.
Аммо “Сафарбарлик тайёргарлиги ва сафарбарлик тўғрисида”ги қонуннинг 21-моддасига мувофиқ, ҳарбий хизматда турган фуқароларга сафарбарлик эълон қилинган пайтдан бошлаб ҳарбий комиссарликларнинг рухсатисиз яшаш жойидан чиқиб кетиши тақиқланади.